Дэхагъэм уфегъасэ
Адыгеим икультурнэ-зыгъэпсэфыпIэ IофшIапIэхэм якъэшъокIо купхэм япащэхэм яегъэджэн зэхахьэ Iоныгъом и 11-м «Налмэсым» и Унэ щыкIощт.
Мафэм сыхьатыр 2-м зэIукIэр рагъэжьэщт. Республикэм лъэпкъ культурэмкIэ и Гупчэ иIофтхьабзэ пIуныгъэм щытегущыIэщтых. КъэшъокIо купхэм ахэтхэр якIэлэцIыкIугъом шэн-хэбзэшIухэм афэгъэсэгъэнхэм, ягушъхьэ кIуачIэ къэIэтыгъэным фэшI лъэпкъ къашъом мэхьанэу иIэм яеплъыкIэхэр къыраIолIэщтых.
КIэлэцIыкIу ансамблэу «Мыекъуапэ инэфылъэхэм» яхудожественнэ пащэу, Урысыем культурэмкIэ изаслуженнэ IофышIэу, Адыгеим инарднэ артистэу, Къэбэртэе-Бэлъкъарым изаслуженнэ артистэу Нэныжъ Айдэмыр зэхахьэм псалъэ къыщишIыщт.
IэпэIасэм иеджапIэ кIэлэцIыкIу ансамблэм иIофыгъохэр къыщаIэтыщтых. Лъэпкъ, патриотическэ къашъохэм, шэн-хабзэхэм кIэлэеджакIохэр афэгъэсэгъэнхэм, фэшъхьафхэм атегущыIэщтых.
Зэхахьэм ыуж мафэм сыхьатыр 4-м дунаим щыцIэрыIо ансамблэу «Налмэсым» концерт къытыщт.
Сахьидэкъо Нурбый.