Дунэе гандболым щыцIэрыIоу Анна Вяхиревам гущыIэгъу тыфэхъоу бэрэ къыхэкIыгъ. Спортыр ищыIэныгъэ щыщ зэрэхъугъэр ащ шIогъэшIэгъон.

Яунагъо Тольятти къызэкощыжьым Аннэ цIыкIугъэ. Илъэси 6-м итэу гандболым зыфигъасэу ригъэжьагъ. Ятэу Виктор Вяхиревыр ятренерэу щытыгъ. Аннэрэ ышыпхъоу Полинэрэ зы командэм зэдыхэтыхэ зыхъукIэ, зэфэшъхьаф чIыпIэхэм ащешIэнхэр нахьышIукIэ В. Вяхиревым ылъыти, джабгъу лъэныкъом Аннэ ыгъэуцугъ.

Анна Игнатченкэм ехьыщыр

Мыекъопэ гандбол клубэу «Адыифым» щешIэщтыгъэ Анна Игнатченкэр Анна Вяхиревам едгъапшэу къыхэкIы. А. Игнатченкэр джабгъу къогъупэм щешIэщтыгъ. Анна Вяхиревар гупчэм иджабгъу лъэныкъо щешIэ. А чIыпIэхэм уащешIэ зыхъукIэ, Iэсэ­мэгоу ущытыныр бэкIэ на­хьышIу.

Адыгеим игандбол лъапсэ фэзышIыгъэу, Урысыем, Адыгеим язаслуженнэ тренерэу Джэнчэтэ СултIан спорт классым щеджэ­хэрэ пшъашъэхэр командэм къызырегъэблагъэхэм, IэсэмэгукIэ къогъупэм щешIэн зылъэ­кIыщт ыгъотыщтыгъэп. Анна Игнатченкэр IэджабгъукIэ ешIэщтыгъ. Пшъэшъэжъыем сэнаущыгъэ ин зэрэхэлъыр Джэнчэтэ СултIан ылъэгъущтыгъ. Ар къыдилъыти, IэсэмэгукIэ къэлапчъэм Iэгуаор дидзэн ылъэкIыным Анна Игнатченкэм зыфигъэсэнэу тренерыр еушъыигъ.

— Цыхьэ къысфэзышIырэ тренерым дезгъашти, зыкIи сымыгъэфедэщтыгъэ шIыкIэхэм зафэзгъасэу езгъэжьагъ, — къе­Iуатэ Анна Игнатченкэм. — Къыз­дэхъущтыр сшIэщтыгъэп, арэу щытми, тренерым, командэм хэт пшъашъэхэм сядэIущтыгъ.

«Адыифым» тIогъогогъо Урысыем изэнэкъокъу джэрзыр къы­щихьыгъ. А. Игнатченкэр ешIэкIо анахь дэгъухэм ащыщ хъугъэ. Урысыем ихэшыпыкIыгъэ командэ хэтэу дунаим изэнэкъокъу хэлэжьагъ, дышъэр типшъашъэ­хэм къыдахыгъ.

Пшъэшъэ лъхъанчэм игумэкI

Анна Вяхиревар IэсэмэгукIэ гупчэм щешIэу, къэлапчъэм Iэгуа­ор бэрэ дидзэу зэнэкъокъу­хэм ащытлъэгъущтыгъ. Тольятти ико­ман­дэу «Лада-2-м» Анна Вяхиревар хэтэу хэгъэгум иныбжьыкIэхэм язэIукIэгъухэу Мыекъуапэ щыкIохэрэм ахэлажьэзэ зэдэгущыIэгъухэу зэдытиIагъэхэр сщыгъупшэхэрэп. Анна Вяхиревам иешIакIэ бэмэ ашIогъэшIэгъоныгъ. Пшъэшъэжъы­ем сыщытхъуи, Урысыем ихэшыпыкIыгъэ командэ аштэнэу, Олимпиадэ джэгунхэм ахэлэжьэ­нэу фэсIуагъ.

