Апэ ишъын имурад
2021 — 2022-рэ илъэс зэнэкъокъур рагъэжьэным ыпэкIэ Мыекъопэ баскетбол командэу «Динамо-МГТУ-м» итренер шъхьаIэу Андрей Синельниковым гущыIэгъу тыфэхъугъ.
— Чъэпыогъум и 9-м лъэс ешIэгъур тыублэщт, — къытиIуагъ Адыгэ Республикэм изаслуженнэ тренерэу Андрей Синельниковым. — Егъэджэн ыкIи зыгъэсэн зэIукIэгъухэр шышъхьэIум, Iоныгъом тиIэщтых.
— Андрей, апэу тыкъызкIэупчIэ тшIоигъор гъэзетеджэхэм ягумэкIхэр ары. Хэта хэкIыжьыгъэр, кIэу шъуштагъэр?
— Нахь тызыгъэгугъэхэрэ ешIакIохэр «Динамо-МГТУ-м» къыхэнагъэх. Гапошин Артем, Еремин Николай, Кочнев Юрий, Чичайкин Владимир, Милютин Александр тиешIэкIо анахь дэгъухэм ащыщых.
— Нахь ныбжьыкIаIохэм къатегущыIэба.
— Суслов Давид, Рябов Юрий, Чаленко Даниил, Степаненко Сильвестер блэкIыгъэ илъэс ешIэгъум командэм хэтыгъэх.
Адыгэ къэралыгъо университетым физкультурэмрэ дзюдомрэкIэ и Институт чIэхьагъ ешIэкIо ныбжьыкIэу Воротников Захар. НатIэкъо Мэдинрэ Горохов Данилрэ бэмышIэу командэм тштагъэх.
— Баскетболым хэгъозэгъэ ешIэкIо дэгъу «Динамо-МГТУ-м» шъуштэнэу зэ къытэпIогъагъ.
— Зэхэщэн Iофыгъохэр тэгъэцакIэх. ЕшIакIом ыцIэ къесIощтыгоп. Мэфэ заулэ тедгъашIэмэ нахьышIу.
— Андрей, пшъэрылъэу «Динамо-МГТУ-м» зыфишIыжьыгъэм гъэзетеджэхэр къыкIэупчIэх.
— Ар упчIэ дэгъу. 2021 — 2022-рэ илъэс зэнэкъокъур къекIокIыгъуи 4 мэхъу. БлэкIыгъэ илъэс ешIэгъур къекIокIыгъуи 2 хъущтыгъэ. ПэшIорыгъэшъ зэIукIэгъухэм ауж апэ ишъыгъэ команди 6-р медальхэм афэбэнэщтых. «Динамо-МГТУ-р» апэрэ чIыпIи 6-р зыхьыщтхэм ащыщ хъун фаеу тэлъытэ.
— Медальхэм шъуафэбэнэщта?
— Тафэбэнэщт. Ар типшъэрылъ шъхьаIэу зэрэщытыр хэушъхьафыкIыгъэу къэсэIо.
— Купым хэтхэм сыда къяпIолIэщтыр?
«Барнаул» суперлигэм иапэрэ куп щешIэнэу фитыныгъэ къыдихыгъ. «Новомосковскэр» ятIонэрэ купым кIэу къыхэхьагъ. Дэгъоу тешIэщт, тащыщынэрэп.
— Илъэс ешIэгъур чъэпыогъум и 9-м ежъугъэжьэщт.
«Динамо» Ставрополь чъэпыогъум и 9 — 10-м Мыекъуапэ тыщыIукIэщт. ТиешIэгъухэр спорт Унэшхоу «Ошъутенэм» щыкIощтых.
— ЕшIэкIэ дэгъу къэжъугъэлъэгъонэу, шъуимурадхэр къыжъудэхъунхэу шъуфэсэIо.
— Тхьауегъэпсэу.