Зак Кахадо:
«Хэкур сэркIэ си ДНК»
КъокIыпIэ лъэпкъхэм искусствэхэмкIэ я Къэралыгъо музей икъутамэу Мыекъуапэ дэтым шышъхьэIум щыжъот. Хьалэмэт къэгъэлъэгъонхэр зэуж итэу къыщызэIуахыгъэх. Ахэм ащыщ адыгэ сурэтышIэу Зак Кахадо иер.
Мы кIалэм икъэбар зэхэсымыхыгъэу щытыгъэп. Адыгэ культурэм, искусствэм илъэс пчъагъэ хъугъэу уахэтэу, лъэпкъ Iофыгъохэм уалъыплъэу, ахэм якъэбар пстэури къэбгъотызэ пIуатэ зыхъукIэ, адыгэ цIыфэу гъэхъагъэхэр зиIэхэм зэкIэми якъэбар къыбнэсыщт. Джы ащкIэ гъозэ амал бэлахь тIэкIэлъ. Ар Интернетыр ары. Кахадо зэшхэу Закрэ Джабагърэ ясурэт IэрышIхэр слъэгъугъэх, Москва къэгъэлъэгъуапIэ къызэрэщызэIуахыгъэри сшIэщтыгъэ. Ау ащи имызакъоу, апэрэмкIэ, Иорданием ипщышъаоу Али Адыгеим къызэкIом Зак зэригъусагъэр сыгу къэкIыжьыщтыгъэ. Ащ елъытыгъэу лъэшэу сшIогъэшIэгъоныгъ мы кIалэм Мыекъуапэ къытфищэщтыр. ЗэдэгущыIэгъоу дэсшIыгъэм ыуж исурэтхэр зэрямышIыкIэм фэдэ къабзэу ежьым иупшысэхэми сшIогъэшIэгъон хъугъэхэр ахэзгъотагъ.
— СыпфэгушIо, Зак, Мыекъуапэ уисурэтхэр къызэрэпщагъэхэмкIэ. Тыкъыожагъ. Зак сIощта, хьауми Бэрзэдж сIощта?
— Опсэу, Светлан. ТIури къысаIо сэ. Закыр Урысыем сыщыпсэунэу сыкъызэкIор ары къызысфаусыгъэр. Мы къэралыгъом сыщыпсэун слъэкIынэу тхылъ къызысатым, сцIэ Борзак аIуи датхагъ. ЩыIэба мыщ хабзэ цIэхэр агъэкIэкIэу, гущыIэм пае, Светланэр Свет аIощт, Руслъаныр Русик, сэри Борзакыр агъэкIэкIи, Зак аIо хъугъэ. Арт-индустриеми цIэ кIэкIхэр нахь щыгупсэфых. Зак Кахадо нахь псынкIэу зэрагъашIэ. Ау сэ Бэрзэдж пIомэ нахь сигопэщт.
— Адэ дэгъуба. Бэрзэдж, уисурэтхэм джыри танэмысызэ, уикъэбар зымышIэхэрэм апае, АмерикэмкIэ тэгъэубл тигущыIэ. Сыдэущтэу уянэ-уятэхэм Хышхор зэпачыгъа?
— Америкэм «Толстоим и Фонд» ыIоу зы зэхахьэ горэ щылажьэщтыгъэ. Урысыем щыпсэоу е ащ ичIыгогъухэу нэ- мыкI хэгъэгухэм арысхэр Америкэм кощыхэ ашIоигъомэ, IэпыIэгъу афэхъущтыгъэ. Сэ сянэрэ сятэрэ Иорданием икIыхи джа фондыр яIэпыIэгъоу Америкэм кIогъагъэх.
— Аущтэу хэкумкIэ алъапсэ тыдэ къыщежьэрэ, сыд фэдэ лIакъуа шъукъызхэкIыгъэр?
— Тэ Къэбэртае тыщыщ, тилIакъо Чэгъэду. Кавказ заом ыуж IэкIыб хэгъэгум егъэзыгъэкIэ кIогъэгъэ тятэжъхэр къуаджэу Анзурей щыщыгъэх. Тиунэкъощыбэ непэ къызнэсыгъэми а чылэм щэпсэу, ахэр сэшIэх, сахахьэ, сиунагъоу сэлъытэх. Бэрэ сыщэIэ сэ а къуаджэм, сиIэрышIыгъэхэри зыхэшIыкIыгъэ ятIэр ащ речъэкIырэ псыхъом ынэпкъ къыIусхыгъ, игубгъохэм къарысхыгъ.
