Адыгеим и ЛIышъхьэу КъумпIыл Мурат Урысыем монополием пэшIуе­кIогъэнымкIэ и Федеральнэ къулыкъу (ФАС) ичIыпIэ къутамэхэу Къы­блэ федеральнэ шъолъырым щыIэхэм яIэшъхьэтетхэм апае семинар-зэ­IукIэу щыIагъэм хэлэ­жьагъэхэм правительствэм и Унэ тыгъуасэ шIуфэс щарихыгъ. Ащ къырагъэблэгъагъэх Урысыем и ФАС ипащэ игуа­дзэу Нэлли Галимхановар, ФАС-м иструктурнэ подразделениехэм ялIыкIохэр.

ТхьамэфитIум къыкIоцI федеральнэ ыкIи шъолъыр къулыкъухэм ялIыкIохэр къыкIэлъыкIорэ Iофыгъохэм атегущыIэщтых: зэнэкъокъуныгъэм епхыгъэ зэзэгъыныгъэхэр зэрэзэ­дашIыхэрэр шапхъэхэм адештэ­хэмэ гъэунэфыгъэныр; агропромышленнэ комплексым ылъэныкъокIэ субсидиехэр зэрагъэфедэхэрэр; газымрэ электричествэмрэ аIэкIэгъэхьэгъэнхэмкIэ Iофыгъоу къэуцухэрэр.

Адыгеим и ЛIышъхьэ зэIукIэм хэлажьэхэрэм закъыфигъазэзэ къызэрэхигъэщыгъэмкIэ, гъэцэ­кIэкIо хабзэм икъулыкъухэмрэ ФАС-мрэ язэдэлэжьэныгъэ Уры­сые Федерацием и Пре­зидентэу Владимир Путиным иунашъохэу зэнэкъокъуныгъэм зегъэушъомбгъугъэным епхы­гъэхэр гъэцэкIагъэ хъунхэмкIэ мэхьанэшхо иIэу щыт. Ащ пае республикэм гъэхъагъэ хэлъэу щыпхыращых 2018-рэ илъэсым ФАС-мрэ АР-м иминистрэхэм я Кабинетрэ зэдэлэжьэныгъэу азыфагу илъыщтым фэгъэхьыгъэ Iофтхьабзэхэу аIапэ зыкIадзэ­жьыгъэхэр.

Урысыем и ФАС и ГъэIоры­шIапIэу Адыгэ Республикэм щыIэм ипащэу ХьэпэкIэ Аслъан къызэриIуагъэмкIэ, экономикэм иотраслэхэмкIэ планым къыди­лъытэхэрэр зэнэкъокъуныгъэм ихэхъоныгъэ илъэныкъо шъхьа­IэхэмкIэ гъэцэкIагъэ хъугъэх.

Адыгеим и ЛIышъхьэ пандемием къызыдихьыгъэ къины­гъо­хэм ядэгъэзыжьынкIэ мы зэ­Iу­кIэм зигугъу къыщашIырэ Iофыгъохэр зигъо Iофыгъохэу ылъы­тагъэх. Республикэм иэкономи­кэ зыпкъитыныгъэ хэлъэу та­пэ­кIи хэхъоныгъэ ышIыным ахэм яфэмэ-бжьымэ къытырехьэ.

«Илъэсэу икIыгъэм Адыгеим иэкономикэ лъэшэу къемыIыхыным тынаIэ тедгъэтыгъ. Анахь шъхьаIэр — къыддэхъугъэр къэ­тыухъумэным имызакъоу хэхъоныгъэм ипсынкIагъэ нахь зыкъедгъэIэтызэ лъыдгъэкIотэныр ары. Республикэм зэнэ­къокъу инэу илъым тимурадхэр къыддэхъунхэмкIэ ишIуагъэ къэ­кIощт. Предпринимательхэр джыри нахь гъэхъэгъэшIухэм къафэкIонхэмкIэ ащ фэдэ зэ­нэ­къокъуныгъэм мэхьэнэ гъэнэфагъэ иIэу щыт. IофшIэным ипроизводительность зыкъыIэтынымкIэ, инновациехэм хэ­хъоныгъэ ашIынымкIэ зэнэкъо­къуныгъэр лъэпсэшIу», — къы­Iуагъ АР-м и ЛIышъхьэ.

Урысыем и ФАС ыкIи ащ ипащэу Максим Шаскольскэм республикэм иIофыгъохэм язэшIохынкIэ яшIуагъэ къызэрэ­кIорэм пае зэрафэразэр КъумпIыл Мурат къыхигъэщыгъ, ащ дакIоу къэзэрэугъоигъэхэр ащи­гъэгъозагъэх Адыгэ Рес­пуб­ликэм социальнэ-экономикэ хэхъоныгъэу ышIыщтым и Стратегие илъэныкъо шъхьаIэхэм.

Ахэм зыкIэ ащыщ зекIоныр. Мы лъэхъаным зызыгъэпсэфынэу Адыгеим къакIохэрэм япчъагъэ нахьыбэ мэхъу, илъэ­сым нэбгырэ 500-м ехъу. Ар Адыгеим щыпсэухэрэм япчъагъэ шIокIы. Нахьыбэу джыри къэкIонхэмкIэ амалхэр щыIэх ыкIи 2024-рэ илъэсым ехъулIэу лыжэхэмкIэ къызщакIухьащт чIыпIэ дахэу агъэпсыщтым ишIуагъэкIэ ахэм ахэхъощт. Ащ нэмыкIэу Тэхъутэмыкъое райо­ным, Краснодар пэмычыжьэу, щагъэпсырэ индустриальнэ пар­кыр мыщкIэ амалышIоу хъущт. Предпринимательхэми ащ анаIэ къытырадзагъ. Нэбгырэ 30 фэдизмэ яшIоигъоныгъэхэр къа­Iуагъэх.

Адыгеим и ЛIышъхьэ къызэрэхигъэщыгъэмкIэ, а проектитIум яшIуагъэ къэкIощт ВРП-м зэрэпсаоу зэхъокIыныгъэ фэшIыгъэнымкIэ. Ащ нэмыкIэу мэкъу-мэщым ылъэныкъокIэ: республикэр зернэ лэжьыгъэхэм тIэкIу-тIэкIузэ къатекIынышъ, цумпэ лъэпкъхэм ядэлэжьэн техьащт, сыда пIомэ нахь федэ къыхэкIыщт. Республикэм и ЛIышъхьэ къызэри­IуагъэмкIэ, IофшIэным ипроизводительность зыкъегъэIэтыгъэ­нымкIэ, цIыфхэм ящыIэкIэ-псэу­кIэ нахьышIу шIыгъэнымкIэ а пстэуми яшIуагъэ къэкIощт.

«Джыри зэ къыкIэсэIотыкIы­жьы экономикэм зыкъедгъэIэтын, цIыфхэм ящыIакIэ нахьышIу тшIын зэрэфаер. ЗэкIэхэми тIэ зэкIэдзагъэу, зифедэ хэлъ лъэныкъо пстэуми ткIуачIэ зэде­тхьылIэнышъ, пшъэрылъэу тапа­шъхьэ итхэр зэшIохыгъэ зэрэ­хъущт екIолIакIэхэр къы­хэтхынхэ фае», — къыхигъэ­щыгъ КъумпIыл Мурат.

АР-м и ЛIышъхьэ ипресс-къулыкъу