Адыгеим ехьылIагъэм узыIэпещэ
Адыгэ Республикэм и Лъэпкъ музей икъэгъэлъэгъонэу «Адыгэхэр: Iэшэ-шъуашэхэр, шыухэр, дзэкIолIхэр» зыфиIорэр Кисловодскэ къыщызэIуахыгъ.
Хэгъэгум илъэпкъ проектэу «Культурэм» хэхьэрэ шъолъыр Iофэу «Творческэ цIыфхэр» зыфиIорэм ар щыщ. Кисловодскэ итарихъ музееу «ПытапIэм» къыщызэIуахыгъэ къэгъэлъэгъоныр гъэшIэгъонэу гъэпсыгъэ.
— Археологие пкъыгъохэм ижъырэ лъэхъаным ухащэ. Адыгэхэм ятарихъ ехьылIагъэхэм щыIэныгъэр зэрэлъыкIуатэщтыгъэр ахэолъагъо, — къытиIуагъ Адыгэ Республикэм и Лъэпкъ музей ипащэ игуадзэу Шэуджэн Налмэс. – Адыгэхэм яшэн-хабзэхэр, культурэ баеу яIэр, пэсэрэ лъэхъаным япсэукIэ зыфэдагъэр, фэшъхьафхэри Кисловодскэ къыщытэгъэлъагъох.
Тилъэпкъэгъухэм шъуашэу ащыгъыщтыгъэм, шыухэм, дзэкIолIхэм, Iашэу агъэфедэщтыгъэм, лIыгъэ зэрахьэзэ ячIыгу къызэраухъумэщтыгъэм яхьылIэгъэ къэгъэлъэгъоным уегъэгъуазэ.
Шэуджэн Налмэс зэхахьэм хэлажьэзэ анахьэу ынаIэ зытыридзагъэмэ ащыщ тилъэпкъ итарихъ нэбгырабэ къызэрэкIэупчIэщтыгъэр. — Пкъыгъо 248-рэ Кисловодскэ имузееу «ПытапIэм» къыщытэгъэлъагъо, — къеIуатэ республикэм и Лъэпкъ музей иIофышIэу Сихьаджэкъо Иринэ. — Типащэхэм яшIуагъэкIэ пэшIорыгъэшъ Iофыгъохэр игъом дгъэцэкIагъэх. Кисловодскэ тыщыIэу лъэпкъ зэфэшъхьафхэр гущыIэгъу къытфэхъугъэх. Адыгеим итарихъ нахь дэгъоу зэзыгъашIэ зышIоигъохэр гуфаплъэу къэгъэлъэгъоным еплъыгъэх.
Музееу «ПытапIэм» ипащэхэм зэхахьэм къыщаIуагъ шIэжьым, лъэпкъ культурэм яхьылIэгъэхэ къэбархэм мэхьанэу аратырэм зыкъызэриIэтырэр. Патриотическэ пIуныгъэм, шэн-хабзэхэм, дин зэфэшъхьафхэр зылэжьырэ лъэпкъхэу Адыгэ Республикэм щыпсэухэрэм, нэмыкIхэм афэгъэхьыгъэхэм узыIэпащэ.
Чъэпыогъум и 3-м нэс къэгъэлъэгъоныр Кисловодскэ имузей щыкIощт.