УсэкIэ кIэлэцIыкIухэм адэгущыIэ
ШэкIо Абрек Урысые Федерацием гъэсэныгъэмкIэ иIофышIэ гъэшIуагъ, Красногвардейскэ район администрацием нахъыжъхэм я Советэу щызэхэщагъэм ипащэ игуадз. Республикэм щырагъэкIокIырэ Iофыгъо зэфэшъхьафхэм, анахьэу литературэм, бзэм, этнографием афэгъэхьыгъэ конференциехэм, Iэнэ хъураехэм чанэу ахэлажьэ. Лъэпкъым ишэн-хабзэхэм арыгъуазэхэзэ къыткIэхъухьэрэ тиныбжьыкIэхэр псэунхэм иIоф ищыIэныгъи икъэлэмыпи илъэс тIокIищым къехъугъэу фегъэIорышIэх.
[caption id="attachment_98226" align="aligncenter" width="800"] Абрекрэ ишъхьэгъусэу Хъэнятрэ.[/caption]«Абрек сыд ышIагъэми, ытхыгъэми ыгу имыкIэу къыдекIокIырэр тичIыгу, ти Адыгэ Республик, Урысыешхоу тызыщыпсэурэ къэралыгъошхор ары, ау ахэм зэкIэми якъежьапIэу, ыгу фэбагъэу илъ зэпытыр ежь икъуадж, ипсыхъу, ицIыфышIухэр ары». Гъыщ Нухь.
ЗэлъашIэрэ кIэлэегъэджэу, усакIоу, тележурналистэу ШэкIо Абрек, щыIэныгъэм зэрэщыхабзэу, ежь игъогу, ымэкъэ чан адыгэ литературэм къыщигъэнэфагъ. Зыщыщ къуаджэу Джамбэчыерэ ягъунэгъу псэупIэу Улапэрэ адэт гурыт еджапIэхэм якIэлэегъэджагъ, а еджэпIэ дэдэхэм япэщагъ, нэужым Красногвардейскэм дэт еджэпIэ-гимназиеу N 1-м илъэс 35-рэ щыригъэджагъэх. Абрек партийнэ Iофхэр зыщишIэгъэ илъэсхэри къыхэкIыгъ, район телевидениеми редакторэу щылэжьагъ.
1960-рэ илъэсым къыщегъэжьагъэу Абрек итхыгъэхэр гъэзетхэмрэ журналхэмрэ къащыхаутых. Ащ сыд Iоф зешIи ныбжьыкIэзэ зыпыщагъэ хъугъэ усэ тхыныр зэпигъэугъэп, гуетыныгъэ фыриIэу, гушхуагъэ хигъуатэу усэ зэхэлъхьан Iофыр лъегъэкIуатэ.
ШэкIо Абрек кIэлэеджакIохэм шIэныгъэ куу аригъэгъотыным дакIоу ахэм япIун-лэжьын лъэшэу ынаIэ тетыгъ. Адыгэхэм ятарихъ, ягъэшIэ гъогу мыпсынкIэ тэрэзэу алъигъэIэсыным, лъэпкъым игурышэ-гумэкIхэр, идунэееплъыкIэ, ишэн-хабзэхэр дэгъоу ягъэшIэгъэным игупшысэ зыдиIыгъ зэпытыгъ. Лъэпкъ зэхашIэ, лъэпкъ шIэжь яIэу ныбжьыкIэхэр пIугъэнхэм фэлэжьэрэ методическэ IэпыIэгъухэр къыдигъэкIыгъэх: «Унагъом сабый къихъуагъэмэ», «Гур орэкъабзэ, жабзэр орэдахэ». Адыгэ тарихъыр, адыгэ шэн-хэбзэ зэхэтыкIэхэр икъоу ыкIи куоу зэришIэхэрэр, лъэпкъ зэхэшIэ ин зэриIэр, ицIыф лъэпкъырэ ащ икультурэрэ зэрафэгумэкIырэр Абрек итхыгъэхэм къахэщы. Егъэджэн Iофым дыкIыгъоу лъэпкъ гъэсэныгъэм епхыгъэ Iофыгъо зэфэшъхьафхэр нахьышIоу зэхэщэгъэнхэм фэгъэхьыгъэ Iофтхьэбзабэхэм ащ Iоф адишIагъ, IофшIэкIэшIоу ыгъэунэфыгъэхэр къызщыриIотыкIырэ методическэ IэпыIэгъубэ къыдигъэкIыгъ.
