Нартхэм ячIыгу щызэIукIэщтых
Адыгэ Республикэм илъэпкъ IэпэIасэхэм яIофшIагъэ щыIэныгъэм къыпкъырэкIы.
УяплъынкIэ дахэх, гъэпсыкIэу яIэр гурыIогъуае къыпщыхъоу къыхэкIы. Зэкъошныгъэм ипчэгу щыкIогъэ къэгъэлъэгъоным Адыгеим иIэпэIасэхэу хэлэжьагъэхэм куоу уагъэгупшысэ, уагъэгъуазэ.
Гостэкъо Руслъан, Уджыхъу Вячеслав, ТIэшъу Нурбый, Хьасанэкъо Хьамедэ пхъэм хашIыкIхэрэ пкъыгъохэр лъэгъупхъэх. Кушъэр, адыгэ Iанэр, унагъом ищыкIэгъэ хьа-къу-шыкъухэр, музыкальнэ Iэмэ-псымэхэр, нэмыкIхэри пхъэм хэшIыкIыгъэх.
— Iанэм тебгъэуцохэрэ лагъэхэм укъагъэукIытэжьыщтэп, — къытиIуагъ Гостэкъо Руслъан. — Сэрсэрэу лагъэр зыфэдэщтыр къыхэсэхы, цIыфхэм агу рихьыхэрэр къыдэсэлъытэх. Сисэнэхьат сшIогъэшIэгъон, бэшIагъэу сырэлажьэ.
IэпэIасэм иIофшIагъэхэм ащыгъуазэми, гукIэ зыфэзыщэигъэхэм ащыщ Адыгэ Республикэм лъэпкъ культурэмкIэ и Гупчэ ипащэу Бадый Къэплъан. Ащ игущыIэ кIэкIыгъ:
— Пхъэр IэпэIасэм «къегъэгущыIэ», — къытиIуагъ Бадый Къэплъан.
ПхъэкIычыр, кушъэр, нэпэеплъ сурэтхэр зыхэпшIыкIынхэ плъэкIыщтхэ чъыгхэр зэфэшъхьафых. Уджыхъу Вячеслав кIэлэегъаджэу Iоф ышIэзэ ригъаджэхэрэм къафиIуатэхэрэм къахигъэщырэр пкъыгъоу пшIыщтым гупшысэу фыуиIэр ары.
Хьасанэкъо Хьамедэ республикэ общественнэ движениеу «Адыгэ Хасэм» и Хэсашъхьэ хэт. IэпэIасэу зэрэщытыр ыгъэфедэзэ, Адыгэ Республикэм ихэхъоныгъэхэм, тарихъым, шэн-хабзэхэм, нэмыкIхэм афэгъэхьыгъэхэр иIофшIагъэхэм къащегъэлъагъох.
Дышъэ идагъэр, тхыпхъэхэр…
Бзылъфыгъэ IэпэIасэхэр щыIэныгъэр нахь дахэ шIыгъэным пылъых. Сетэ Сафыет, Гумэ Ларисэ, Цурмыт Рузанэ адыгэ шъуашэхэр адых, тхыпхъэхэр лъэпкъ шIэжьым рапхых. Гумэ Ларисэ гущыIэгъу зыфэхъугъэ кIэлэеджакIохэм IэпэIасэм иIофшIакIэ изакъоп къафиIотагъэр. Сэнэхьатым гукIэ уфэлажьэ зыхъукIэ, цIыфхэм шIу афапшIэ зэрэпшIоигъом IофшIэныр къыщебгъэжьэн фаеу Гумэ Ларисэ елъытэ.
Шъолъыр ыкIи дунэе фестивальхэм Сетэ Сафыет, Цурмыт Рузанэ, Гумэ Ларисэ, нэмыкIхэри ахэлажьэх, щытхъуцIэхэр къыдахэу бэрэ къыхэкIыгъ.
Джарымэкъо Зурыет, Битэ Азэ, Елена Абакумовам, Ольга Бреславцевам, нэмыкIхэм шIухьафтын пшIынхэ плъэкIыщтхэр дахэу ашIых. Теуцожь Фатимэ, Абрэдж Гощэфыжь адыгэ шэн-хабзэхэр, тарихъыр къыдалъытэхэзэ, шIыкIэшIухэр къагъотых. ИскусствэхэмкIэ еджапIэхэм яIофшIагъэхэр гъэшIэгъоных.
Республикэм исурэтышIхэу евгений Козловым, Ирина Погодинар, ШъэоцIыкIу Хьалимэт, КIэрэщэ Нурыет, Лариса Кочубинскаяр, фэшъхьафхэр къэгъэлъэгъоным хэлэжьагъэх. Адыгеим икъушъхьэхэм, псыхъохэм, зыгъэпсэфыпIэхэм, нэмыкIхэм яхьылIагъэхэ сурэтхэр гъэшIэгъоных.
Загъэхьазыры
Iоныгъо мазэм и 17 — 19-м «Нартхэм ячIыгу» зыфиIорэ фестивалэу Мыекъуапэ щыкIощтым Урысыем ишъолъырхэр хэлэжьэщтых.
«Урысыем каультурэмкIэ игрант» зыфиIорэр агъэфедэзэ, проектэу «Культурэм» хэхьэрэ фестивалыр игъэкIотыгъэу зэхащэщт. Адыгэ Республикэм культурэмкIэ и Министерствэ, республикэм лъэпкъ культурэмкIэ и Гупчэ, лъэпкъ творчествэмкIэ Уроысыем и Къэралыгъо Унэу В.Д. Поленовым ыцIэ зыхьырэр, нэмыкIхэри фестивалым изэхэщэкIо куп хэтых.
Адыгеим иIэпэIасэхэм яIофшIагъэ фестивалым дэгъоу къыщагъэлъэгъонэу, искусствэм хэхъоныгъэ фашIынэу афэтэIо.
ЕмтIылъ Нурбый.