— Апэрэу сэлъэгъу ятIэм сурэтхэр хэшIыкIыгъэхэу, къошынхэр, лагъэхэр етIэ гъэжъагъэм хашIыкIхэу зэрэщытыр сэшIэ, ау мырэущтэу дэпкъым пылъэгъэщт е кIэрытыщт сурэт ятIэм хэпшIыкIыныр сыдэущтэу угу къэкIыгъа?
— ЯтIэр шъабэ, фабэ, ятIэр — сичIыгу, ащ сытет, сигъогу рэкIо, ащ сегъашхэ, ащ къыхэкIыгъэ гъомылэр мыхьамелэу къысIофэ, ятIэм зэкIэми тыхэхьажьыщт. ЦIыфым игъашIэ епхыгъ ятIэм. ЕтIани тэ, хэхэс щыIакIэм къыщытэджыгъэхэмкIэ, чIыгужъыр, ащ иетIэ шIуцIэ идэхагъэ бэрэ ттхьакIумэ итыгъ. Иорданием ичIыгу шъошIэ зыфэдэр, ар пшэхъо чIыгу, титэтэжъхэр егъашIэм етIэ шIуцIэм теуцонхэр, тетIысхьанхэр ягугъоу дунаим ехыжьыгъэх. Агъотыгъагъэмэ черноземыр, джары инджылызыбзэкIи етIэ шIуцIэм ыцIэр — чернозем, тегъолъхьанхэшъ, чэщым щычъыещтыгъэх къысшIошIы. Ащ фэдизэу шIу алъэгъурэ етIэ шIуцIэр сэри шIу сагъэлъэгъугъ. УдэлэжьэнкIэ мы пкъыгъор Iэрыфэгъу, къэпщэфын ищыкIагъэп, уеIэбэхымэ къэпштэщт, ищыкIэгъэ псыр ебгъэгъотынышъ, зэхэзыгъэпкIэщтыр хэплъхьанышъ, узфэе пкъыр, теплъэр хэпшIыкIыщт. Арышъ, сикIас сэ ятIэр, ишIуцIашъуи сыгу рехьы. Мы сурэтхэр зыхэсшIыкIыгъэ ятIэр сятэжъ пIашъэхэм алъапсэ къызщежьэрэ къуаджэу Анзурей къыдэсхыгъ.
— Апэу уиIэрышIыгъэхэр зэрэплъэгъоу «зы тхьамыкIагъо горэ, зы гукIодыгъо горэ къыIонэу фэягъ мыхэр зышIыгъэхэм» оIо. Шъор ары аущтэу озыгъаIорэр. ШIуцIашъох зэкIэри.
— Адыгэ лъэпкъым къыщышIыгъэр кIодыгъэп, ар бгъэбылъышъущтэп, ар хэкум исхэм анахь лъэшэу, щэбзащэу шъхьэкуцIым хэсагъэу хэхэс адыгэм къыздырехьакIы. Тихэку тыпэчыжьэу тэ тыкъызэрэтэджыгъэм зыгорэ къытщыкIэ зэпытэу зэхэшIэ пытэ къытхилъхьагъ. СурэтышIыр игупшысэ блэIэбыкIышъущтэп, сэ лъэпкъ тарихъэу зэхэсшIагъэр къэзгъэлъэгъуагъ. Ау ащ къикIырэп зыгорэм сыфэгубжэу, зыгорэ пый сшIэу, «тагъэкIодыгъ тэ» сIоу. ШIуцIашъоми нэмыкIынэкIэ сеплъы. Ар тхьамыкIагъом ышъоу слъытэрэп. ШIуцIэ гущыIэр зэхэпфымэ, шIу-цIэ, урысыбзэкIэ «хорошее, доброе имя», инджылызыбзэкIэ «good nime». Ащ фэдэу цIэ дэгъу зыфаусыгъэ шъом угу зыгъэкIодын къэбар ыгъэIоу пIонэу щытэп. ШIуцIэр тятэжъхэм, тинанэхэм якIэсагъ. Яшъуаши, япаIуи, яши — зэкIэ шIуцIагъэх. Мыр адыгэ эстетик, адыгэ нэпэеплъ стиль, джары сэ зэрэслъытэрэр.
