Орэдышъор агъэжъынчы
Урысыем кинематографиемкIэ и Къэралыгъо симфоническэ оркестрэ иконцерт Мыекъуапэ щыкIуагъ.
Адыгэ Республикэм и Къэралыгъо филармоние щызэхащэгъэ пчыхьэзэхахьэр Мишель Легран фэгъэхьыгъагъ. Экранышхоу филармонием къыщызэIуахыгъэм онлайн шIыкIэм тетэу концертыр къыщагъэлъэгъуагъ.
Оркестрэр дунаим щашIэ. 1924-рэ илъэсым Москва итеатрэу «Арсым» апэрэ концертыр оркестрэм къыщитыгъ, дирижерыр Давид Блок. Режиссерхэу Сергей Эйзенштейн, Всеволод Пудовкиным, Григорий Александровым, Иван Пырьевым яфильмхэм оркестрэм 1930 — 1940-рэ илъэсхэм музыкэр къащыригъэIуагъ.
Къыщытхъугъэх
«Война и мир», «Дерсу Узала», «Тыгъэм ыгъэпшъыгъэхэр», «Москва слезам не верит», нэмыкI фильмэхэм ямузыкэ оркестрэм ыгъэжъынчыгъ, шIухьафтынэу «Оскар» зыфиIорэр къыфагъэшъошагъ.
Илъэс зэфэшъхьафхэм дирижерэу щытыгъэх Юрий Силантьевыр, Юрий Николаевскэр, Георгий Гаранян, нэмыкIхэри.
Гурыт Азием ащагъ
Хэгъэгу зэошхом илъэхъан оркестрэр Гурыт Азием защэм, иIофшIэн зэпигъэугъэп. Кинофильмэ цIэрыIохэр техыгъэнхэм оркестрэм иIахьышIу хишIыхьагъ. 1944-рэ илъэсым Сергей Прокофьевым имузыкэ фильмэу «Иван Грознэм» пае тетхэгъэным, нэмыкIхэм ахэлэжьагъ. Заом ыуж дзэкIолIхэм афэгъэхьыгъэ фильмхэм ямузыкэ, зэлъашIэхэрэ фильмхэу «Кавказская пленница», «Бриллиантовая рука», «Операция «Ы» зыфиIохэрэм, «ПхъэнтIэкIу 12», фэшъхьафхэм ямузыкэ цIыфхэм алъигъэIэсыгъ.
Пащэр цIэрыIу
1993-рэ илъэсым къыщегъэжьагъэу Сергей Скрипкэ оркестрэм идирижер шъхьаI, ихудожественнэ пащ. Дунаим ар щыцIэрыIу. Урысыем инароднэ артист, Урысыем и Правительствэ ишIухьафтын къыфагъэшъошагъ 2013-рэ илъэсым Урысыем и Правительствэ и Грант оркестрэм къыфагъэшъошагъ.
Хэгъэгум икомпозитор цIэрыIохэу Исаак Дунаевскэм, Сергей Прокофьевым, Дмитрий Шостакович, Григорий Свиридовым, Евгений Догэ, Газиз Дугашевым, Дмитрий Хворостянскэм, Юрий Силантьевым, фэшъхьафхэм аусыгъэхэр оркестрэм къырегъаIох.
Эстрадэр, джазыр…
Оркестрэм нэбгырабэ хэтэу, артистхэр япчъагъэкIэ макIэ хъухэу орэдышъохэр къырегъаIох. Эстрадэ ыкIи джаз ансамблэу Iоф ышIэным фэхьазыр.
ОрэдыIохэу Этери Бериашвили, Ярослава Симоновар Мыекъуапэ щытлъэгъугъэ концертым хэлэжьагъэх. Музыкантхэу Михаил Ивановым, Андрей Ивановым, Антон Румянцевым, Александр Зингер, Игорь Назарук, фэшъхьафхэм пчыхьэзэхахьэр къагъэбаигъ.
Мишель Легран, нэмыкIхэм аусыгъэхэр филармонием щыIугъэх.
Урысыем культурэмкIэ и Министерствэ, Адыгэ Республикэм культурэмкIэ и Министерствэ, Адыгеим и Къэралыгъо филармоние зэхащэгъэ пчыхьэзэхахьэр хэгъэгум илъэпкъ проектэу «Культурэм» хэхьэ.
Оркестрэм уедэIузэ уегъэгъуазэ, дунэе музыкальнэ искусствэм нахь куоу ухещэ, щыIэныгъэм уфэгупшысэ.