Адыгэ Республикэм кушъхьэфэчъэ спортымкIэ ихэшыпыкIыгъэ командэ хэгъэгум изэнэкъокъоу къалэу Пензэ щыкIуагъэм хэлэжьагъ.

Москва, Санкт-Петербург, Самарэ, Тулэ, Свердлов ыкIи Ростов хэкухэм, Адыгэ Республикэм, нэмыкIхэм япшъэшъэ командэхэр Пензэ щызэIукIагъэх. Мыжъо гъогум илъэс 15 – 16 зыныбжьхэр щызэнэкъокъугъэх.

Командэхэр километри 2-р анахь псынкIэу къызэракIущтым пылъхэу яIэпэIэсэныгъэ къагъэлъэгъуагъ.

Джэджэ районым зыщызыгъэсэрэ Арина Дикаяр, тренерыр Татьяна Андрющенко, Мыекъопэ районым щыщхэу Анна Радуненкэр, Мария Брюховар тренерэу Владимир Колоидис егъа­сэх. Къырым къикIыгъ Софья Сороколатовар. Адыгеим испорт еджапIэ пшъашъэхэр аштагъэхэу яIэпэIэсэныгъэ хагъахъо.

— Типшъашъэхэр хэгъэгум иныбжьыкIэхэм язэIукIэгъухэм чанэу ахэлэжьагъэхэу сэлъытэ, —къытиIуагъ Адыгэ Респуб­ликэм кушъхьэфэчъэ спортымкIэ и Федерацие ипащэу Анатолий Лелюк. —ПсынкIэу мэгупшысэх, шIыкIэшIухэр къызэда­гъоты.

Санкт-Петербург ихэшыпыкIыгъэ командэ километритIур зэкIэми анахь псынкIэу къыкIугъ, апэрэ чIыпIэр къыдихыгъ. Адыгэ Респуб­ликэм ипшъашъэхэм ятIонэрэ чIыпIэр къахьи, тыжьыныр къафагъэшъошагъ.

Сурэтым итхэр: хэгъэгум изэнэкъокъу хагъэунэфыкIырэ чIыпIэхэр къыщыдэзыхыгъэхэр.