ТхэкIо ныбжьыкIэхэм яIофшIагъэхэр зыдэт тхылъэу «КIочIэ зэикI» зыфиIорэм 1983-рэ илъэсым апэрэу ШэкIо Абрек иусэхэр къыдэхьагъэх. Ащ къыкIэлъыкIуагъэх ежь итхыгъэ щэхъу зыдэмыт тхылъ шъхьафэу къыдэкIыгъэхэ «ДахэкIэ сыпэгъокIы» (1996), «Тэтэжъ иш» (2000), «КъысфакIу, орэд» (2007), «Тыгъэнур» (2009), «Симаф» (2013) зыфиIохэрэр. ШэкIо Абрек лъэпкъ гъунапкъэхэр къызэринэкIыгъ. 2015-рэ илъэсым урысыбзэкIэ апэрэу А.А. Шипулиным зэридзэкIыгъэу ащ иусэхэр зыдэт тхылъэу «Песня ласточки» зыцIэр къыдэкIыгъ.
ШакIом итворчествэ, тхэкIо- усэкIо пстэуми зэряхабзэу, лъэныкъуабэ къызэлъеубыты. Арэу щытми, шIэныгъэлэжьэу Гъыщ Нухьэ итхыгъэ зэрэщыхигъэунэфыкIэу, «Абрек сыд ышIагъэми, ытхыгъэми ыгу имыкIэу къыдекIокIырэр тичIыгу, ти Адыгэ Республик, Урысыешхоу тызыщыпсэурэ къэралыгъошхор ары, ау ахэм зэкIэми якъежьапIэу, ыгу фэбагъэу илъ зэпытыр ежь икъуадж, ипсыхъу, ицIыфышIухэр ары».
Ихэгъэгу усакIом зэрипхырэр чIыпIэу къызщыхъугъэу, иапэрэ лъэбэкъу зыщидзыгъэ, нэрымылъэгъу зэпхыныгъэ пытэ зыдыриIэ и Джамбэчый. А чIынэлъэ цIыкIур ары ащ дунаир къыфызэIузыхыгъэр, щыIэкIэ гъогум тезыщагъэр. Гъунэ зимыIэ шIулъэгъу зыфыриIэ икъоджэ гупсэ епхыгъэу къыздырихьакIырэ гукъэкIыжьхэм ясурэт IупкIэу, иплъэгъукIэу усакIом къытхыхьэрэр:
Бгъашхъоу зиушхоу сызыфэусэрэр Си Лэбэ къаргъоу псымэ ялый. Гъэтхэ нэкIапэу къыкIэлъырысыр Ренэу ныбжьыкIэу си Джамбэчый.
ТхакIом ипоэзие лъэпсэ пытэ щаубытыгъ къоджэ псэукIэм, чIыопсэу ащ къешIэкIыгъэм ясурэтхэм, цIыф лэжьэкIо мышъхьахыжьхэм ягуетыныгъэ. Джащ фэдэх усэхэу «Сихэгъэгу ымакъ», «ЧIым сырицIыф», «Сикъуадж», «Сятэжъ икъужъэе чъыг» зыфиIохэрэр. УсакIор къэзыуцухьэрэ дунаир, ащ игъашIэ зыщыкIогъэ ихэгъуашъхьэ афэгъэхьыгъэ исатырэ пэпчъ ыгу шъыпкъэм къиджыкIэу гъэпсыгъэх.
ШэкIо Абрек ипоэзие гукIочIэ ин хэлъ. УсакIом иакъылышIуагъэ къыхэкIэу уахътэр зыфэдэр зэхифын, ащ хэхъухьэрэ-хэшIыхьэхэрэм уасэ афишIын елъэкIы. Ар щыIэкIэ-псэукIэу, зэхэтыкIэ-зэфыщытыкIэу цIыфмэ зэфыряIэм зэхъокIыныгъэу фэхъухэрэм алъэплъэ, гукIэгъури, зэфагъэри, нэхъоири, жъалымыгъэри, къэрарынчъагъэри гу чанкIэ зэхешIэ. Сыд Iофыгъо къыIэтыгъэми, усакIор гурэ-псэрэкIэ къыбдэгущыIэшъ, игукIаий зэхэошIэ. «Тинеущ гур фэузы» зыфиIорэ усэм къызэрэщиIорэмкIэ, тимафэхэр рэхьатхэу, зыпкъ титэу, гум ылэжьрэр яжьэм хэтымытакъоу, тызэдеIэжьызэ тыпсэуным къыфэджэ.
