Кипр – Урысыер – 0:2. Iоныгъом и 4-м Кипрэ щызэIукIагъэх. Къэлапчъэм Iэгуаор дэзыдзагъэхэр: Александр Ерохин – 6, Рифат Жемалетдинов – 55 – Урысыер.

2022-рэ илъэсым дунаим футболымкIэ изэнэкъокъоу кIощтым щешIэщт пэшIорыгъэшъ ешIэгъу­хэм ахэлажьэх. Купхэм апэрэ чIыпIэхэр къащызыхьыхэрэр Ка­тарэ кIэух зэIукIэгъухэу щызэхащэщтхэм ащешIэщтых.

Урысыем ихэшыпыкIыгъэ командэ итренер шъхьаIэу Валерий Карпиным зэрилъытэрэмкIэ, тиешIакIохэр нахьыбэрэ апэкIэ зэрилъыщтхэм пылъынхэ фае. Тикомандэ зэхъокIыныгъэхэм зэралъыхъурэм шIуагъэ къыфи­хьыгъ.

Федор Смоловыр зэхэщэкIо дэгъоу зэнэкъокъум къыщылъэгъуагъ. Ащ ыпэкIэ ытыгъэ Iэгуаом Александр Ерохиныр лъычъи, хъагъэм ридзагъ. Ф. Смоловым лъэдакъэкIэ ытыгъэ Iэгуаор Рифат Жемалетдиновым къызфигъэфедагъ. Кипрэ икомандэ икъэлапчъэ благъэу зекIум, ухъумэкIуитIур, къэлэпчъэIутыр ыгъэплъэхъугъэх, хъагъэм Iэгуаор ридзагъ.

ТиешIакIохэм 2:0-у зэIукIэгъур къахьыгъ, зэнэкъокъум апэрэ чIыпIэр щаIыгъ.

НэмыкI зэIукIэгъухэр

Словакиер – Хорватиер – 0:1. Словенииер – Мальта – 1:0. Израиль – Австриер – 5:2.

Адыгэ къуаджэу Кфар-Камэ щапIугъэ Натхъо Бибарс Израиль ихэшыпыкIыгъэ командэ икапитанэу ешIэгъум хэлэжьагъ.

Урысыер зыхэтыр

Командэхэм ешIэгъу тфырытф яIагъ. 1. Урысыер – 10 2. Хорватиер – 10 3. Словениер – 7 4. Словакиер – 6 5. Мальта – 4 6. Кипр – 4.

Урысыер непэ Мальтэ икомандэ Москва щыIукIэщт.