Ермэлхьаблэ и Адыгэ Хасэ шахматхэмкIэ изэIухыгъэ зэнэкъокъу ешIэкIо 20 хэлэжьагъ.

Къэбэртэе-Бэлъкъарым, Къэрэщэе-Щэрджэсым, Ставрополь ыкIи Краснодар крайхэм, Адыгэ Рес­публикэм, Ермэлхьаблэ къарыкIыгъэхэр зэIукIагъэх.

Республикэ общественнэ движениеу «Адыгэ Хасэм» физкультурэмкIэ ыкIи спортымкIэ и Комитет ипащэу, Урысыем, Адыгеим язаслуженнэ тренерэу Хъот Юныс тикомандэ пэщэныгъэ дызэрихьагъ. Ащ зэри­лъытэрэмкIэ, шахматхэмкIэ зэ­нэкъокъур гъэшIэгъонэу кIуагъэ.

Ермэлхьаблэ и Адыгэ Хасэ итхьаматэу Шанэ Рэмэзан, Къэ­рэщэе-Щэрджэсым и Адыгэ Хасэ ыцIэкIэ Аслъэнэ Алый, фэшъхьафхэри зэхахьэм къыщы­гущыIагъэх, спорт лъэпкъ зэфэшъхьафхэмкIэ зэнэкъокъухэр тапэкIи зэхащэнхэу унашъо ашIыгъ.

Къэбэртэе-Бэлъкъарым къикIыгъэ ешIэкIо IэпэIасэу Къапэ Альберт Ермэлхьаблэ щыкIогъэ зэIукIэгъум апэрэ чIыпIэр къыщыдихыгъ.

Адыгэ Республикэм ихэшыпыкIыгъэ командэ хэтхэу КIыкI Людмилэ, МыгъолI Амэрбый, Бзэджэжъыкъо Заур хагъэунэфыкIырэ чIыпIэхэр къыдамыхыгъэми, яешIакIэ уигъэрэзэнэу щытыгъ.

Аслъэнэ Алый зэIукIэгъум къы­щиIуагъ Къэрэщэе-Щэрджэсым и Адыгэ Хасэ волейболымкIэ зэнэкъокъу зэхищэнэу зэрэрихъу­хьагъэр.

Адыгэ бэнакIэхэмкIэ Мыекъуа­пэ зэнэкъокъоу мыгъэ щыкIуа­гъэм Къыблэм, Темыр Кавказым ябатырхэр хэлэжьагъэх. Республикэ Адыгэ Хасэм итхьаматэу ЛIымыщэкъо Рэмэзан зэнэкъокъу зэфэшъхьафхэр зэхащэнхэу мурад зэрашIыгъэм тыщигъэгъозагъ.

Физкультурэмрэ спортымрэ апылъхэм япчъагъэ нахьыбэ ашIыным, псауныгъэр гъэпытэгъэным афэгъэхьыгъэ зэнэкъокъухэр нахьыбэ зэрэхъухэрэм тегъэгушIо.