Щамсудинэ лъэпкъыр рэгъуазэ
Гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэм шышъхьэIум и 17-м 2021-рэ илъэсым Iэнэ хъураеу «Адыгэ IорIотэ шIэныгъэм иIахьышIу хишIыхьагъ» зыфиIорэр щыIагъ. Ар зэлъашIэрэ шIэныгъэлэжьэу, филологие шIэныгъэхэмкIэ докторэу, Дунэе адыгэ(щэрджэс) академием иакадемикэу, Адыгэ Республикэм шIэныгъэмкIэ изаслуженнэ IофышIэшхоу Хъут Щамсудинэ къызыхъугъэр илъэс 85-рэ зэрэхъугъэм фэгъэхьыгъагъ.
Iэнэ хъураер пэублэ гущыIэ кIэкIкIэ къызэIуихыгъ институтым идиректорэу, философие шIэныгъэхэмкIэ докторэу ЛIыIужъу Адам. Илъэпкъ ыпашъхьэ шIулэжьыгъэ ин щызиIэу, анахь шIэныгъэлэжь инэу АдыгеимкIэ зыцIэ къыраIохэрэм Щамсудинэ зэращыщыгъэр, пасэу, къоджэ еджапIэм чIэсзэ, адыгэ жэрыIо творчествэм пыщагъэ зэрэхъугъэр, ятэжъэу Исхьакъ къыIуатэхэрэм емызэщэу зэрядэIущтыгъэр, пшысэхэу тэтэжъым къыIуатэхэрэм ащыщ зытIущ къытхи, (я 5-рэ классым исыгъ), Щамсудинэ институтым къызэраригъэхьыгъагъэр А. ЛIыIужъум къыIуагъ. ИкIэлэцIыкIугъом къыздиштэгъэ фэщэныгъэ лъэшэу Щамсудинэ хэлъыгъэм, ыужыкIэ, ишъыпкъэу зэрэхигъэхъуагъэр, гъэсэгъэ-еджагъэ зэрэхъугъэр, щэIэфэ Адыгэ IорIотэ шIэныгъэм емызэщыжьэу зэрэдэлэжьагъэр Адам кIигъэтхъыгъ. Непэрэ Iэнэ хъураер лIым ищыIэныгъэ ыкIи итворческэ гъогу икъоу къизыIотыкIыщтэу ылъытагъ, узыгъо инэу къекIокIырэр пэрыохъу мыхъугъэмэ, дунэе мэхьанэ зиIэ конференцие зэрэзэхащэщтыгъэр, ау джырэкIэ, ежь Хъут Щамсудинэ Iоф зыщишIэгъэ институтым иIофышIэхэм яшIошIхэр лIым иIофшIагъэхэмкIэ къызэрэраIотыкIыщтхэр къыIуагъ, гущыIэр фигъэшъошагъ гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэм IорIуатэмкIэ икъутамэ ипащэу, филологие шIэныгъэхэмкIэ докторэу Цуекъо Нэфсэт. Ащ «Хъут Щамсудинэ шIэныгъэмрэ лIыгъэмрэ афэлэжьагъ» зыфиIорэ къиIотыкIыныр къышIыгъ. Адыгэ IорIотэ шIэныгъэм ежь илъэгъо гъэнэфагъэ Щамсудинэ зэрэпхырищыгъэр Нэфсэт къыIуагъ. ЦIыф сакъэу, Iушэу, акъылышIоу, гулъытэшхо ыкIи гукIэгъу ин иунагъокIэ, илъфыгъэхэмкIэ, IахьылхэмкIэ, ныбджэгъухэмкIэ зэрэхэлъыгъэр кIигъэтхъыгъ. ИкIэлэцIыкIугъом къыщегъэжьагъэу, ятэжъэу Исхьакъ ихьакIэщ щызэхихыгъэ таурыхъхэр, тхыдэхэр, пшысэхэр, гущыIэжъхэр зэкIэ гукIэ зэришыпыгъэхэр, Адыгэ къэралыгъо кIэлэегъэджэ институтым щеджэзэ, ХьэдэгъэлIэ Аскэр кIалэр апэу зэрилъэгъугъэр ыкIи ащ зыгорэ зэрэхэкIыщтым гу зэрэлъитагъэр, институтым иIорIотэ къутамэ экспедициехэу щызэхащэхэрэм ахигъэлажьэу къызэрэхэкIыгъэр, зэкIэупкIэгъэ чаныгъэ Щамсудинэ зэрэхэлъыгъэр, ышIэрэм зэрегугъущтыгъэр къыIотагъэх. Институтыр къызеух ужым, Хъут Щамсудинэ илъэситIо Тэхъутэмыкъое гурыт еджапIэм Iоф щишIагъ, етIанэ Мыекъуапэ шIэныгъэхэр зыщыхагъэхъорэ институтым къащэжьи, методистэу заулэрэ Iоф щишIагъ. Апэрэу ХьэдэгъэлIэ Аскэр институтым