Къантемыр къыхихыгъэ гъогур
Кинорежиссер ныбжьыкIэу Бэлэгъэ Къантемыр итворчествэ ашIогъэшIэгъонэу цIыфыбэ лъэплъэ. Анахьэу IэкIыб хэгъэгухэм якинокритикхэр ары ащ ыгъэуцугъэ кинофильмитIуми осэ ин къафэзышIыгъэхэр. Къантемыр иIофшIагъэхэр агу рехьых, анаIэ къытет, къыкIэлъыкIощтхэ IофшIагъэхэм къяжэх.
Аужырэ лъэхъаным пандемием изэрарэу цIыф пстэумэ якIыгъэм емылъытыгъэу Къантемыр ящэнэрэ фильмэу ыгъэуцущтым исценарий егъэхьазыры.
Шъугу къэдгъэкIыжьын ащ зэлъашIэрэ кинорежиссерэу Александр Сокуровым Къэбэртэе-Бэлъкъар къэралыгъо университетым къыщызэIуихыгъэгъэ курсхэр къызэрэщиухыгъэхэр. «Теснота» зыфиIорэ кинофильмэу апэ ыгъэуцугъэр я 70-рэ Дунэе Каннскэ кинофестивалым хэлэжьагъ, программэу «Особый взгляд» зыфиIорэм кинопрессэмкIэ Дунэе федерациеу ФИПРЕССИ итын къыфагъэшъошагъ. ЯтIонэрэ фильмэу «Дылдэ» джащ фэдэу илъэситIу текIыгъэу Каннскэ кинофестивалым программэу «Анахь режиссурэ дэгъур» зыфиIорэм хэлэжьагъэхэм ащытекIуагъ. НэмыкI шIухьафтынхэри зэнэкъокъу зэфэшъхьафхэм къащыратыгъэхэу ащ иIэх.
Илъэс 27-рэ нахь ымыныбжьэу Дунэе кинофестивалым иIофшIагъэ зэрэхэфагъэм, дунэе киноиндустрием испециалистхэмрэ икритикхэмрэ ар къызэрэхагъэщыгъэм Къантемыр ышъхьэ ыгъэунэзагъэп. Непэ лъэкIэу иIэр зэкIэ режиссурэм фигъэIорышIэнэу хьазыр. Къыхихыгъэ сэнэхьатыр шIу елъэгъу, зэпымыоу ащ «ишъэфхэр» зэрегъашIэх. ГухэлъышIоу иIэр бэ, ахэр къызэрэдэхъущтым игуапэу ыкIи ишъыпкъэу пылъ.
Къантемыр творческэ цIыфхэр бэу инэIуасэх. Ахэм ащыщ литературнэ премиеу «Большая книга» зыфиIорэм илауреатэу, тхакIоу Марина Степановар, зэгъусэхэу фильмыкIэу ыгъэуцущтым исценарий зэдатхы. Фильмыр Къэбэртэе-Бэлъкъар Республикэм щытырахыщт, Къантемыр ятIонэрэу унэгъо кIоцIым къихъухьэрэ хъугъэ-шIагъэхэмрэ ащ исхэм язэфыщытыкIэхэмрэ зафегъазэ, джы ятэрэ ыкъорэ зэрэзэдэпсэухэрэр къыгъэлъэгъощт.
БэмышIэу лъэшэу зыгъэгушIогъэ къэбар къылъыIэсыгъ, ащ игъашIэ зэрэщытэу зэблихъункIи хъун.
Илъэс 29-рэ зыныбжь кIалэу, Налщык щыщэу, видеоджэгукIэхэр шIу зылъэгъурэр зэрэдунаеу щызэлъашIэрэ компьютернэ джэгукIэу зисценарий анахь дэгъоу непэ алъытэрэ сценаристым американскэ телеканал цIэрыIом пае ытхыгъэм ирежиссер хъугъэ.
