Экстремизмэ нэшанэ зиIэ бзэджэшIагъэхэм апэшIуекIогъэным фэгъэхьыгъэ Iофтхьабзэ мы мафэхэм Мыекъопэ къэралыгъо технологическэ университетым щызэхащагъ.

АР-м хэгъэгу кIоцI IофхэмкIэ и Министерствэ экстремизмэм пэшIуекIогъэнымкIэ и Гупчэ илIыкIоу ГутIэ Рэмэзан апшъэ­рэ еджапIэм къырагъэблэгъагъ, мы лъэныкъомкIэ пшъэрылъэу, гумэкIыгъоу щыIэхэмкIэ кIэлэ­егъаджэхэм гущыIэгъу афэ­хъугъ.

Мыекъопэ къэралыгъо тех­нологическэ университетым лъэпкъ зэфэшъхьафыбэ щеджэ. Лъэпкъ ыкIи дин зэфыщытыкIэхэм алъэныкъокIэ, терроризмэм ыкIи экстремизмэм апэшIуекIогъэнымкIэ мыщ Iофтхьэбзэ гъэнэфагъэхэр щызэрахьэх. Анахьэу анаIэ зытырагъэтыхэрэм ащыщ экстремизмэ нэшанэ зиIэ бзэджэшIагъэхэр ыкIи лъэпкъ зэгурымыIоныгъэ­хэр игъом къыхэгъэщыгъэнхэр.

— Апэрэ курсым къычIэхьагъэхэм шъунаIэ нахь атежъу­гъэ­тын, еджэныр заухыкIэ ашIэрэм гъунэ лъышъуфын фае. Мы лъэныкъом къулыкъушIэхэм лъэшэу анаIэ тет нахь мышIэми, мафэ къэс шъо шъуахэт, яшэн-гъэ­псыкIэ зэ­хъо­кIыгъэмэ шъоры зылъэ­гъу­рэр. НыбжьыкIэм ышъхьэ къихьащтыр къэшIэгъуай. IэкIыб къэралыгъохэм къарыкIыгъэ ныбжьыкIэхэм шIэныгъэ зэрагъэгъотынэу арышъ къызкIэкIуагъэхэр, ерэджэх. Тызэкъотэу мы гумэкIыгъом тыпэшIуекIон фае, — еIо ГутIэ Рэмэзан.

Гъэсэныгъэм иучреждениехэм ащызэхащэхэрэ пэшIорыгъэшъ Iофтхьабзэхэр джыри нахь агъэлъэшынэу зэдаштагъ.

ДЕЛЭКЪО Анет.