къыригъэблагъи, Iоф щишIэ хъугъэ. Томибл хъурэ «Нартхэр» къыдэгъэкIыгъэнхэмкIэ редакционнэ коллегием хигъэхьэгъагъ. СборникипшI пчъагъэ адыгабзэ ыкIи урысыбзэкIэ Хъут Щамсудинэ ыкIи «Адыгэ гущыIэжъхэр» гъусэ иIэу къыдигъэкIыгъ. Угъоен-ушэтын IофшIэгъэшхо иI: монографиеу 4 къыдигъэкIыгъ: «Историко-лирические песни адыгов», «Адыгское народное слово», нэмыкIхэри. Мы тхылъи 4-р адыгэ лъэпкъымкIэ шIэныгъэ къэкIопIэшIу хъугъэ. Нэфсэт игущыIэ къыхигъэщыгъ, Щамсудинэ писатель-просветительхэм ятворчествэ Iоф зэрэдишIагъэр ыкIи тхылъэу «Шаги к рассвету» зыфиIорэр къызэрэдигъэкIыгъэр. НэмыкI шIэныгъэлэжьхэр игъусэхэу, хрестоматиехэр, учебникхэр, методическэ IэпыIэгъухэр ытхыгъэх. ЛIэужыкIэхэр наукэм пэблагъэ шIыгъэнхэм, хэщэгъэнхэм Iофышхо дишIагъ. ПроектыкIэ инэу лъэпкъ фольклорыр ухъумэгъэным тегъэпсыхьагъэм изэхэгъэуцон Хъут Щамсудинэ ишъыпкъэу Iоф дешIэ: пшысэхэр, тхыдэхэр ежь ыштагъ, томи 3-у къыдэкIыным фагъэхьазыры. Хъутым радиом, гъэзетым, журналэу «Зэкъошныгъэм» зэпхыныгъэ ин адыриIагъ, ишъыпкъэу Iоф адишIагъ. Адыгэ лъэпкъым идышъэ кон – фольклорыр къызэтегъэнэгъэнымкIэ, шIэныгъэ лъапсэм тегъэуцогъэнымкIэ Щамсудинэ бэ Iофыгъоу ылэжьыгъэр.
Цуекъо Нэфсэт ежь ышъхьэкIэ Хъут Щамсудинэ итхэкIо-секретарэу Iоф зэрэдишIагъэм ихьатыркIэ, лIым ишIыкIэ-гъэпсыкIи, иIофшIэкIэ хабзи, ныбджэгъуныгъэм мэхьанэу фишIрэми, нэмыкI лъэныкъуабэми ащыгъуазэ хъугъэ. Щамсудинэ наукэр ыгу хэпкIагъэу щытыгъ, ау нитIум амылъэгъоу зэтIысми, игугъэ чIинагъэп. Шъыпкъэ, зыфэдэр къэIотэгъое ныбджэгъу хьалэлхэу, гукIэгъу ин зыхэлъхэу Мамый Руслъан, ЩэшIэ Казбек, Бэгъ Нурбый, Къуекъо Налбый, Къат Теуцожь, Шъхьаплъэкъо ГъучIыпс лъэшэу фэгумэкIхэу, пытэу къыкъотыгъэх. Щамсудинэ ищыIэныгъэ мыпсынкIэ, Цуекъо Нэфсэт Н. Островскэм игъашIэ – щыIэныгъэр зэрэлIыгъэшIапIэм, зыгорэущтэу фигъэдагъ. ЛIым щэIэгъэшхо зэрэхэлъыгъэр, тхьаусыхэу, нэмыкIэу зэрэщымытыгъэр, бэ зэришIэщтыгъэр, бэ игулъытэ, иакъыл зынэсыщтыгъэр. Джары «Усэрэжъ» зыкIыраIощтыгъэр — «Iуш дэд, ымышIэ щыIэп» ащ къикIырэр, ар бэмэ афагъэшъуашэрэп. ИныбджэгъухэмкIэ, иIахьылхэмкIэ гукIэгъушIагъ. Щамсудинэ ренэу анахь зыкIэхъопсыщтыгъэр икъуадж, ихьабл, иурам арэу зэрэщытыгъэр Нэфсэт къыIуагъ. Хъут Щамсудинэрэ ишъхьэгъусэу Зоерэ пшъэшъэжъыитIу зэрэзэдапIугъэр, ахэр цIыфы зэрэхъугъэхэр — Замирэ Налщык щэпсэу, тым игъогу рыкIуагъ — шIэныгъэлэжь, пшъэшъэ нахьыкIэу Тэмарэ — врач, Мыекъуапэ щэпсэу, тIуми унагъохэр, бынхэр яIэх. Нэфсэт ыгу къызэрэкIыжьрэмкIэ, Щамсудинэ ипхъорэлъфэу, Замирэ икIалэу Астемир аIуагъэмэ, зишIэжьыщтыгъэп, джы ар цIыфы хъугъэ. «ШIэныгъэлэжьышхоу, цIыфышIу дэдагъэу Хъут Щамсудинэ игупшысэ, иакъыл- лэжьыгъэкIэ непи къытхэт ыкIи къытхэтыщт сыдигъуи», — къыIуагъ Нэфсэт.
Гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэм ипащэ игуадзэу, филологие шIэныгъэхэмкIэ докторэу Биданэкъо Марзият Iэнэ хъураер лъигъэкIотагъ ыкIи зэрищагъ.
ГущыIэр фигъэшъошагъ институтым литературэмкIэ иотдел иIофышIэ шъхьаIэу, филологие шIэныгъэхэмкIэ докторэу Мамый Руслъан. «Хъут Щамсудинэ шIэныгъэлэжь, ныбджэгъу» зыфиIорэ къиIотыкIыныр къышIыгъ. Студентыгъом къыщыкIэдзагъэу зэрэшIэхи, Щамсудин, ежь Мамыир, ЩэшIэ Казбек, Къуекъо Налбый, Iэм пыт Iэхъуамбэм афэдэхэу, зэрэзэкъотыгъэхэр Руслъан IупкIэу къыриIотыкIыгъ, Хъут Щамсудинэ ищыIэныгъэ ыкIи итворчествэкIэ тхылъитIу зэритхыгъэр, ау я II-рэр къыдэкIыным фэхьазырэу щылъэу, Щамсудинэ идунай зэрихъожьыгъэр, ау ныбджэгъу ялыем инэпэеплъ инэу тхылъыр къызэрэдэкIыгъэр къыIотагъ Руслъан.
Iэнэ хъураем псэлъэ фабэ къыщишIыгъ институтым IорIуатэмкIэ иотдел иIофышIэу, филологие шIэныгъэхэмкIэ докторэу Къуекъо Асфар. Адыгэ хьакIэщыр гъэсэпIэ-еджэпIэ инэу, гупшысэ къэкIуапIэу, акъыл уцупIэу, цIыфыр лъэныкъуабэкIэ ыпсыхьэу зэрэщытыгъэр кIигъэтхъыгъ.
Iэнэ хъураем къиIотыкIынэу «Ш. Х. Хут как создатель антологии литературных произведений адыгских писателей-просветителей» зыфиIорэр институтым славян-адыгэ культурэ зэпхыныгъэхэмкIэ иотдел иIофышIэу, педагогическэ шIэныгъэхэмкIэ кандидатэу Галина Луганскаям къыщишIыгъ. Филологие шIэныгъэхэмкIэ кандидатхэу ШэкIо Мирэ Щамсудинэ итхылъэу «Нэфынэм екIурэ лъагъохэр» зыфиIорэм ыкIи Нэхэе Саидэ «Хъут Щамсудинэрэ адыгэ орэдыIо-тхыдэIуатэхэмрэ» къатегущыIагъэх.
Институтым литературэмкIэ иотдел ипащэу, филологие шIэныгъэхэмкIэ докторэу ЩэшIэ Щамсэт Хъут Щамсудинэ ныбджэгъу дэгъухэр сыдигъуи зэриIагъэхэр, шIу зэралъэгъущтыгъэр, ежьри зэрэцIыфышIу- акъылышIуагъэр, яунагъохэмкIэ зэгупсэ-зэщыщхэм фэдэхэу зэрэзэхэтыгъэхэм ягугъу къышIыгъ, зы цIыф инэу, лIэшIэгъум зэу къэхъурэм, Щамсудинэ ащыщыгъэу ылъытагъ.
Iэнэ хъураем хэлэжьагъ ыкIи кIэух псэлъэ фабэ къыщишIыгъ АР-м и Лъэпкъ театрэу Цэй Ибрахьимэ ыцIэкIэ щытым иактрисэу, Урысыем изаслуженнэ, АР-м инароднэ артисткэу Уджыхъу Марет — Щамсудинэ ышыпхъум ыпхъу, ащ елъытыгъэу, цIыфхэмкIэ ыкIи IахьылхэмкIэ ипсэнчъэгъагъэ ащ кIигъэтхъыгъ. АкъылышIо дэдэу, цIыфышIу зафэу зэрэщытыгъэр Марет щысэхэмкIэ къыгъэлъэгъуагъ, лIым ыцIэкIэ институтэу Iэнэ хъураер зэхэзыщагъэм ыкIи зэкIэ ащ хэлэжьагъэхэм «Тхьашъуегъэпсэу, тышъуфэраз!» — Марет къариIуагъ. Джащ фэдэу Щамсудин ыпхъухэу Замирэ ыкIи Тэмарэ ятэ шъхьэкIафэ фашIэу, ренэу Iофтхьабзэшхохэр зэрэфызэхащэхэрэр зэрягуапэр къаIуагъ. «ШIу зышIэрэм, шIу фыщылъ» пкIэнчъэу аIуагъэп.
Мамырыкъо Нуриет.
Сурэтхэр Iэшъынэ Аслъан Iофтхьабзэм къыщытырихыгъэх.