«ЛъэкъуацIэхэм къаIуатэ»
Адыгэ лъэкъуацIэхэм апылъ къэбархэр гъэшIэгъоных, ау мы тхылъым дэтхэр зэкIэ къэттын амал зэрэщымыIэм къыхэкIыкIэ анахьыбэрэ тызэрихьылIэхэрэм ащыщхэр къыхэтхыхэзэ тшIыщт.
Абыдэ – Абидов
Iэбыдэ ыIомэ къэбэртэябзэкIэ Iэ+пытэ имэхьан.
Abide тырку: «монумент, памятник» («саугъэт»).
Абыдэ – арапыбзэкIэ мыщ имэхьанэ «шъхьащэ зышIырэ» («поклоняющийся»). Абыдэ Артур гъэзетэу «Шапсугием» (жъоныгъуакIэм и 18, 2012) къызэрэщитхырэмкIэ, мы лъэкъуацIэм фэгъэхьыгъэу къалмыкъ мифологием къыхигъотагъэр гъэшIэгъоны. Къалмыкъхэм ядиншIошъхъуныгъэкIэ адрэ дунаим гъогуищырэ къэлэ фыжьырэ щыIэу ары. Анахь ачIэгърэ ящэнэрэ гъучI гъогум а къэлэ фыжьым уфещэ. ЯтIонэрэ гъоплъэ гъогум Тхьэр зымылъытэрэ 33-р зыдыщыIэ чIыпIэм урещалIэ, ащ узыщырэхьатыщт чIыпIэ иI. Ящэнэрэ гъоплъэ гъогоу зэкIэмэ анахь лъагэу щыIэм къохьапIэм ылъэныкъокIэ тыгъэм уфещэ ыкIи джэнэтым урещэ. Ащ щэпсэу Абыд-бурхан.
Артур зэрэхигъэунэфыкIырэмкIэ, 1830-рэ илъэсым ашIыгъэгъэ картым къыгъэлъэгъорэ абдзэхэ лъэпкъмэ Абыдэхэр ащыщых, чылэу Абыдэхьаблэ дэсыгъэх. Чылэр Псэкъупсэ пэмычыжьэу щысыгъ. 1864-рэ илъэсым Кавказ заор заухым, Артур ятэжъэу Абыдэ Къэсэй къызэриIотэжьыгъэмкIэ, Абыдэ лъэпкъым инахьыбэ дэдэр Тыркуем икIыжьыгъ, зы купи Пшызэ ичIыпIэ зэщизхэм арытIысхьагъ. Ахэм ащыщыгъ Хьахъупэкъэ Абыдэ. Ар чылэу Лахъщыкъуаеу Псыфабэ ыпшъэкIэ щытыгъэм дэтIысхьагъ.
Абыдэхэр дунаим ихэгъэгу зэфэшъхьафхэм (США-м, Тыркуем, Израиль, Иорданием, Сирием, Германием) непэ ащэпсэух.
НэмыкI тхыгъэу Абыдэ лIакъом фэгъэхьыгъэу къэдгъотыгъэмэ зэрэтхыгъэ бзэм тетэу ягугъу къэтшIын: «Аул Абдахабль, название указывает на абадзехскую фамилию Абидовых (Абыдэ). В таком случае, этот аул мы можем обозначить как Абидохабль 1-й, тогда как Абидохабль 2-й был уничтожен позднее на р. Пшиш. Расположение: р. Туха, левый приток Пшехи. Участь: захвачен и разорен колонной полковника Офрейна. 26.01.63 г. (Богуславский, с. 356)». «Аул Абидохабль 2-й, 1863. Расположение: правый берег Пшиша, в 22 верстах ниже впадения в Пшиш р. Хадыжи. На месте Абидохабля была основана станица Тверская. Участь: уничтожен 07.06.63 г. колонной полковника Виберга». (Генс, кавказский сборник. Т. VIII, с. 506–509.)
АкIыгъу // АкIэгъу – Ачуг // Ачегу – Ачегу // Ачугов
АкIыгъухэр (АкIэгъухэр) шапсыгъэх, къуаджэу Агуй ялIэкъо лъапсэ къыщежьэ.
Я XVIII-рэ лIэшIэгъум апэу Хьатыгъужъыкъуае къэкIожьыгъэр ЛъэпшъыхьакI. Ащ игъусагъэх ыкъохэу Шъалихьэрэ ХьахъуцIыкIурэ. Куп зэрэугъоигъэу шыу купэу чылэм къакIорэмэ апаплъэщтыгъэх. Шыоу къэсрэ пэпчъ ыцIэкIэ бысым купыр еупчIыщтыгъ, етIанэ лъэкъуацIэ ратыщтыгъ е ылъэкъуацIэ къырагъаIощтыгъ.
Аузэ шыоу къакIохэрэр аухыгъэба зыщаIощтым, къэгужъуагъэу зы шыу къыIухьагъ.
Бысымым щыщ нахьыжъыр къэупчIэ:
– Хэт ар лIакъокIэ зыщыщыр?
– Ари мыдрэ шыу хьакIэмэ акIыгъу,– зыгорэм джэуап къытыжьыгъ.
А шыум «акIыгъур» раIозэ, текIыгъэхэм а «акIыгъу» зыфиIорэр лъэкъуацIэ афэхъугъ. Адыгэ макъ. 25.05.2011.
ЧIыпIацIэхэр: АкIэгъу, АкIэгъу Исхьакъ имэкъух, АкIэгъу Къадырбэч игъэхъун, АкIэгъу Нажэ имэщшIапI, АкIэгъу Шъалихьэ имэкъупI. Меретуков К. Х. Указ. соч.– С. 38–39.
Цуекъо Алый.