Япчъагъэ хэхъо
Мыекъопэ волейбол хъулъфыгъэ командэу «Динамо- МГТУ-м» 2021 – 2022-рэ илъэс ешIэгъум зыфегъэхьазыры.
Урысыем изэнэкъокъоу апшъэрэ купэу «Б-м» щыкIощтым «Динамо-МГТУ-р» хэлэжьэщт. Командэм итренер шъхьаIэу, Адыгэ Республикэм изаслуженнэ тренерэу Павел Зборовскэм зэрилъытэрэмкIэ, ешIакIохэм яIэпэIэсэныгъэ хагъэхъонымкIэ амалышIухэр яIэх.
Адыгэ Республикэм истадион, Мыекъуапэ изыгъэпсэфыпIэ парк, МКъТУ-м спортымкIэ ипсэуалъэхэм, нэмыкIхэм «Динамо- МГТУ-м» изыгъэхьазырын зэIукIэгъухэр ащэкIох. Джырэ уахътэ кIуачIэр апсыхьэ, атлетикэ псынкIэм хэхьэрэ шIыкIэхэр къызфагъэфедэх.
Командэм Никита Турсковыр хэкIыжьыгъ. КIэу аштагъэхэм ащыщ псэупIэу Мостовскоим щапIугъэ Денис Вербниковыр. Къошк Руслъан, Никита Филипповыр, Юрий Пичуевыр илъэсыбэ хъугъэу университетым икомандэ хэтых, ешIэкIэ дэгъу зэнэкъокъум къыщагъэлъагъо.
Урысыем и Кубок
Iоныгъом и 12 – 18-м Урысыем и Кубок командэхэр фэбэнэщтых. ЕшIэгъухэр Махачкала щыкIощтых.
ЕшIэгъухэр
— Хэгъэгум изэнэкъокъу хэхьэрэ ешIэгъухэр чъэпыогъум и 16-м едгъэжьэщтых, — тизэдэгущыIэгъу лъегъэкIуатэ Павел Зборовскэм. — Команди 10 апшъэрэ купэу «Б-м» хэтыр. 2020 – 2021-рэ илъэс ешIэгъум я 5-рэ чIыпIэр къыщыдэтхыгъ. Мыгъэ апэ ишъыщтхэм ащыщ тыхъуным тыфэбэнэщт. Студентхэм ямызакъоу, физкультурэм пыщагъэхэу волейбол ешIэ зышIоигъохэм япчъагъэ зэрэхахъорэм тегъэгушIо. Урысыем физкультурэмкIэ и Мафэ фэгъэхьыгъэ зэIукIэгъухэм тигуапэу тахэлэжьэщт.