Теуцожь Цыгъо къызыхъугъэр илъэси 166-рэ мэхъу
Насып Iахь
Хэтрэ цIыф лъэпкъи игугъэ-гукIаехэр, имэфэ гушIуагъохэр, игъэшIэ лъэбэкъухэр, уахътэу зыхэтыгъэр зыфэдагъэр, итарихъ къэзыIотэжьын ыкIи къэзытхыжьын зылъэкIыщт усэкIо-тхакIохэр къыхэкIых. Ахэм ащыщ адыгэ лъэпкъым иашугэу Теуцожь Цыгъо.
Ащ бэ ынэгу кIэкIыгъэр: къызыхэхъухьэгъэ я 19-рэ лIэшIэгъум иятIонэрэ ныкъуи, я XX-рэ лIэшIэгъукIэу ищыIэныгъэ нахьышIум фэзыщагъэу шIоигъор къыIон фитыныгъэр къезытыгъэу Октябрэ революциешхор, совет хэбзакIэу зэтеуцорэ къодыер. Къызыхъугъэм щегъэжьагъэу джэныкъо машIом пэсэу усэщтыгъэ Теуцожь Цыгъо иакъыллэжьыгъэ уасэ фэзышIыгъэр, усакIом ыцIэ лъагэу зыIэтыгъэр совет хабзэр ары, Цыгъо ыбзэ къытIэтэгъэ къодыеп, иусэн-гупшысэн лъэгъуакIэ теуцуагъ, ыбгъэ дэлъ гушIуагъор усэкIэ къеIо, адыгэм итарихъ куу хэз имыIэу, къыпчъызэ арегъэтхы.
Акъылышхо зыкъолъ нахьыжъышхом (илъэс 62-рэ ыныбжьыгъ Октябрэ революциер зыщэIэм) игупшысэ инкIэ адыгэ лъэпкъ жэрыIо творчествэмрэ литературэмрэ пытэу зэрипхыгъэх, щыIэкIакIэм, дунэякIэм агъэгушхоу, агъэразэу, гушIуагъор къыIутэкъоу мэусэ.
«Дунэежъым изэрэщытыгъэ щымыгъуазэм ДунэякIэм щыгъозэгъуае фэхъущт. Джырэ тидунай дышъэзэрыбл, Къытэлыжьэу насыпыр тIэгу илъ, Илъэс лъэбэкъухэр тфимыкъоу Мафэ къэс тыбакъоу тыублагъ. ГушIогъошхоу тэ тызхэтым Епэсыгъэ уасэ фэпшIыным пае, Ипэурэ зэманыжъэу тыкъызэрыкIыгъэр Зэрэщытыгъэр пшIэн фае», — къыщиIуагъ поэмэу «Пщы-оркъ заом» ипэублэ. Ар гупшысэшху.
Теуцожь Цыгъо ищыIэкIэ-псэукIагъэри адыгэ лэжьэкIо жъугъэмэ къарыкIуагъэр, ащэчыгъэу, апэкIэкIыгъэр ары. Ащ иорэдхэмрэ иусэхэмрэ янахьыбэр ежь Цыгъо ышъхьэ ехьылIагъ, ищыIэныгъэ щиушэтыгъэ закI, ау етIани ахэм мэкъумэщышIэхэм ягугъэ-гупшысэхэр, ягумэкIхэр къащиIотыкIыгъэх. Теуцожь Цыгъо ыусыгъэмэ анахь ащыкIэгъэтхъыгъ цIыф къызэрыкIо жъугъэхэм яIофшIакIэ, щыIэкIакIэм зэрэфэбанэхэрэр, шъхьафитныгъэр зэрагъотыгъэр, апэкIэ зэрэлъыкIуатэхэрэр.
