Паралимпийскэ джэ­гунхэр Японием икъалэу Токио шы­шъхьэ­Iум и 24-м къы­щызэ­Iуахыгъэх.

1964-рэ илъэсым Паралим­пийскэ джэгунхэр Токио зыщэкIохэм спортсмен 375-рэ хэлэжьагъ, спорт лъэпкъи 9-кIэ зэнэкъокъугъэх. Спорт джэгунхэр нахь гъэшIэгъон мэхъух, зау­шъомбгъу. Токио спортсмен 4400-рэ къэкIуагъ, спорт лъэпкъ 22-мэ яIэпэIэсэныгъэ къащагъэлъэгъощт.

Зэпахырэ узым къыхэкIэу спортым пыщагъэхэу зэнэкъо­къум еплъы зышIоигъохэр Токио истадион дагъэхьащтхэп, тIысыпIэхэр нэкIэу щытыщтых.

Хэгъэгуи 163-рэ

Паралимпийскэ джэгунхэм хэгъэгуи 163-мэ яспортсменхэр хэлажьэх. Зэпахырэ узым къы­хэкIэу хэгъэгу 20 Токио къэ­кIуагъэп.

Урысыем испортсмен 220-м нахьыбэ Паралимпийскэ джэгунхэм яхьазырыныгъэ къащагъэ­лъэгъощт, спорт лъэпкъ 19-мэ ахэлэжьэщтых.

Къэралыгъом  и Быракъ

Урысыеми испортсменхэм тихэгъэгу и Къэралыгъо Быракъ Паралимпийскэ джэгунхэм аща­Iэ­тыщтэп, Быракъым чIэтхэу зэ­нэ­къокъухэм ахэлэжьэщтхэп.

Дунаим иантидопинговэ куп унашъо зэришIыгъэу, Урысыем испортсменхэм дунэе шапхъэхэр зараукъуагъэхэм фэшI агъэ­пщынэх.

Урысыем и Паралимпийскэ Комитет ибыракъ чIэтхэу тихэгъэгу испортсменхэр Паралимпийскэ джэгунхэм ахэлэжьэщтых.

Гимныр

Зэнэкъокъум дышъэ медалыр къыщыдэзыххэрэмэ афэгушIощтых, Къэралыгъом и Быракъ фаIэтыщт, Къэралыгъо гимныр къафырагъэIощт. Ар дунэе шапхъэу щыт. ЫпшъэкIэ къызэрэщытIуагъэу, антидопинговэ купым иунашъокIэ Урысыем испортсменхэр агъэпщынэх.

Композитор цIэрыIоу Чайковскэм иконцерт паралимпийскэ джэгунхэм къащырагъэIощт — къэралыгъом и Гимн ичIыпIэкIэ.

Урысыем и Паралимпийскэ Комитет ипрезидент иапэрэ гуа­дзэу Павел Рожковым къызэриIуагъэу, Иван Ларионовым иорэдэу «Калинкэр» Паралимпийскэ джэгунхэм къащырагъаIо шIоигъуагъ, Дунэе Паралимпийскэ Комитетым ар къафидагъэп.

ПэшIорыгъэшъэу зэрагъэунэфыгъэу, Урысыеми Къэралыгъо Быракъ къызыщагъэлъэгъон алъэкIыщтыр тиспортсменхэм шъуашэу ащыгъым сурэтэу тырашIыхьэрэр ары.

Спортсмен цIэрыIохэу Андрей Вдовиныр, Елена Паутовар, нэмыкIхэри зэнэкъокъум атлетикэ псынкIэмкIэ хэлэжьэнхэм фэхьазырых.

Адыгеим щыщхэр

Адыгэ Республикэм испорт­сменхэм ащыщ Паралимпийскэ джэгунхэм ахэлажьэрэп. ПэшIорыгъэшъ зэIукIэгъухэм апхырыкIынхэу хъугъэп.

КIэу хагъэхьагъэх

Бадминтоныр ыкIи тхэквондор зэнэкъокъум хагъэхьагъэх.

Паруснэ спортыр, футболыр паралимпийскэ джэгунхэм ахагъэкIыгъэх.

Паралимпийскэ джэгунхэр да­хэу Токио къыщызэIуахыгъэх. МэшIо топыр стадионым зэрэщыблэрэр зэкIэ къэлэдэсхэм алъэгъун алъэкIынэу гъэпсыгъагъэ.

ШышъхьэIум и 24-м зипсауныгъэ къеIыхыгъэхэм язэнэкъокъу рагъэжьагъ, Iоныгъом и 5-м зэфашIыжьыщт.