Ипоэзие щигъэшIуагъэр илъэпкъ
ЩыIэныгъэр зыфэдэр ежь имафэ пэпчъкIэ зэхэзышIэгъэ цIыф шъэбэ сакъэу, Iушэу щытыгъ КъумпIыл Къадырбэч. Ащ гъунэнчъэу илъэпIагъ гъашIэр, цIыфхэр ыкIи Хэгъэгур.
Иусэу зыкIэхъопсыщтыгъэр зэрэфаеу бгъэгум къыдэкIы зэхъум, КъумпIыл Къадырбэч икIэсэ Хэгъэгур, илъэпIэ цIыфхэр, икъуаджэ, къешIэкIыгъэ чIыопсым идэхэгъэ мыухыжь, ным ишIушIэ иинагъэ, игукIэгъу гъунэнчъэ, тыр зэрэлъапсэр, быным имызакъоу, лIакъом, лъэпкъым, Хэгъэгум хъулъфыгъэр пкъэу пытэу зэряIэр, КъумпIыл Къадырбэч игупшысэ, ипоэзие дэгъу дэдэу къащыриIотыкIыгъ. УсакIом идунэееплъыкIэ-гурыIуакIэкIэ, илирикэ шъабэкIэ игупшысэ тхылъеджэхэм алъигъэIэсыныр фызэшIокIыгъ.
Сыоплъы зэпыты шъхьакIэ, сидунай, ЗызгъэплъэкIыныр зыкIи сымылъэкI, Сэ сыгу дэхъыкIырэр боу къэIогъуай, О уидэхагъэ хъишъэ зэхакI.
Уизылъэныкъо хыр щэбыжъуатэ, Хыбзыу пэпсыгъом зыщегъэтэмэшху. КъокIыпIэр пIонышъ, тыгъэр къыщэуатэ, КъохьапIэм мэзыр ащыпкъэушху.
Уихьэлэлыгъэ гъунэ имыI. ЦIыфым урий о, ащ уфыщыI. Фитэу къыдэIабэ уидышъэ пхъуантэ, Насыпыр, тхъагъор, чэфыгъор пхегъуатэ. («Сыоплъы зэпыты шъхьакIэ…»)
Гупшысэр зинэрыгъым усэр къыфэкIо хабзэ. Пасэу, Улэпэ гурыт имыкъу еджапIэм щеджэзэ, адыгэ жэрыIо творчествэм дихьыхэу, урыс классикхэм атхыхэрэм ыкIи адыгэ тхэкIо нахьыжъхэу КIэращэм, Хьаткъом, Цэим, Пэрэныкъом, Жанэм, нэмыкIхэм атхыгъэхэр бэрэ, бэрэ зэпыригъазэщтыгъэх; мызэу, мытIоу ыгу рихьырэ чIыпIэхэр кIиджыкIыжьыщтыгъэх, аузэ, гущыIэм, ныдэлъфыбзэм кIочIэ гъэшIэгъон зэрахэлъым гу лъитэ мэхъу. ИгузэхашIэхэр нахь къэзгъэтIасхъэщтыгъэхэр икъуаджэ итеплъ, лэжьэкIо цIыф хьалэлхэр, исабыигъо-кIэлэгъу зэпхыгъагъэхэу псыхъохэу Лабэрэ Улэрэ, гъэмэфэ ыкIи бжыхьэпэ мазэхэм гъунэгъу мэзым зэрэкIощтыгъэр… Мы дунэе дэхэ зэгъэфагъэу къешIэкIыгъагъэр мыхъугъэмэ, кIалэр усэным къыфэмыущыныгъэкIи хъун. Ау а зэкIэми етIани къахэхъуагъ исабыигъом бэрэ зыкIэдэIукIынэу хъугъэ тхыдэхэр, таурыхъхэр, пшысэхэр, джащыгъум ежь кIалэми ыбзэ къытIэтагъ, псынэкIэчъ къаргъоу къыIуиутыгъ. Пчэдыжьыпэ-пчыхьэшъхьапэм ядэхэгъэ-кIэрэкIагъэу гур зыпхъуатэрэр ары КъумпIыл Къадырбэч ипоэтическэ творчествэ къежьапIэ фэхъугъэхэр. Ежь кIалэр арымэ, фэчэфыгъ щыIэныгъэм, фэрэзагъ дунэе дахэм.
