Адыгэ Республикэм испорт еджапIэу N 2-м физкультурникым и Мафэ фэгъэхьыгъэ зэхахьэу зэхищагъэр Мыекъуапэ культурэмкIэ и Унэу «Гигантым» щыкIуагъ.

Спорт еджапIэм ипащэу, Уры­сыем, Адыгеим язаслуженнэ тренерэу Хъот Юныс спортсменхэм къафэгушIуагъ, хэгъэгу ыкIи дунэе зэнэкъокъухэм гъэхъа­гъэу ащашIырэм ахагъэхъонэу афи­Iуагъ.

Адыгэ Республикэм изаслуженнэ тренерэу НэмытIэкъо Аскэр ыгъэсэрэ ныбжьыкIэхэм ащыщэу Кристина Морозовам Урысыем гъогогъуи 8 дышъэ медалыр къыщихьыгъ. Евро- пэм апэрэ чIыпIэр, дунаим ящэнэрэр къащыдихыгъ. Ушу саньдамкIэ ыкIи IэкIэ зэбэны­хэ­рэм язэIукIэгъухэм къулайны- гъэ зыхэлъ пшъашъэр ахэлажьэ.

Велена Парамоновам, Олеся Толстых, Ольга Коваленкэм, нэмыкIхэм Урысыем иныбжьыкIэхэм язэнэкъокъу апэрэ чIыпIэхэр къащахьыгъэх.

Ристэ Алинэ, Владислав Власовым, Лъэцэрыкъо Данэ, фэшъ­хьафхэм тхэквондомкIэ хэгъэгум изэнэкъокъу медальхэр къыща­хьыгъэх. Тренерэу Олег Тыщен­кэм ахэр егъасэх.

Шъхьэзэкъо зэнэкъокъухэм ахэлэжьэрэ ныбжьыкIэхэри яIэпэIэсэныгъэкIэ къахэщых. Адыгэ Республикэм изаслужэеннэ тренерэу Хьаткъо Ахьмэд ыгъа­сэхэрэм кIуачIэри къулайныгъэ­ри зэIукIэгъухэм дэгъоу ащагъэ­федэх, медальхэр къахьых.

Лиана Штаховам, Къуикъо Амир, Уджыхъу Эльдар КъокIыпIэм къыщежьэгъэ шъхьэзэкъо зэнэкъокъухэмкIэ Урысыем апэрэ чIыпIэхэр къыщахьыгъэх.

— ТиеджапIэ щызэдгъэшIэрэ спорт лъэпкъхэр тшIогъэшIэгъо­ных, — къытиIуагъ Къуй Амир. — Ушу саньдар, шъхьэзэкъо зэнэ­къо­къухэр, фэшъхьафхэри гум ре­хьых. Спортым зыфэдгъа­сэзэ, тишIэныгъэ хэтэгъа­хъо.

Адыгэ къэралыгъо университетым физкультурэмрэ дзюдомрэкIэ и Институт, нэмыкIхэм ныбжьыкIэхэр ащеджэх, щыIэныгъэм зыфагъэхьазыры.

— Кристина Морозовар тинепэрэ зэIукIэ хэлэжьэн ылъэ­кIыгъэп. Ар хэгъэгум иегъэджэн зэIукIэгъу рагъэблэгъагъ, — къе­Iуатэ Адыгеим изаслуженнэ тренерэу НэмытIэкъо Аскэр. — Шэн-хабзэу зэрихьэхэрэмкIэ, спортым фыщытыкIэу фыриIэмкIэ Кристина Морозовар ныбжьыкIэхэм щысэ афэхъу.

Ристэ Алинэ, Лъэцэрыкъо Данэ, нэмыкIхэм тхэквондомкIэ загъасэ, Олимпиадэ джэгунхэу Токио щыкIуагъэхэм ашIогъэшIэгъонэу пшъашъэхэр алъып­лъа­гъэх.

— Физкультурэм щырагъажьэзэ, спортсмен цIэрыIо тиныбжьыкIэхэр мэхъух, — къыщи­Iуагъ зэхахьэм Хъот Юныс. — Физкультурэм, спортым апыща­гъэ­хэм гъэзетымкIи тафэгушIо сшIоигъу. Спортым медальхэр къыщызыхьыхэрэм Адыгэ Рес­публикэм ищытхъу Урысыем, дунаим ащаIэты. Тиспортсменхэм, физкультурникхэм шIоу щыIэр къадэхъунэу афэтэIо.

Физкультурэмрэ спортымрэ лъэпкъхэр зэфащэх, мамыр щыIакIэр агъэпытэ. Шъопсэу, тиспортсменхэр, физкультурникхэр! Шъо шъуигъэхъагъэхэм тарэгушхо.

ЕмтIылъ Нурбый.