ШъхьакIумыдэ Нурыет фэгушIуагъэх
РСФСР-м изаслуженнэ артисткэу, Адыгэ Республикэм инароднэ артисткэу ШъхьакIумыдэ Нурыет ыныбжь илъэси 100 хъугъэ.
Хьащтыку къыщыхъугъэу Мыекъуапэ щыпсэурэ артисткэ цIэрыIом ыдэжь кIохи, игушIуагъо дэзыгощыгъэхэр бэ мэхъух.
Мыекъуапэ иадминистрацие ипащэ иIэнатIэ зыгъэцэкIэрэ Сергей Стельмах, къэлэ администрацием икъулыкъушIэхэр, Адыгэ Республикэм культурэмкIэ иминистрэу Аулъэ Юр, Урысыем итеатрэхэм яIофышIэхэм я Союз икъутамэу Адыгэ Республикэм щыIэм ипащэу, АР-м иартист цIэрыIоу Зыхьэ Заурбый, Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм ихудожественнэ пащэ ипшъэрылъхэр зыгъэцэкIэрэ зэлъашIэрэ артистэу Хьакъуй Аслъан, Адыгэ Республикэм и Къэралыгъо Камернэ музыкальнэ театрэу Хьанэхъу Адамэ ыцIэ зыхьырэм ихудожественнэ пащэу, искусствоведениемкIэ кандидатэу Сулейманов Юныс, Адыгэ Республикэм и Урыс театрэу А. Пушкиным ыцIэ зыхьырэм ипащэу Роман Корчатэ, АР-м и Къэралыгъо филармоние инысхъэпэ театрэу «Дышъэ къошыным» ихудожественнэ пащэу Сихъу Станислав, общественнэ IофышIэхэр, журналистхэр ШъхьакIумыдэ Нурыет илъэси 100 зэрэхъугъэм фэшI фэгушIуагъэх. Адыгеим итеатрэхэм лъапсэ ашIыным, цIыфхэм алъыIэсынхэм иIахьышхо зэрэхишIыхьагъэм фэшI фэразэхэу «Тхьауегъэпсэу» раIожьыгъ.
Адыгэ Республикэм и ЛIышъхьэу КъумпIыл Мурат, Урысыем итеатрэхэм яIофышIэхэм я Союз итхьаматэу Александр Калягиным, Къэбэртэе-Бэлъкъарым, Къэрэщэе-Щэрджэсым, Темыр Осетием – Аланием, Краснодар краим, нэмыкIхэм яправительствэхэм яшIуфэс тхылъхэр ШъхьакIумыдэ Нурыет къыратыжьыгъэх.
ШъхьакIумыдэ Нурыет, ащ ишъхьэгъусэу, лъэпкъ литературэм щызэлъашIэу, шIэныгъэлэжьэу Къуныжъ Мыхьамэт къафэгушIуагъэхэм «Тхьашъуегъэпсэу» къараIожьыгъ.
«Мэшэлахь. Урысыем и Къыблэ шъолъыр щыпсэурэ артистхэм анахьыжъэу ШъхьакIумыдэ Нурыет къытхэт, тиIофшIэн къыхэлажьэ, упчIэжьэгъу тэшIы», — къыIуагъ артист цIэрыIоу Зыхьэ Заурбый. — Нурыет фэдэ цIыф Iушхэм, цIыф лъэшхэм яшIуагъэкIэ Адыгеим итеатрэхэм хэхъоныгъэхэр ашIыгъэх».
Опсэу, тилъапIэу Нурыет! Уинасып бэгъонэу, бэгъашIэхэм ябэгъэшIэжь ухъунэу тыпфэлъаIо.
Сурэтхэр зэхахьэм къыщытетхыгъэх.