Атлетикэ онтэгъум ылъэныкъокIэ зызыгъэсэрэ тиспортсменхэми тагъэгушIо. Европэм иныбжьыкIэхэм атлетикэ онтэгъумкIэ язэнэкъокъу Польшэм щызэхащагъ. Илъэс 13 – 17 зыныбжь пшъашъэхэр, кIалэхэр зэIукIэгъухэм ахэлэжьагъэх.

Адыгэ Республикэм атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм зыщызыгъэсэрэ Димитрий Шмариным тIоштэгъукIэ апэрэ чIыпIэр къыдихыгъ.

Д. Шмариным шIыкIэу рывокыр зегъэцакIэм кг 143-рэ къыIэти, килограмм 81-м нэс къэзыщэчыхэрэм якуп дышъэр къыщыдихыгъ. Толчокым кг 166-рэ къы­щиIэтыгъ. Республикэм ибатыр тIоштэгъукIэ кг 309-рэ къыIэти, Европэм дышъэ медалыр къыщихьыгъ.

ТIоштэгъукIэ Европэм апэрэ чIыпIэр къыщыдэзыхыгъэ батырыр Адыгэ къэралыгъо университетым и МГГТК иятIонэрэ курс щеджэ, спорт сэнэхьатым зыфегъасэ. Тренерхэу Денис Шмаринымрэ Сихъу Рэмэзанрэ Димитрий Шмариныр агъасэ. Щылычым ебэныгъэ Д. Шмариным, ащ итренерхэм, кIэлэегъа­джэхэм тафэгушIо.

ЕмтIылъ Нурбый.