— Бэрзэдж, бэрэ къэоIо «сэ адыгэ искусствэп згъэлъагъорэр, сызлъыхъурэри, къисIотыкIынэу сызыфаери адыгэ эстетикэр ары». Сыд ащ къикIырэр?
— Искусствэр ины, шъуамбгъо. Ар IэпэIэсэныгъ, дэхагъ, лъэгъуныгъ. Эстетикэр — ар шэн-зекIуакI, хабзэ, гъэпсыкI. Лъэпкъ пэпчъ ежьым иеу иI хабзэ, зэрыгъозэрэ гъогу, ишэн елъытыгъэу изекIуакIэ, иунэ зэIухыкIэ, ифэпакIэ къыхехы. Джар эстетика. Адыгэхэм ядунэететыкIэ, яеплъыкIэ, яIэпэIэсэныгъэ илъэс 200 ыпэкIэ псэугъэ тхакIохэм бэрэ къатхыхьагъ, щысэ атепхынэу зэрэзекIощтыгъэхэри, зызэрашIыщтыгъэри, зэрахьэрэ Iэмэ-псымэхэр зыфэдагъэхэри яхабзэ елъытыгъэу гъэпсыгъагъэх. Ау нэужым сыд тиэстетикэ къырыкIуагъэр, хахъо иIагъа, хьауми хэкIыгъа? Ар гъэунэфыжьы- гъэн фае. Илъэсишъэ заом хэтыгъэх, нэужым зэбгырыкIыгъэх, Хэкум пэIапчъэ хъугъэх, яIэпэщысэхэр агъэдэхэнхэр е сурэт ашIэу щысынхэр ашIоIофыгъэп, псаоу къызэрэнэщтхэр, ябынхэр зэраухъумэщтхэр, ашхыщтыр, зыщыпсэущтхэр зэрэзэрагъэгъотыщтыр ары ашIоIофыгъэр. Арышъ, адыгэ эстетикэм хахъоу ышIын ылъэкIыщтыгъэр тэ джыри тшIэрэп.
— Уикъэгъэлъэгъон цIэу фэпшIыгъэр «ЩыIэн-зэдыщыIэныгъ». Хэт е сыд зэдыщыIэн фаеу плъытэрэр?
— ЗэкIэми апэу ежь цIыфыр зыдэпсэужьын фае. Хэтрэ цIыфи нэбгыритIу кIоцIытым фэд. ШIум е ем уфэкIощта? А зэхашIэхэр зэрэшхыхэу къыхэкIы, гур тIо гощыгъэ мэхъу. Апшъэ хъущтым елъытыгъ узтетыщт гъогур. Мары сэ Америкэм, лъэпкъ зэхашIэ зимыIэ къэралыгъом, культурэ пчъагъэхэр, дин зэфэшъхьафхэр зыщызэхэкIухьагъэм сыкъыщытэджыгъ. Сыхэт сэ? Сыамериканца, хьауми сыадыга? Сыбыслъымэна? Сихэку тара? Сыкъызщыхъугъэр е силъэпкъ зыдэщыIэ чIыналъэр ара? А упчIэхэр шъхьэм къыщекIокIых. Джэуапхэр зэбгъэзэгъынхэ, зэбгъэкIунхэ фае. АпэрэмкIэ, о уздэпсэужьын фае, ащ ыуж узхэт дунаим, укъэзыуцухьэрэ лъэпкъхэм якультурэ, ядин, ашъо ямылъытыгъэу уязэгъызэ, ау уахэмыкIуакIэу, убзи, уихабзи къэбгъэгъунэхэзэ упсэун фае. Джары сэ къасIо сшIоигъор.
— Уисурэтхэр ямышIыкIэх, иных, ятIэм фэшъхьафэу бзыхьафхэр, гъучIыр, пхъэр огъэфедэх. КIэсэнэу уисурэтхэр зытетхэр гъэшIэгъоных. Пхъэ хэупкIыгъэ дэдэх пIонэу щытхэп.