КIэлэегъэджэ IэпэIасэм ыкIуачIи, иуахъти ашъхьамысэу илъэс 35-рэ зыфигъэIорышIэгъэ сэнэхьатыр итворчествэкIи гушъхьэ-лэжьыгъэ къэкIуапIэу хъугъэ. ПIуныгъэ-гъэсэныгъэ сэнэхьатэу Абрек къыхихыгъэм къыпкъырыкIыгъэу плъытэн плъэкIыщт кIэлэцIыкIухэм апае усэхэр зыдэт тхылъхэу «Тэтэжъы иш», «Тыгъэнур», «Симаф», «Песня ласточки», «Я рисую» зыфиIохэу къыхаутыгъэхэр. ЦIыфымрэ къэзыуцухьэрэ дунаимрэ зэгопчынхэ умылъэкIынэу зэрэзэпхыгъэхэр сабыйхэм агуригъэIоныр гухэлъ шъхьаIэу тхакIом зыдиIыгъ. Усэхэу «Гъэтхэпэ маф», «Тыгъэгъаз», «ПсынэкIэчъ», «Жьыр орэкъабзэ» зыфиIохэрэм чIыопсым къыщыхъу- къыщышIэхэрэм сабыйхэр нэIуасэ афашIы. Усэу «Лъэужзефэхэр» зыфиIорэм тхакIом къыщеIо: «гъэтхэ мафэр гушIо къуапэу, тэ тымакъэ жьым еIэты, тиорэди пкIэшъэ тхьапэу, ошъо чапэм щэбыбатэ».
УсакIом анахьэу зызыфигъазэхэрэм ащыщ псэушъхьэхэр. Бжьэм, хьампIырашъом, чэтыжъыем, пцIэшхъо цIыкIухэм, чэтыум, хьэм, шым, тхьакIумкIыхьэм язекIокIэ-шIыкIэ-гъэпсыкIэхэр къыриIотыкIыхэзэ, кIэлэцIыкIухэм гурыIогъошIоу адэгущыIэн елъэкIы, ягулъытэ зыкъырегъэIэты, язэхашIэ егъэбаи, дэхагъэм фепIух, фегъасэх.
КIэлэеджакIохэр анахь зыпылъхэр, зыгъэгумэкIыхэрэр, зылъыплъэхэрэр, яIофшIакIэ, яеджакIэ щысэкIэ къызыщыриIотыкIырэ усабэ иI. Ахэм ащыщых «Симаф», «ЛэжьакIо сыхъугъ», «Сэ ныбджэгъу сиI», «Нанэ ихьалыгъу» зыфиIохэрэр. ГущыIэм пае, «Сыхъупхъэнэу зэкIэри фай» зыфиIорэр цIыфыр цIыфы зышIырэ шэн-зекIуакIэхэм уафэзыпIурэ гъэсэпэтхыдэх:
Сэ сыхъупхъэнэу ЗэкIэри фай, КъысаIо ренэу: — УмышIыкIай! Iэдэб зимыIэм, Бзаджэм себгъукIо. ЦIыфыгъэ зиIэм, Зафэм сылъэкIо.
ШэкIо Абрек бзэм, тарихъым, IорIуатэм, литературэм афэкъулай, цIыф зэхэтыкIэм фэIаз, шIэныгъэ дэгъу иI, зэхэщэкIо хьалэмэт. Бжьэм фэдэу чэщи мафи Iоф ышIагъ, бэ фызэшIокIыгъэр, гурыт еджапIэхэм нэбгыришъэ пчъагъэ ащыригъэджагъ. Учебникэу, методическэ IофшIагъэу иIэхэм тиеджапIэхэм ащырэлажьэх, иусэхэр кIэлэцIыкIу IыгъыпIэхэм апае къыдэкIыгъэ тхылъ зэфэшъхьафхэм адэхьагъэх. IофшIэным зыщамыдзыеу, шIыкIашIохэу сабыйхэр пIугъэнхэм Абрек иусэхэр тегъэпсыхьагъэх. Иусэ пэпчъ —гъэсэпэтхыд.