«ДжэгукIэу The Last of Vs» («Одни из нас») зыфиIорэм сэри сырифанатыгъ. Ащ сыгу пэблэгъэ гупшысэхэр къыгъэущыхэу къыхэкIыгъ. Джы пшысэм сыхэтым фэд. СынасыпышIу. ШъузкIэхъопсырэм шъори шъулъыкIу, къыжъудэхъущт», — къыригъэхьагъ ащ иинстаграм. Къантемыр Iоф зыдишIэрэ продюсерэу, режиссерэу, медиа-менеджерэу Александр Роднянскэри а къэбарым ыгъэгушIуагъ. Режиссерхэр лъыгъэкIотэгъэнхэм ар тегъэпсыхьагъ, Iоф адешIэ. «Къантемыр режиссер дэгъу къодыеп, инджылызыбзэр ешIэ, ыгу гъашIэм фызэIухыгъ, арышъ, ащ къыхэхъухьэхэрэ зыми фэмыдэхэ хъугъэ-шIэгъакIэхэм афэхьазыр. БэшIагъэ ащ видеоджэгукIэр ыгъэуцунэу зыфэягъэр», — еIо ащ.
Сериалыр «Одни из нас» зыфиIорэ джэгукIэм ифэмэ-бжьымэ тетэу тырахыщт. Езыгъэблэгъэгъэ американскэ телеканалэу НВО-м хэхыгъэ фильмхэмрэ сериалхэмрэ къыгъэлъагъохэрэр. Америкэм изакъоу нэбгырэ миллион 40 фэдиз ащ еплъы. Хэгъэгу зэфэшъхьафи 150-мэ ипродукцие ащэфы. Сериалыр США-м щытырахыщт.
А. Роднянскэм макъэ къызэригъэIугъэмкIэ, сериалым итехын мэкъуогъум рагъэжьагъ, Къантемыр тырихырэ пычыгъохэр къэкIорэ илъэсым ыкIэм нэс аухынхэу мэгугъэх.
Сериалым къыIотэщтыр США-м щыхъушIэгъэ вирус щынагъом къэралыгъор зэрэзэхигъэтэкъуагъэр, ащ ыуж илъэс 20 текIыжьыгъэу контрабандистэу Джоэлрэ илъэс 14 зыныбжь пшъэшъэжъыеу Эллирэ хэгъэгур къызэпачынышъ, зыщыпсэунхэ чIыпIэ къабзэ зэрэлъыхъущтхэр ары. Гъогур къакIуфэкIэ ахэр къиныгъуабэмэ ахэфэх, щынэгъошхохэр зэпачых. «Одни из нас» зыфиIорэ сериалым «Игра престолов» зыфиIорэ телесериалым игеройхэр къэзышIыгъэхэ актерхэр хэтыщтых.
Кинорежиссерэу Бэлэгъэ Къантемыр ытамэхэр еушхух. Ифильмхэр цIыфхэм агу рехьых. Фигурнэ катаниемкIэ Олимпийскэ джэгунхэм япризерэу Евгения Медведевам сериалэу къыдэкIыщтым нахь шIэхэу еплъы зэрэшIоигъор къытхыгъ. Зэрэдунаеу агъэшIэгъон IофшIагъэ Къантемыр къыIэкIэкIынэу къыфэлъэIуагъ. Гъэзетэу «Нью-Йорк Таймс» икинокритикхэм «Дылдэ» илъэсым ианахь фильм дэгъухэм ахалъытагъ. «Форбсым» Къантемыр тапэкIэ гъэхъагъэхэр зышIын зылъэкIыщт ныбжьыкIэ 30-у илъэс 30 зыныбжьхэм ахилъытагъ. ИкIыгъэ илъэсым режиссер ныбжьыкIихэу зиIэпэIэсагъэкIэ къахэщыгъэхэм ащ ыцIэ ахатхагъ.
Къантемыр пэрыохъу гори къыфэмыхъоу, гухэлъышIоу иIэхэр зэкIэ къыдэхъунхэу тыфэлъаIо. «Гъогумаф» етэIо.
Шъаукъо Аслъангуащ.