— Сэ сыпшъэшъэ лъхъанч. Хэгъэгум ихэшыпыкIыгъэ командэ саштэщтэп, — ащыгъум къысиIуагъ А. Вяхиревам.

Ыгу къэсIэты сшIоигъоу пшъэ­шъэжъыем сеушъыиныр шэны сфэхъугъагъ. Мафэ горэм нэпэеплъ сурэтхэр тесхынхэу зесэгъажьэм, Ростов-на-Дону, Краснодар, Мые­къуапэ, нэмыкIхэм ащыщхэм пшъашъэхэр Аннэ къыгоуцохэзэ, къыщытхъущтыгъэх, упчIэжьэгъу ашIэуи къыхэкIыщтыгъ.

Уахътэр лъэкIуа­тэ

Анна Вяхиревам иIэпэIэсэныгъэ хигъа­хъощтыгъ, лъэпэ-лъа­гэ мыхъугъэми, гандболышхом щызэлъа­шIагъ.

Олимпиадэ джэгунхэу 2016-рэ илъэсым Рио-де-Жанейро щыкIуагъэхэм илъэс 21-м итэу А. Вя­хиревар ахэлэ­жьагъ. ЕшIэ­гъуи 8-мэ къэ­лап­чъэм Iэгуаор гъогогъу 36-рэ ащыди­дзагъ.

2018-рэ, 2019-рэ илъэсхэм Европэм, дунаим язэнэкъокъу­хэм чанэу ахэлэжьагъ. Дунаим ихэшыпыкIыгъэ гандбол командэ хагъэхьагъ. Олимпиадэ джэгунхэу Рио-де-Жанейро, Токио ащыкIуа­гъэхэм, Европэм изэнэкъокъу А. Вяхиревар шIуагъэ къытэу анахь дэгъоу ащ ешIагъэу зэхэщакIохэм алъытагъ.

Ащ фэдэ щытхъуцIэхэр Анна Вяхиревам нэмыкI зыми Урысыем иешIакIохэм ащыщ къыдихыгъэп.

Дунаим игандбол хэшыпыкIыгъэ командэ Анна Вяхиревам ышыпхъоу Полина Кузнецовар хагъэхьагъ.

Типшъашъэхэм агъэгушхо

Урысыем ихэшыпыкIыгъэ командэ тыжьыныр Токио къыщыдихыгъ. КIэух ешIэгъур 30:25-у Францием ыхьыгъ.

— Финалныкъом Норвегием тызыдешIэм, кIуачIэу хэтлъхьагъэр бэ, зыдгъэпсэфынэу, тиухьазырыныгъэ зыпкъ идгъэуцожьынэу игъо тифагъэп. Арэу щытми, типшъашъэхэм сафэраз, дэгъоу ешIагъэх, — къыIуагъ Анна Вяхиревам.

Олимпиадэ джэгунхэр аухы­гъэх. Анна Вяхиревам зигъэпсэфыщт, ипсауныгъэ изытет на­хьышIу зэришIыщтым пылъыщт. 2024-рэ илъэсым Францием Олимпиадэ джэгунхэу щыкIощтхэм ахэлэжьэн, тигъэгушIон имурад.

Опсэу, Анна! Адыгеим о уриныбджэгъушIу. 2020-рэ илъэсым «Ростов-Доным» ухэтэу Мые­къуапэ укъызэкIом, гущыIэ фабэхэр къытэпIогъагъэх. Iэгуаор о пIыгъэу къэлапчъэм благъэм уекIуалIэ зыхъукIэ, ухъумакIохэр зэрэгумэкIыхэрэр, гузэжъогъу чIыпIэ ибдзэнхэ зэрэплъэкIырэр тэгъэшIагъо. Спортышхом гъэхъагъэу щыпшIыгъэхэм ахэбгъэхъонэу пфэтэIо. Опсэу, Тхьэм насыпышIо, бэгъашIэ уешI.

Мыекъуапэ щытетхыгъэ сурэтым итхэр: Анна Вяхиревар джабгъумкIэ щыт, N 13-р имайкэ тедзагъ.