КIэлэцIыкIу лъэпкъ къэшъокIо ансамблэу «Мыекъуапэ инэфылъэхэр» Адыгэ Республи­кэм имэфэкI зэхахьэхэм ча­нэу ахэлажьэ.

Урысыем и Къэралыгъо Быракъ и Мафэ фэгъэхьыгъэ зэIукIэгъухэм «Мыекъуапэ инэфылъэхэр» ащыуджыгъэх, адыгэ къа­шъохэр къыщашIыгъэх.

Шахые Джэнэт, Бэгъушъэ Самирэ, ТIы­псэкъо Алинэ, Бэрэгъэщтэ Дамир, НэмытIэкъо Аскэр, ЕхъулIэ Альмир, нэмыкIхэри ансамблэм дахэу къыщышъуагъэх.

— Шъолъырхэм яфольклор фестивалэу «Нартхэм ячIыгу» зыфиIорэр Iоныгъо мазэм и 17 — 19-м Мыекъуапэ щыкIощт. Лъэпкъхэр зэфэзыщэрэ Iофтхьабзэм зы­фэтэгъэхьазыры, — къытиIуагъ «Мыекъуапэ инэфылъэхэм» яхудожественнэ пащэу, Урысыем культурэмкIэ изаслуженнэ IофышIэу, Адыгэ Республикэм инароднэ ­артистэу, Къэбэртэе-Бэлъкъарым изаслуженнэ артистэу Нэныжъ Айдэмыр. — ­Адыгэ шэн-хабзэхэм яхьылIэгъэ лъэпкъ къашъоу дгъэуцугъэр фестивалым апэрэу къыщыдгъэлъэгъощт.

Ансамблэр адыгэ шъуашэм и Мафэ хэлэжьэщт. Лъэпкъ шъуашэм имэфэкI Iоныгъом и 28-м Адыгэ Республикэм имызакъоу, Урысыем ишъолъырхэм, тилъэпкъэ­гъухэр зыщыпсэурэ хэгъэгухэм ащыхагъэу­нэфыкIыщт.

Къалэу Мыекъуапэ, Адыгэ Республикэм ямафэхэм «Мыекъуапэ инэфылъэхэр» ащытлъэгъущтых. Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ мэфэкI зэхахьэхэм лъэпкъ къашъохэр ансамблэм къащишIыщтых.

Хэгъэгум иансамблэхэм язэIукIэгъушхоу Москва тыгъэгъазэм щыкIощтым «Мые­къуапэ инэфылъэхэр» рагъэблэгъагъэх.

Ансамблэм хэт къэшъуакIохэр еджэх, сэ­нэхьатэу къыхахыщтым зыфагъасэ. Искусствэр ашIогъэшIэгъон, ягуапэу зэхахьэхэм къащэшъох.