— МэшIокур зэрыкIорэ гъогум къыхэсшыпыкIыгъэх а пхъэмбгъу кIэсэнхэр. Амыгъэфедэжьэу, чIадзыжьыгъэ гъогухэр къэсэгъотхэшъ, ахэм къахэсэхых. Мы пхъэм ыкIышъо, ымэ сыгу рехьых. ЕтIани мэшIокури титарихъ хэщагъэу щыт. Балкан хэгъэгухэм къарагъэкIыхи Иорданием, Сирием кощыгъэгъэ тятэжъ пIашъэхэр мэшIокукIэ ащэгъагъэх.
— Мы пхъэмбгъу кIэсэнхэм адыгэ тамыгъэхэр атебдзи, уикъэгъэлъэгъон игупчэ ибгъэуцогъэ арт-псэуалъэм, къысфэгъэгъу, къэхалъэ сыгу къегъэкIы, къэм тырагъэуцорэ саугъэтхэм афэд.
— Тэрэз узэрегупшысагъэр. Мыр лIыхъужъхэм якъэхалъ, шъыпкъэу къэсIон, зигукъэкIыр сшынахьыкIэу Джабагъ. ШъошIэ, ари сурэтышI. Къэгъэлъэгъоныр згъэхьазыры зэхъум, игухэлъкIэ къыздэгощагъ. Адыгэ лIыхъужъхэу Кавказ заом хэкIодагъэхэм ятамыгъэхэр зытет пхъэмбгъу кIэсэнхэр сурэтхэм ягъусэмэ дэгъугъэу ылъытагъ. Джаущтэу тиIофшIагъэхэр зэхэтлъхьагъэу хъугъэ.
— Джабагърэ орырэ шъузэдэлажьэ бэшIагъэу, ара Москва укъэзыщэжьыгъэр?
— Ащ сыкъыщэжьыпагъ пIонэу щытэп. Джабагъэ Нью-Йорк сурэтшIыным щыфеджагъ. Сэ сэнэхьатэу зэзгъэгъотыгъэр политологиер ары. 1990-рэ илъэсхэм дунаим зэблэхъуныгъэхэр фэхъугъэх, Берлин дэпкъыр Iуахыжьыгъ, Советскэ Союзыр зэбгырызыгъ, араб хэгъэгухэр къэбырсырыгъэх. ЦIыфхэм яфитыныгъэхэр къэсыухъумэнхэу сыфэягъ. Ащ елъытыгъэуи дунэе зэфыщытыкIэ-гъэпсыкIэр зэзгъэшIагъ, хабзэу щыIэхэр сыушэтыгъэх. Университетыр къызысэухым ООН-м сыщылэжьагъ. Ау сурэтшIыныр сицIыкIугъом щегъэжьагъэу сикIэсагъ. Зыгъэпсэфыгъо уахътэ сыкIуагъэу сятэ, ащыгъум ар джыри псаугъэ, Джабагъ икъэбар сыкIэупчIэнэу Урысыем сыкъыгъэкIуагъ. Ащыгъум ар Англием къыращи, Москва рагъэблэгъагъэу Iоф щишIэщтыгъэ. Журнал цIэрыIохэм сурэтхэр афытырихыщтыгъэ. ИIофшIэн зэрэзэпыфэрэр слъэгъугъэ, джыри хигъэхъон ыгу хэлъыгъ. Тызэдегупшыси, тятэ-тянэхэри упчIэжьэгъу тшIыхи, сэри Москва сыкъыдэнэнэу итхъухьагъ. Джабагърэ сэрырэ сурэт гъэлъэгъуапIэ къызэIутхыгъ, Кавказым исурэтышIхэм яIофшIагъэхэр къэлэ гупчэм щыдгъэлъэгъонхэр тигугъугъ. ЫкIи тигухэлъ къыддэхъугъ. Илъэс 17 хъугъэ сэ Москва сызщыпсэурэр ыкIи сызщылажьэрэр. ЩыIакIэм сесагъ, сыщычъэпхъыгъ пIоми хъущт, сыкъызэкIом илъэс 30 сыныбжьыгъэр.
— Джабагъэ нэмыкIэуи шитIу зэрэуиIэр сэшIэ. Ахэм ягугъу къытфэшIыба.
