Гандбол клубэу «Адыифым» иапэрэ ыкIи иятIонэрэ командэхэм зэдыряIэгъэ тренировкэм Адыгеим и ЛIышъхьэу КъумпIыл Мурат щыIагъ. Адыгэ къэралыгъо университетым спортымкIэ и Унэшхоу Кобл Якъубэ ыцIэ зыхьырэм Iофтхьабзэр щыкIуагъ.

Командэхэм яешIакIэ хьакIэ­хэм зарагъэлъэгъу нэужым республикэм и ЛIышъхьэ спорт­сменхэмрэ тренерхэмрэ гущыIэгъу афэхъугъ.

ЗэдэгущыIэгъум хэлэжьагъэх Адыгэ Республикэм физическэ культурэмкIэ ыкIи спортымкIэ и Комитет итхьаматэу Дэгу­жъые Мурат, гандбол клубэу «Адыифым» игенеральнэ директорэу Къудайнэт Мэджыд, Адыгэ къэ­ралыгъо университетым иректорэу Мамый Даут, Адыгэ къэ­ралыгъо университетым физическэ культурэмкIэ ыкIи дзюдомкIэ и Институт ипащэу Бгъуашэ Айдэмыр, командэу АГУ-«Адыифым» итренер шъхьа­Iэу Александр Реввэ, АГУ-«Ады­иф-2»-м итренерэу Яна Усковар.

Республикэм ипащэ гандболисткэхэмрэ тренерхэмрэ гущы­Iэгъу зафэхъум, Урысые Суперлигэм итурнирнэ таблицэ «Адыифым» чIыпIэу щиубытырэр нахьышIу шIыгъэнымкIэ гугъапIэу щыIэхэм анэсыгъэх. Илъэ­сэу икIыгъэм икIэуххэмкIэ клубым икомандэ шъхьаIэ я 11-рэ чIыпIэр ыIыгъ.

КъумпIыл Мурат къызэрэхи­гъэ­щыгъэмкIэ, апэрэ чIыпIэхэм затырагъэпсыхьан фае. Гъэхъэ­гъэшхохэр шIыгъэнхэм АдыгеимкIэ мэхьанэшхо иI, гандбол клу­бым ахъщэу пэIуагъахьэрэр нахьыбэ ашIы. Рес­пуб­ликэм ипащэ хьазыр тапэкIи спортсменхэм мылъку IэпыIэгъу аритынэу.

Спортым изаслуженнэ мастерэу, 2016-рэ илъэсым Рио- де-Жанейро щыкIогъэ Олимпиадэм ичемпионэу, 2019-рэ илъэсым дунэе чемпионатэу кIуагъэм джэрзыр къыщыдэзыхыгъэу, 2020-рэ илъэсым Токио щызэхащэгъэ Олимпийскэ джэгунхэм тыжьын медалыр къащызыхьыгъэ Виктория Калининами мыщ щыфэгушIуагъэх.

Республикэм и ЛIышъхьэ къызэрэхигъэщыгъэмкIэ, Адыге­ир арэгушхо «Адыифым» хэтхэм республикэм имызакъоу, зэрэхэгъэгоу яспортивнэ щытхъу гъэпытэгъэным яIахь зэрэхашIыхьагъэм.

«ТичIыпIэгъу цIэрыIохэм ащ фэдэ зэнэкъокъу инхэм текIоныгъэр къызэращыдахыгъэм тиспортсмен ныбжьыкIэхэр тапэкIи гъэхъагъэхэр ашIынхэм нахь тыригъэгушхуагъэх. Ахэм ящысэ кIырыплъыхэзэ, мафэ къэс зышъхьамысыжьхэу зыдэлэжьэжьхэмэ гъэхъэ­гъэшIухэм къафэкIощтых», — къыIуагъ Адыгеим и ЛIышъхьэ.

КъумпIыл Мурат спортсмен­кэм фэлъэIуагъ гъэхъэгъакIэхэр ышIынхэу ыкIи шIуфэс тхылъым­рэ ахъщэ шIухьафтынымрэ ритыгъэх Токио щыкIогъэ я 32-рэ гъэмэфэ Олимпийскэ джэгунхэм тыжьын медалыр къызэращихьыгъэм пае.

Мыщ дэжьым къэтIон: Виктория Калининар къалэу Мые­къуапэ къыщыхъугъ, Олимпиадэхэм ахэлэжьэщтхэр къызщагъэхьазырхэрэ спортивнэ еджапIэу N 1-м, Джэнчэтэ СултIан Мосэ ыкъом ыцIэкIэ щытым, зыщигъасэщтыгъ, Евгений Поповыр ары тренерэу иIагъэр. АГУ-«Адыифым» испортивнэ гъэхъагъэхэр щыригъэжьагъэх, ащ нэужым илъэс зэфэшъхьаф­хэм мы къыкIэлъыкIорэ командэхэм ахэтыгъ: ГК-53-м (Москва), «Звездам», (Звенигород), «Астраханочкам» (Астрахань), «Кубань» (Краснодар). 2020-рэ илъэсым жъоныгъуакIэм гандбол клубэу «Ростов-Доным» хэ­хьагъ.

Хэгъэгу спортым ихэхъоныгъэ иIахьышхо зэрэхишIыхьагъэм ыкIи спортымкIэ гъэхъэгъэ инхэр зэришIыгъэхэм апае Виктория Калининам Зэкъошны­гъэм иорден, орденэу «Хэгъэгум ыпашъхьэ гъэхъагъэу щыриIэхэм апай» зыфиIорэм имедалэу а 1-рэ шъуашэ зиIэр ыкIи Адыгэ Республикэм иапшъэрэ къэралыгъо тынэу — медалэу «Адыгеим и Щытхъузехь» зыфиIорэр къыфагъэшъошагъэх.

АР-м и ЛIышъхьэ ипресс-къулыкъу