Опсау, природэр, опсау, псэ спытэу дунаем цIыфэу сыкъытебгъэхъуагъэшъ! ПIапэ сигуапэу сэубыты пытэу, Iэ кIочIэшхуитIур къызгобгъэкIагъэшъ.
МэкъумэщышIэ унагъо къихъухьагъ, щапIугъ усакIор. Арышъ, ыгукIэ анахь илъапIэр дунаир зыгъэдэхэрэ, зыIэтырэ цIыфыр ары. Ар зэрилъэкIэу иусэ сатырхэм ащегъашIо.
Тэ джары тызэрэпсэурэр, Ныбджэгъур, дэгъоу зэгъашIэ. Iоф зышIэу, IофкIэ улэурэр Зэрэхэгъэгоу зэлъашIэ. («Тэ джары тызэрэпсэурэр»)
КъумпIыл Къадырбэч Хъызыр ыкъор Красногвардейскэ районым ит къуаджэу Улапэ шышъхьэIум и 24-м, 1934-рэ илъэсым къыщыхъугъ. 1954 — 1957-рэ илъэсхэм дзэм къулыкъур щихьыгъ. 1957-рэ илъэсым къыщегъэжьагъэу ытхыхэрэр хиутыхэ хъугъэ. 1957 — 1959-рэ илъэсхэм псэолъэшI фирмэу «Зэкъошныгъэм» лэжьэкIо къызэрыкIоу Iутыгъ. ЕтIанэ Москва Литературнэ институтым щеджагъ. А илъэсхэм иапэрэ усэхэм тхылъеджэхэр нэIуасэ афэхъух. Усэу «Сихэгъэгу» фэбэгъэ иныр къыхэщэу къыщеIо:
Сыогупшысэ зыхъурэм, Сыбыбмэ сшIоигъоу сэхъу. Къушъхьэм къечъэхрэ псыхъоу СкIуачIэ фэдитIу къыхахъо.
Мамырныгъэм, тынчыныгъэм агъэразэу нэмыкI усэм щыкIегъэтхъы:
СэшIэ сэ шIу узкIэслъэгъурэр, Сихэгъэгоу цIыфы гушхуапI. Зызакъуи сымыуджэгъурэр Уигубгъошхоу гъэбэжъу къэкIуапI.
Хэгъэгум гъунэнчъэу фэраз: регъаджэ, ефапэ, егъашхэ, тынчыгъэр регъэгъоты. 1964-рэ илъэсым Къадырбэч иапэрэ усэ тхылъэу «ПсынэкIэчъ» зыфиIорэр къыдэкIыгъ. Охътэ кIэкIым къыкIоцI ащ усэ тхылъ пчъагъэ къыкIэлъыкIуагъ. Усэныр тхьэтын лъапIэу зэрэщытыр зэхишIэу, гу къабзэм къикIырэ сатырхэм цIэ дахэ афишIыгъ усакIом — «ПсынэкIэчъ». Ипшъэрылъ ин зэхишIэу ар сыдигъуи усэщтыгъ, дышъи, дани апимышIыщтыгъэр икъоджэ гупс ары.
Сэ лъапсэ зыщесыдзыхыгъэр Сыкъызщалъфыгъэу сикъуадж. Сэламыр апэу зэсхыгъэр Сыгушхоу иурам занкI.