— Апэ къакIорэр Нарт. Ар сянэ лъэхэсэу Нью-Джерси щэпсэу, Паттерсон ипрокуратурэ Iоф щешIэ. Ащ сэ сыкъыкIэлъэкIо, етIанэ Биберт къэкIо, ар спортым пылъ, футболымкIэ тренерэу Iоф ешIэ, Налщыки Мыекъуапи яфутбол купхэм адэлэжьагъ, анахьыкIэр Джабагъ.
— Америкэм сэ сыкъызэкIом, ныбжьыкIэхэр адыгабзэкIэ гущыIэу зэхэсхыгъэп. Шъо зэшиплIыми адыгабзэр дэгъоу шъошIэ.
— Тэ тилэгъоу Америкэм щыпсэухэрэм ныдэлъфыбзэр ашIэ, ныбжьыкIэхэм къафэкъин, инджылызыбзэм дехьыхых. Сыфаеп «бзэр мэкIоды» сIонэу, сыгу ыштэрэп ар, Нью-Джерси Адыгэ Хасэм зэрэфэлъэкIэу адыгабзэр тинахьыкIэхэм аригъэшIэным пылъ. Джы мары ИнтернетымкIи бзэр зэбгъэшIэшъущт, арышъ, сэгугъэ адыгэ хабзэр, бзэр, культурэр зышIогъэшIэгъоныщтхэр, зыухъумэщтхэр, лъызыгъэкIотэщтхэр нахьыбэ хъунхэу. Тэ тыпштэмэ, апэрэ бзэу тиунагъокIэ тагъэшIагъэр адыгабзэр ары. Иорданием къыщызэIуахыгъэ адыгэ еджапIэу принцэу Хьамзэ ыцIэ зыхьырэми тагъакIуи зы зэман горэм зэшхэм тыщырагъэджагъ. Ащ сыкъэтзэ, 1988-рэ илъэсым адыгабзэр дэгъоу зэрэсшIэрэм пае еджапIэм Хэкум сигъэкIогъагъ. НыбжьыкIэ гъэпсэфыпIэу «Орленок» зыфиIоу Налщык дэтыгъэм мазэрэ сыкъэтыгъ. Iошъхьэмафэ, Саусырыкъо слъэгъугъэх. Сятэрэ сянэрэ къысфаIуатэщтыгъэ Хэкур зыфэдэр пкIыхьапIэ слъэгъоуи къыхэкIыщтыгъ, илъэс 15 сыныбжьэу а зэпстэур нэфапIэ сфэхъу ыкIи джащ къыщегъэжьагъэу спсэ изы Iахьэу чIыгужъыр мэхъу. Непэ Москва сиIофшIэн зэрэщыIэм елъытыгъэу, а къалэм сыщэпсэу. Ау сикъоджэ гупсэу Анзурей, Къэбэртэе-Бэлъкъарым унэ щысщэфыгъ, зыгъэпсэфыгъо мафэхэр бэрэ щысэгъакIох.
— Сыд оркIэ Хэкур?
— Хэкур сэркIэ си ДНК, лъэу слъынтфэхэм арычъэрэр ары, Хэкур сянэрэ сятэрэ. Америкэми сыфэраз, ащ сыкъыщыхъугъ, гъэсэныгъэ дэгъу къыситыгъ, ари сиджагъоп. Ау уилъэпкъ зыдэщыIэ къуапэр IэшIу, угукIэ ущэгупсэфы, арышъ, Хэкум сыпэчыжьэнэу, арырэ сэрырэ тазфагу Хышхор илъэу сыпсэушъущтэп. Ар гъэнэфагъэ.
ГущыIэуж: Америкэ чыжьэм щапIугъэ кIалэу Зак Кахадо игушъхьэлэжьыгъэ апэ и Хэку гупсэ къыщигъэлъэгъуагъ. БлэкIыгъэмрэ джырэ уахътэмрэ зэзыпхыгъэ IофшIэгъэ 18 ащ Мыекъуапэ къыщагъ. Iоныгъом и 29-м нэс къэгъэлъэгъоным Iоф ышIэщт.
ТIэшъу Светлан. Адыгеим изаслуженнэ журналист.