ИлъэсыкIэ еджэгъум епхыгъэ пшъэрылъхэр
Адыгэ Республикэм и ЛIышъхьэу КъумпIыл Мурат зэрищэгъэ зэхэсыгъоу терроризмэм пэшIуекIогъэнымкIэ Комиссиемрэ Оперативнэ штабымрэ зэдыряIагъэм анахьэу анаIэ зыщатырагъэтыгъэхэм ащыщых гъэсэныгъэ зыщарагъэгъотырэ организациехэр терроризмэм щыухъумэгъэнхэр ыкIи шIэныгъэм и Мафэ щынэгъончъэу кIоным япхыгъэ Iофыгъохэр.
Адыгэ Республикэм гъэсэныгъэмрэ шIэныгъэмрэкIэ иминистрэу КIэрэщэ Анзаур къызэриIуагъэмкIэ, шIэныгъэм и Мафэ очнэ шIыкIэм тетэу кIощт. Торжественнэ линейкэхэм ахэлэжьэщтых ублэпIэ классхэм арысхэмрэ еджапIэр къэзыухыхэрэмрэ. Мы лъэхъаным гъэсэныгъэм къыхиубытэрэ псэолъэ пстэуми зэрэхьазырхэмкIэ паспортхэр къаратыгъэх. Адыгеим гъэсэныгъэмкIэ иорганизациехэм ачIагъэуцуагъэх полицием псынкIэу макъэ рагъэIуным фытегъэпсыхьэгъэ кнопкэхэр, машIом зыкъыштэным ищынагъо щыIэ хъумэ макъэ зэрарагъэIущт ыкIи видеолъыплъэным епхыгъэ амалхэр. ТIэкIу-тIэкIузэ республикэм иеджапIэхэр унэе предприятиехэу цIыфхэм якъэухъумэн фэгъэзагъэхэм ащылажьэхэрэм къагъэгъунэнхэм тыращэщтых.
Росгвардием и ГъэIорышIапIэу Адыгэ Республикэм щыIэм ипащэу Иван Гричановым къызэриIуагъэмкIэ, гъэсэныгъэм къыхиубытэрэ псэуалъэхэр зэкIэ ауплъэкIугъэх, полицием макъэ зэрэрагъэIущт кнопкэхэм язытет зыфэдэр зэрагъэшIагъ. Зэхэубытагъэу къэпIон хъумэ, еджапIэхэр ухъумэгъэнхэм ылъэныкъокIэ IофшIэныр нахьышIоу зэхэщагъэ хъугъэ. Гъэсэныгъэм ипсэуалъэхэр Росгвардием ивневедомственнэ къэухъумэн ипультхэм апашIэх. Организациехэм ащылажьэхэрэм гумэкIыгъо-щынагъо къызщыхъурэм зэрэзекIонхэ фаер къафаIуатэ, шапхъэхэр мыукъогъэнхэм анаIэ тырарагъадзэ. МэфэкI Iофтхьабзэхэр къызщыблагъэхэрэм къулыкъу гъэнэфагъэхэм чIыпIэхэу ахэр зыщыкIощтхэр ауплъэкIух. ШIэныгъэм и Мафэ гъэсэныгъэм къыхиубытэрэ псэуалъэхэм патрулым иIофшIэн нахь ащагъэлъэшыщт. Республикэм ипащэ пшъэрылъ къафишIыгъ илъэсыкIэ еджэгъум гъэсэныгъэр нахь тэрэзэу, лъэныкъо пстэури къыдэлъытагъэу зэхащэнэу: зэкIэми анахь шъхьаIэр кIэлэеджакIохэм ящынэгъончъагъэрэ гъэсэныгъэр лъэгэпIэ иным тетэу зэхэщагъэ хъунымрэ анаIэ атырагъэтыныр ары. КIэлэцIыкIухэр зэрагъашхэхэрэм анаIэ нахь тырагъэтын, Адыгэ Республикэм и ЛIышъхьэ цIыфхэм зыкъызэрэфагъазэрэ Iофыгъохэр зэшIохыгъэнхэм ылъэныкъокIэ щыкIагъэу щыIэхэр дагъэзыжьынхэ фае.
«Егъэджэным ылъэныкъокIэ амал дэгъухэр щыIэнхэ, еджапIэхэр ыкIи кIэлэцIыкIухэр щынэгъончъэнхэм имызакъоу, гъэсэныгъэри ищыкIэгъэ лъэгапIэм тещэгъэн фае. Ащ пае амалхэр щыIэх, сэнаущыгъэ зыхэлъ кIэлэцIыкIухэм Iоф адэзышIэрэ цIыф хъупхъэхэри тиIэх. Сэнаущыгъэ зыхэлъ кIэлэцIыкIухэу тиIэхэм нахь хэхъоныгъэ ашIынымкIэ Iофтхьабзэу зэшIотхыхэрэм яшIуагъэкIэ Урысые олимпиадэхэу илъэси 6-м къыкIоцI щыIагъэхэм язэфэхьысыжьхэр зашIым, шъолъырхэм азыфагу Адыгеим я 25-рэ чIыпIэр щиубытыгъ, Урысыем и Къыблэ пштэмэ, шъолъырхэм яапэрэ чIыпIэхэр зыубытыгъэхэм ар ахэфагъ. Олимпиадэхэм текIоныгъэхэр къащыдэзыхыхэрэр, ахэр зыгъэхьазырхэрэ кIэлэегъаджэхэр кIэгъэгушIугъэнхэ фае. Гъэсэныгъэ тедзэр нахь дэгъоу зэхэщэгъэным шъуишъыпкъэу шъудэлажь», — къыхигъэщыгъ КъумпIыл Мурат.
АР-м и ЛIышъхьэ ипресс-къулыкъу