Къысатэу сэ Сенэ Iушъо, ЩысфашIми унэ Париж, Ащ пае сиштэщтэп гушIом — Сикъуаджэ сэркIэ Париж. * * * Дунаим чIыпIэ дэхабэ, Сэ сэшIэ, хъопсагъоу тет, Ау щыIэп фэдэ Улапэ, Улапэ — сэ сиорэд. («Сикъуадж»)
Илъэс 30-м ехъоу литературэм зыхэтыгъэм, зыщылэжьагъэм усакIом игупшысэ щыIэныгъэ лъэныкъуабэм зэфэдэу атыригощэн, пейзажым, лирикэм имызакъоу, хэгъэгум, илъэпкъ афыриIэ шъыпкъагъэм, пытагъэм анэсыжьэу, а зэкIэ лъым хэлъэу, пIуныгъэ-гъэсэны-гъэу ыгъотыгъэм диштэу, хэтрэ цIыфи шIу фишIэмэ шIоигъоу усэщтыгъэ КъумпIыл Къадырбэч. Хэгъэгу зэошхоу щыIагъэм ихьазаб ежь ышъхьэкIи, сабыигъэми, зэхишIагъ, ятэ а зэожъ мыгъом хэкIодагъ.
Тят, удэмылъми тэ тикъэхалъэ, Ухэлъ о тхыдэу цIыфхэм япсалъэ, АмышIэ пэтми узщыфэхыгъэр, Дэгъу дэдэу ашIэ узкIэфэхыгъэр.
Усэу «Сятэ исурэт» зыфиIорэми илъэпIэ цIыфэу тым иобраз псэ къыщыпегъакIэ, ар — тыр, къышIэжь-къымышIэжь, ау ным ащ фыригъэшIыгъэ шIулъэгъу-шъхьэкIафэр ин дэд —– зэхэшIэ лъапI. Усэу «Тян, остыгъэр къысфыхэгъан» зыфиIорэр ны минхэм афэкIорэ джэпсалъэм фэд — ным игумэкI мыухыжьба, дунаир зыгъэдунаеу, зэтезгъэтырэр уегъаIо.
УсакIом ыпсэ ифабэ хэти, сыди зэфэдэу атыригуащэу, шIур аригъашIэу, ем пэIуищхэу ипсалъэ зэфагъэ. Щэч хэлъэп, КъумпIыл Къадырбэч адыгэ лирикэм хигъэхъуагъ, зыгорэм къыIуагъэм, ытхыгъахэм темышIыкIыгъэхэу, ахэр ежь усакIом игузэхашIэхэм къатыгъэх. ИкIас ыкIи зыпишIын щыIэп къешIэкIыгъэ дунэе нэф дахэр. Иусэ сатырхэм угурэ упсэрэ аубыты. Псэ зыпыт дунэешхор зэрэлъапIэр ыкIи зэрэтхъагъор уагъашIэ.
КъумпIылыр лирическэ усэхэм къащымыуцоу, нахь куоу ыкIи чыжьэу плъагъэ, эпическэ произведениехэри ытхыгъэх. Ахэр поэмэхэу «Гугъэ», «О ухэт, цIыфыр?», «ДзэкIолIхэр» зыфиIохэрэр. ГъашIэ бгъэшIэныр — щэIэгъэшхо ащ фыуиIэныр арэу зэрэщытыр мы произведениехэм темэ шъхьаIэу апхырыщыгъ. Афэтхагъ Къадырбэч зынахь хые щымыIэ кIэлэцIыкIухэм. Орэдхэри бэу иIэх. А зэкIэми къаушыхьаты Къадырбэч гъунэнчъэу щыIэныгъэр зэрилъэпIагъэр, усэныр — цIыфым идахэ ыIотэныр зэрикIэсагъэр. УсакIом гъэшIэшхо иIагъэп — илъэс 56-рэ къыгъэшIагъэр. Ау гупшысэшхо илъэпкъ филэжьыгъ ыкIи къыфигъэнагъ. Куоу гупшысэщтыгъ, бэ ылъэгъущтыгъэр.
Мамырыкъо Нуриет.