ДзюдомкIэ Мыекъопэ бэнэпIэ еджапIэм шъолъырхэм язэIукIэгъухэр илъэсым тIогъогогъо зэхищэнхэр шэнышIу фэхъугъ.

Санкт-Петербург, Татарстан, Къэбэртэе-Бэлъкъарым, Краснодар краим, Адыгеим, нэмыкIхэм спортымкIэ яIофышIэхэр, дзюдомкIэ бэнакIохэр бэмышIэу Къэбэр­тэе-Бэлъкъарым щызэ­IукIагъэх, егъэджэн зэхахьэхэр щызэхащагъэх. Iошъхьэмафэ идэхагъэ на­хьышIоу зыщагъэгъо­зэным фэшI къушъхьэм дэкIоя­гъэх.

Купым хэтхэр Адыгеим къызэкIохэм, ягукъэкIыжьхэм атегущыIагъэх. Анахьэу ашIогъэшIэгъо­ныгъэр Адыгэ къэралыгъо универ­ситетым физкультурэмрэ дзюдомрэкIэ и Институт къэзыухы­гъэхэм къаIотэжьыгъэхэр арых.

Кобл Якъубэ лъапсэ зыфишIыгъэ бэнэпIэ зыгъэсапIэу Мыекъуа­пэ дэтыр дунаим шIукIэ щызэ­лъашIэ. Михаил Нажиловыр Санкт-Петербург щэпсэу. Ащ иныбджэгъоу Улан Гуртуевым физкультурэмрэ дзюдомрэкIэ Институтыр Мыекъуапэ къыщи­ухыгъ, спортымкIэ дунэе класс зиIэ мастер.

Владимир Драчко ТIуапсэ къыщыхъугъ, Мыекъуапэ ибэнэпIэ еджапIэ щапIугъ. Тренерэу Зэ­фэс Заур ипащэу дзюдом зыфигъэсагъ. Европэм изэнэкъокъу дышъэр къыщихьыгъ, хэгъэгум спортымкIэ изаслуженнэ мастер, Урысыем изаслуженнэ тренер, Урысые Федерацием дзюдомкIэ ихэшыпыкIыгъэ ныбжьыкIэ командэ итренер шъхьаIэу щытыгъ. Мы уахътэм Татарстан дзюдомкIэ ихэшыпыкIыгъэ командэ итренер шъхьаI.

Уджыхъу Адам СССР-м спортымкIэ имастер, Кобл Якъубэ ыцIэ зыхьырэ спорт еджапIэм ныбджэгъоу щыриIэхэм къызэраIуагъэу, Уджыхъу Адам зэхэщэкIо дэгъу, ныбжьыкIэхэм яупчIэжьэгъу. Кобл Якъубэ зэрэ­IукIэщтыгъэр, дзюдом, самбэм атегущыIэхэ зыхъукIэ, Адыгеим ыцIэ дунаим нахь лъагэу щаIэты ашIоигъоу амалыкIэхэм зэралъы­хъущтыгъэхэр Адам щыгъупшагъэхэп.

Роман Оробцовыр Адыгеим дзюдомкIэ испорт еджапIэ итренер. Бастэ Сэлымэ АР-м дзюдомкIэ испорт еджапIэу Кобл Якъубэ ыцIэ зыхьырэм ипащ, Адыгэ Респуб­ликэм дзюдомкIэ ихэшыпыкIыгъэ командэ итренер шъхьаI.

Мыекъопэ бэнэпIэ еджапIэм ныбджэгъу зэфишIыгъэхэр тикъа­лэ зыщызэIокIэхэм, дзюдом изыкъегъэIэтын тегущыIагъэх. «IэпэIасэм иеджапI» зыфиIорэр зэхащи, дзюдомкIэ ныбжьыкIэхэр зэрагъасэхэрэм еплъыкIэу фыряIэр зэфахьысыжьыгъ.

Мыекъуапэ щыкIощт

Iоныгъо мазэм и 22 – 27-м Урысыем дзюдомкIэ изэнэкъокъу Мыекъуапээ щыкIощт. Хэгъэгум ибэнэкIо анахь лъэшхэр тикъалэ щызэIукIэщтых.

– Урысыем изэнэкъокъу Мыекъуапэ зэрэщызэхащэрэм мэхьэнэ ин етэты, – къытиIуагъ Адыгэ Республикэм изаслуженнэ тренерэу Бастэ Сэлымэ. – Кобл Якъубэ ригъэжьагъэхэ Iофхэр лъыгъэкIотэгъэнхэмкIэ зэнэкъо­къур еджэпIэшIу тфэхъущт.

Михаил Нажиловым, Улан Гуртуевым, Владимир Драчко, фэшъхьафхэм Адыгэ Республикэм испорт псэуалъэхэр зэрагъэлъэгъугъэх, ахэр зэрэзэтегъэпсыхьагъэхэм осэ ин фашIыгъ. ХьакIэхэр Лэгъо-Накъэ, республикэм ичIыпIэ дахэхэм ащыIагъэх.

ЦIыфым ипIун, игъэсэн, физкультурэмрэ спортымрэ апыщагъэхэм щыIэныгъэм чIыпIэу щы­ряIэм, ныбджэгъуныгъэу зэдыряIэр гъашIэм зэрэщылъыкIуа­тэрэм, нэмыкIхэм атегущыIагъэх.

Сурэтым итхэр: зэхахьэм хэлэжьагъэхэр.