Адыгеим и ЛIышъхьэу КъумпIыл Мурат терроризмэм пэшIуекIогъэнымкIэ Комиссиемрэ Адыгэ Республикэм щызэхэщэгъэ Оперативнэ штабымрэ язэхэсыгъо тыгъуасэ зэрищагъ.

Ащ хэлэжьагъэх Адыгэ Рес­публикэм и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, Адыгэ Республикэм хэгъэгу кIоцI IофхэмкIэ иминистрэу Иван Бахиловыр, Росгвардием и ГъэIорышIапIэу Адыгэ Респуб­ликэм щыIэм ипащэу Иван Гричановыр, ФСБ-м и ГъэIорышIапIэу Адыгэ Республикэм щыIэм ипащэ игуадзэу Зураб Бекботовыр, Адыгэ Республикэм ипрокурор игуадзэу Алексей Козачек.

Зэхэсыгъом анахьэу анаIэ зыщытырагъэтыгъэр Урысые Федерацием и Къэралыгъо Думэ, Адыгэ Республикэм и Къэралыгъо Совет – Хасэм ыкIи муниципальнэ образованиехэм ялIыкIо органхэм ядепутатхэм яхэдзынхэр щынэгъончъэу зэхэщэгъэнхэр ары.

АР-м и ЦИК итхьаматэу Сэмэгу Нурбый къызэриIуагъэмкIэ, мэкъэтыным имэфэ зыкI изыфэгъэхьазырын ыкIэм фэкIо. Къэ­ралыгъо Думэм идепутатхэм яхэдзын республикэм ыцIэкIэ кандидати 6 хэлажьэ, ахэм ащы­щэу зым ежь-ежьырэу зы­къы­гъэлъэгъожьыгъ. Адыгэ Республикэм и Къэралыгъо Совет – Хасэм идепутатхэм яхэдзын спискэхэмкIэ кандидат 295-рэ ыкIи зы мандат зиIэ койхэмкIэ кандидат 88-рэ атхыгъ.

Iоныгъом и 17-м къыщегъэ­жьагъэу и 19-м нэс хэдзын кампание 20 Адыгеим щыкIощт. Мафэ къэс пчэдыжьым сыхьатыр 8-м къыщегъэжьагъэу пчы­хьэм сыхьатыр 8-м нэс мэкъэ­тыныр кIощт. Хэдзынхэм ялъэ­хъан ипIалъэм къыпэу амакъэ атынэу е открепительнэ удостоверениехэмкIэ амакъэ атынэу щытэп, федеральнэ ыкIи шъо­лъыр хэдзынхэм «мобильный избиратель» зыфиIорэ шIыкIэр ащагъэфедэщт. Адыгэ Респуб­ликэм и ЦИК, чIыпIэ хэдзэкIо комиссии 9, участкэ хэдзэкIо комиссие 266-рэ хэдзынхэм языфэгъэхьазырынрэ язэхэщэн­рэ афэгъэзагъэх. Ахэр Iоны­гъом и 3-м яIофшIэн фежьэщтых. Тыгъуасэ типографием бюллетенхэр щагъэхьазырхэу рагъэ­жьагъ.

Хэбзэгъэуцугъэу щыIэр укъуа­гъэ мыхъуным пае Iофтхьабзэхэу зэшIуахыщтхэр рахъухьагъэх, IофшIэкIо купыр зэхащагъ, ведомствэхэм зэдэлэжьэныгъэу адыряIэщтымкIэ лъэныкъохэр агъэнэфагъэх. Адыгэ Респуб­ликэм хэгъэгу кIоцI IофхэмкIэ иминистрэу Иван Бахиловым ащ фэгъэхьыгъэу игъэкIотыгъэу къыIотагъ ыкIи къызэрэхигъэщыгъэмкIэ, хэдзакIохэм яфитыныгъэхэмрэ яфедэхэмрэ укъуа­гъэ мыхъунхэм пае цIыфхэм ялъэIу тхылъхэм япхыгъэ Iоф­тхьабзэхэр игъом зэрахьанхэм Iэшъхьэтетхэр зэкIэ фэхьазырынхэ фае. Общественнэ порядкэр къэухъумэгъэным пае полицием иIофышIэхэр, Урысые Федерацием и ФСВНГ и ГъэIорышIапIэу Адыгэ Республикэм щыIэр, народнэ дружинэхэм ыкIи унэе организациехэм ялIыкIохэр джащ фэдэу ащ хэлэжьэщтых.

