Адыгэ Республикэм испорт иветеранэу Анатолий Зуевым шIэ­жьым, пIуныгъэм афэгъэхьыгъэу гущыIэгъу тыфэхъугъ.

— Илъэс 47-рэ Адыгеим испорт Iоф щысшIагъ, — къеIуатэ Урысыем физкультурэмкIэ ыкIи спортымкIэ хэхъоныгъэ ышIы­ным иIахь зэрэхишIыхьагъэм фэшI Урысыем ирэзэныгъэ тамыгъэ къызыфагъэшъошагъэу, Адыгэ Республикэм физкультурэмкIэ ыкIи спортымкIэ изаслуженнэ IофышIэу Анатолий Зуевым. — Пенсием сыщыIэми зэхахьэхэм, спорт зэIукIэгъухэм сахэлажьэ.

— Псауныгъэм игъэпытэн фэгъэхьыгъэу кушъхьэфэчъэ спортымкIэ Мые­къуапэ щыкIогъэ Iофтхьабзэм ущытлъэгъугъ.

— Кушъхьэфэчъэ спортыр сыгу рехьы. 1964 – 1970-рэ илъэсхэм Адыгеим ихэшыпыкIыгъэ командэ тыхэтэу Краснодар краим, СССР хэгъэгушхоу тиIагъэм язэнэ­къо­къухэм тахэлажьэщтыгъ. Виталий Рогачевыр, Сергей Вороновыр, нэмыкIхэри тикомандэ гъэхъагъэ ышIыным фэбанэщтыгъэх. Анатолий Васильевыр тренерэу тиIагъ.

— Кушъхьэ­фэ­чъэ спортыр къы­хэшъухыным хэта кIэщакIо фэ­хъугъагъэр?

— Спортым шэн­-зекIуакIэхэр епсыхьэх, кIуа­чIэр егъэпытэ. Зэныбджэгъухэм зэдедгъашти, тшIо­гъэшIэгъонэу тлъытэрэр къыхэтхыгъагъ. Ащ фэ­дэ лъэхъаным тренерым, зэгурыIоныгъэу зэныбджэгъухэм къа­хафэрэм кIуа­чIэ къыпхалъхьэ.

— Зэныбджэгъухэр сыда зэфэзыщэщтыгъэхэр?

— Шэн-хабзэхэр зетхьэщтыгъэх. Тутын ешъорэ къытхэтыгъэп. Тиуахътэ кIалэхэм яза­къоп тутыным пыщагъэ хъухэрэр. Пшъа­шъэхэр Мыекъуапэ иурам шъхьаIэхэм, зыгъэ­псэфыпIэ паркым, нэмыкIхэм тутын ащешъохэу тэлъэгъух. Тутыным зэрарэу къафихьырэр зэгорэм къагурыIожьыщтэу зылъытэхэрэр сэгъэмысэх. Непэ ятIон, зэхядгъэшIыкIын фае унагъо ихьащт пшъашъэхэм, кIалэхэм тутыныр псауныгъэм ипыеу зэрэщытыр.

— Спорт еджапIэхэм илъэсыбэрэ Iоф ащыпшIагъ. УафызэплъэкIыжьмэ сыда къахэбгъэщырэр?

— Тыркоо Къэлэшъао зипэщэгъэ спорт еджапIэм сигуапэу Iоф щысшIагъ. Кобл Якъубэ сыригъусэу дзюдомкIэ тибэнакIохэм спортышхом гъэхъагъэ зэрэщашIыщтыгъэр егъашIи сщыгъупшэжьыщтэп.

— Щысэ къытфэпхьы тшIоигъу.

— Владимир Невзоровым, Емыж Арамбый, Лъэцэр Хьазрэт, Владимир Дутовым, Хьэпэе Арамбый, Гостэкъо Хьумэр, Мэрэтыкъо Сахьид, Аристотель Спировым, Тао Хьасанбый, нэмыкIхэм афэдэ бэнакIохэр зыщапIугъэхэ еджапIэм Iоф щыпшIэ зыхъукIэ гупшысэу пшIырэр цIыфым ипIун, игъэсэн къащежьэ. Хьасаныкъо Мурат Урысыем 19, дунаим 11 дышъэ медальхэр къащихьыгъэх, Урысыем и Къэралыгъо Думэ идепутат. Кобл Якъубэ лъапсэ зыфишIыгъэ бэнэпIэ еджапIэр дунаим щашIэ, ащ уегъэгушхо. Сэри спорт еджапIэм илъэси 10 сырипэщагъ, гъэхъагъэу тиIэр цIыфхэм ашIэ.

— Кушъхьэфэчъэ спортымкIэ Мыекъуа­пэ щыкIогъэ зэIукIэгъум узэрэхэлэжьагъэм сыда къепIолIэщтыр?

— Зэхахьэм хэлэжьагъэхэм анахьыжъыр сэры, илъэс 75-м сыныбжь ехъугъ. ЗэIукIэгъу­хэр илъэс къэс зэрэзэхащэхэрэм, ти ЛIы­шъхьэу КъумпIыл Мурат, хэбзэ къулыкъу­шIэхэр, ныбжьыкIэхэр бэ хъухэу зэрэхэла­жьэхэрэр тигуапэ.

— Зэхахьэр шIукIэ угу къинэжьыщтэу олъытэба?

— Урысыем кушъхьэфэчъэ спортымкIэ и Федерацие ипэщэ шъхьаIэу Юрий Кучерявэр, Адыгеим кушъхьэфэчъэ спортымкIэ и Федерацие ипащэу Анатолий Лелюк, Урысыем щызэлъашIэрэ журналистэу Андрей Кондрашовыр, физкультурэм пылъхэр гуфэбэныгъэ ахэлъэу къызэрэсфэгушIуагъэхэр, зэхахьэм щыслъэгъугъэхэр сщыгъупшэщтхэп.

— Уиныбджэгъухэм, нэIуасэхэм зэха­хьэм ехьылIагъэу сыда къыуаIуагъэр?

— ПIуныгъэм фэлэжьэрэ Iофтхьабзэхэр ашIогъэшIэгъоных, тищыкIагъэхэу алъытэ. ЗэхэщакIохэм «тхьашъуегъэпсэу» ясIожьы сшIоигъу. ШIухьафтын лъапIэхэр къытфашIыгъэх. Физкультурэм, спортым цIыфхэр зэфащэх, псауныгъэр зыгъэпытэхэрэм япчъа­гъэ хэхъо — ар гушIуагъо. Сыфай нэмыкI спорт лъэпкъхэмкIи зэIукIэгъу гъэшIэгъонхэр нахьыбэрэ зэхащэнхэу.

— УигухэлъышIухэр къыбдэхъунхэу пфэтэIо.

— Тхьауегъэпсэу.

Сурэтым итхэр: зэхэщакIохэр Анатолий Зуевым къыфэгушIох.