Урысыем кушъхьэфэчъэ спортымкIэ изэнэкъокъу Краснодар краим ипсэупIэу Шытхьалэ щыкIуагъ.

Адыгэ Республикэм кушъхьэфэчъэ спортымкIэ иеджапIэ зыщызыгъасэхэу Александр Евтушенкэмрэ СтIашъу Мамыррэ зэгъусэхэу «ТIурытIу зэнэкъокъу» зыфиIоу мыжъо гъогум щыкIорэм хэлэжьагъэх.

Километрэ 50 хъурэ гъогур такъикъ 59.39-кIэ къакIуи, Урысыем апэрэ чIыпIэр къыщыдахыгъ.

Москва, Санкт-Петербург, Омскэ, хэгъэгум инэмыкI шъолъыр­хэм къарыкIыгъэхэу тIурытIоу зэгъусэхэ спортсменхэу 24-рэ зэнэкъокъугъэх. Адыгэ Республикэм испортсменхэу Урысыем кушъхьэфэчъэ спортымкIэ ихэшыпыкIыгъэ командэ хэтхэу Александр Евтушенкэмрэ СтIашъу Мамыррэ, ахэр зыгъэсэхэрэ тренерхэу Анатолий Лелюкрэ Серик Каргалиевымрэ тафэгушIо, яспорт гъэхъагъэхэм ахагъэхъонхэу афэтэIо.

Сахьидэкъо Нурбый.