УсакIом къехьылъэкIырэп шъыпкъэIоныр, шIушIэныр. Ащ цIыф гъэсагъэхэу, тхакIохэу, Хэгъэгу зэошхом хэлэжьагъэхэу, орэдыIохэу, сурэтышIхэу, лэжьэкIо шIагъохэу шIукIэ, дахэкIэ зигугъу ышIыгъэр бэ. ИшэнкIэ цIыф рэхьат, Iэдэб ин хэлъ. 1980-рэ илъэсхэм экспедицие купэу Джамбэчые кIохэрэм сэри сахэтыгъ. Джащыгъум Абрек нахь благъэу нэIуасэ тыфэхъугъ, тызфэкIогъэ Iофхэр зызэшIотэх ужым ащ ядэжь тыригъэблэгъагъ. Непэ къызнэсыгъэм тыздэхьэгъэ щагоу чъыгхэмрэ къэгъагъэхэмрэ зыдизыр сынэгу кIэт. Тыплъэмэ, сэнэшъхьэ чIэгъым чъэт Iанэм бахъсымэр, къэбыр, лыр, нэмыкI адыгэ шхыныгъохэр тетых. Ащ пэмычыжьэу Абрек ишъхьэгъусэу Хъэнят Iэгу хьакум кIэрытэу стырыбзэу, пахъэр шъхьарихэу хьалыгъу гъэжъэгъэкIэ-шэплъыбзэхэу табэ инхэм арылъхэр къырихыжьыхэу тытефагъ. Мыщ пыдзагъэу къэсIон экспедицием ипащэу Хьанэхъу Руслъан ылъэгъугъэм ыгъэгушIуагъэу сурэт къызэрэтырихыгъэр, ар институтым ихъарзынэщ хэлъ. Джары ШэкIо Абрек иунэгъо зэкIужь дахэ иапэрэ зэIукIэгъоу сэркIэ хъугъэр. Зэшъхьэгъусэхэм ясабыйхэми, якъорэлъф-пхъорэлъфхэми апшъэрэ гъэсэныгъэ арагъэгъотыгъ. Непэ ахэр республикэм ицIыф IофшIакIох, нымрэ тымрэ агъэгушIохэу гукIэгъур, Iэдэбыр ахэлъэу яIофшIэн агъэцакIэ. Хъэнят РСФСР-м и Апшъэрэ Совет и Президиум и УказкIэ 1982-рэ илъэсым щытхъуцIэу «РСФСР-м изаслуженнэ кIэлэегъадж» зыфиIорэр къыфагъэшъошагъ.
ШэкIо Абрек гъэхъагъэкIэ фэтэлъэгъу, уфэгушIонэу тефэ тхылъ зэгъэпэшыгъэ-зэхэугъоягъэу «Антология современной детской литературы народов России» зыфиIоу 2017-рэ илъэсым къыдэкIыгъэм урысыбзэкIэ иусэ пшIыкIух къызэрэдэхьагъэр. Ащ цIыф лъэпкъ зэмылIэужыгъо 55-мэ ятхыгъэхэр дэтых.
А зэпстэур усакIоу ШэкIо Абрек творческэ гъогу занкIэ зэрэтетыр ыкIи ылъэ ащ зэрэтепытыхьагъэр къэзыгъэлъэгъорэ Iофыгъох. Илъэсыбэрэ кIэлэегъэджэ сэнэхьатыр щытхъу хэлъэу зыгъэцэкIэгъэ Абрек усэкIэ кIэлэцIыкIухэм адэгущыIэ, адыгабзэр аIуелъхьэ, яушъыи, игъэсэпэтхыдэ ахелъхьэ. Сабыйхэм ащ афитхыгъэ усэхэр еджэнхэкIэ псынкIэу, хъурэ- шIэрэр нафэу къизыгъэлъэгъукIырэ сурэтхэмкIэ гъэкIэрэкIагъэхэу, бзэ дэхэ, бзэ зэгъэфагъэкIэ тхыгъэх. Ахэр адыгэ лъэпкъ пIуныгъэр гъэлъэшыгъэным фэIорышIэх. Непи ШэкIо Абрек ипоэтическэ къарыу хэхъо, зеIэты, художественнэ зэфэхьысыжь инхэр ышIызэ, ежь илъагъо нафэу ыпэкIэ лъэкIуатэ.
Шъхьэлэхъо Дарико. Филологие шIэныгъэхэмкIэ кандидат.