Участкэ комиссиехэр зычIэт унэ 266-мэ язытет, джащ фэдэу ахэм къапэIулъ чIыпIэхэр ауп­лъэ­кIущтых, металлодетектор­хэмкIэ щынэгъончъагъэм изытет аушэтыщт. ХэдзыпIэ участки 139-мэ видеолъыплъэным икамерэхэр ачIагъэуцощтых, участки 127-мэ видеорегистрацием иамалхэр ащагъэфедэнхэ фаеу хъущт. Ащ нэмыкIэу хэбзэухъу­мэкIо къулыкъухэм, мэкъэтынымкIэ къызфагъэфедэщтхэ бюллетенхэм ягъэхьазырын окIофэ типографиехэр къаухъу­мэщтых.

Анахьэу хэушъхьафыкIыгъэу анаIэ зытырагъэтыщтхэр общественнэ порядкэр къэухъумэ­гъэныр, гъогухэр щынэгъончъэн­хэр, машIо къэмыхъуныр, санитарнэ-эпидемиологие шапхъэхэр мыукъогъэнхэр ары. Адыгеим и ЛIышъхьэ хэдзынхэм ахэлэжьэщт пстэуми вакцинированиемрэ ПЦР-тестированиемрэ япхыгъэ Iофтхьабзэхэр зэрищыкIагъэм тетэу зэхащэнхэу пшъэ­рылъ афишIыгъ.

«ЦИК-м фэдэу тэри хэдзынхэм язэхэщэнрэ якIонрэкIэ зэ­кIэми пшъэдэкIыжь тэхьы. Хэдзынхэр шъхьэихыгъэу, шъып­къагъэ ахэлъэу, тэрэзэу зэхэщагъэ хъунхэм, хэбзэгъэ­уцу­гъэу щыIэр мыукъогъэным апае зэкIэми ткIуачIэ зэдетхьылIэн фае», — къыхигъэ­щыгъ КъумпIыл Мурат.

АТК-м изэхэсыгъо джащ фэдэу щыхэплъагъэх дунэе террористическэ организациехэм цIыфыкIэхэр ахэщагъэ мыхъунхэмкIэ, терроризмэм ахъщэ IэпыIэгъу рамытынымкIэ ыкIи нэмыкI бзэджэшIагъэхэр зэрамыхьанхэмкIэ Iофтхьэбзэ гъэнэфагъэхэм язэшIохын иIофыгъо. МыщкIэ псалъэ къы­шIыгъ Урысыем и ФСБ Адыгэ Респуб­ликэмкIэ и ГъэIорышIапIэ ипащэ игуадзэу Зураб Бекботовым. Щынэгъо чIыпIэ имыфэнхэм пае электрон СМИ-хэм ямониторинг щыIэщт, Интернетыр къызфагъэ­федэщт, цIыфхэм гурыгъэIон Iофтхьабзэхэр адызэрахьащтых.

Муниципальнэ АТК-хэм ащыщ­хэм ятхьаматэхэм 2021-рэ илъэсым иапэрэ кIэлъэныкъо Iофэу ашIагъэм фэгъэхьыгъэу къаIотагъ.

КъумпIыл Мурат ведомствэ пстэуми къяджагъ зэхэсыгъом илъэхъан къыхагъэщыгъэ щыкIагъэхэм яуплъэкIункIэ зэдегъэштэныгъэ-зэгурыIоныгъэ къызхагъэфэнэу ыкIи уплъэкIун тедзэхэр зэхащэнхэу.