Теуцожь Цыгъо Алый ыкъор шышъхьэIум и 15-м, 1855-рэ илъэсым къуаджэу Гъобэкъуае къыщыхъугъ. Мы уахътэр пщы-оркъ заор зыщагъэхьазырырэм ижъотыпIэ дэдагъ. А хъугъэ-шIагъэм (бжъэдыгъухэм ямызакъоу) адыгэ лъэпкъымкIэ мэхьанэшхо иIагъ. Цыгъо исабыигъом къыщегъэжьагъэу мэкъумэщышIэхэмрэ пщы-оркъхэмрэ язэпэуцужь-зэпыщыт къызэрэнэфагъэм, нэужым ахэр Пэнэжьыкъуае зэрэщызэзэуагъэхэм, лэжьэкIо жъугъэхэм яакъыл-гулъытэ къэущыгъэ къодыер армырэу, теубытагъэ хэлъэу зэфэдэныгъэм кIэдэухэ зэрэхъугъэм, хэти сыди ащ нахьыбэ апшъэ зэрэдамыгъэсыжьыщтым яшыхьат мы тарихъ хъугъэ-шIагъэр. Шъхьафитныгъэм фэбэнэным адыгэ лъэпкъыр къызэрэфэущыгъэр ащ ылъапс. Цыгъо ятэу Теуцожь Алый анахь тхьамыкIэу Гъобэкъуае дэсыгъэмэ ащыщыгъ. Ежь фэдэ цIыф жъугъэхэм афэдэу джары хым икIынхэшъ, нахь щыIэкIэ тэрэз лъыхъунхэм зыкIыфежьэгъагъэхэри. Ау Цыгъо сабый быдзэшъо хъыбэй дэдагъэти, хым Iухьагъэхэу янэ кIэгъожьи, къагъэзэжьыгъ. Гъобэкъуаехэм чIыгу укъэбзыгъэр афэмакIэти, унэгъуабэ къоджакIэу тIысырэм кIогъагъэх. Ар БжъэдыгъухьаблэкIэ зэджагъэхэр арыгъэ. Ау тхьамыкIэм ищыIакIэ ащи щызэхъокIыгъэп. ИлъэситIу ащ тешIагъэу Цыгъо ятэ лIи, Цыгъу, ышнахьыжъ, ышыпхъу цIыкIу янэу Цыу къылъэхэнагъэх. Исабыигъо зыфэдагъэр нэужым усакIом дэгъу дэдэу къыIожьыгъ — чыракIоу, цуаоу, уни тахъти ямыIэу, етIанэ, Iахьылхэр зэхэIаби чыиф унэ цIыкIу горэ афашIыгъ, ау зыхэтыгъэхэ хьазабыр Цыгъо щымыгъупшэжьэу ыгу хэжъэгъогъагъ. Ары амал зегъотым дунэежъымрэ кIэмрэ зэпигъэуцухэзэ зыкIэусэщтыгъэр. Анахьэу ыгу къэзыIэтыгъэр Октябрэшхор ары, дэкъацэм егъашIэм дэлъыгъэ цIыф жъугъэхэр нэ чанкIэ ащ икIэрыкIэу зэригъэплъыжьыгъэх. УсакIом ыбзи ащ нахь къыригъэтIэтагъ. Поэмэу «Пщы-оркъ заор» тхыгъэнымкIэ Пушкиныр къыдеIагъэу Цыгъо зэриIуагъэм хэлъ щыI. IэпыIэгъу лъэныкъуабэкIэ Цыгъо рагъэгъоты, къыIорэр зэкIэ атхынэу Хьаткъо Ахьмэд, КIэрэщэ Тембот ыкIи ахэм аужыIоу Кэстэнэ Дмитрий ыдэжь агъакIо. Пушкиным ипоэмэу «Полтава» адыгабзэкIэ зэдзэкIыгъэу зыфеджэхэм, Цыгъо игулъытэ бэ зынэсыгъэр, лъэшэу шIогъэшIэгъоныгъ ыкIи ыгу рихьыгъ. Урыс литературэшхом ианахь тхыгъэ дэгъухэм зэрэщагъэгъозагъэм адыгэ жэрыIо творчествэр дэгъоу зышIэщтыгъэ Цыгъо лъэшэу ишIуагъэ къекIыгъ — ипоэзие нэшэнэ гъэнэфагъэхэм атетэу ыгъэпсы мэхъу. Социальнэ лъэныкъомкIэ чанэу къыIорэр зэригъэпсырэм фэдэ къабзэу, художественнагъэм, жабзэм кIочIэшхо зэрахэлъыр зэхишIэ хъугъэ ыкIи а зэкIэ къыдилъытэмэ, къыгъэгъунэзэ усагъэ. Цыгъо иорэдхэр, иусэхэр зыщыщ лъэпкъым ыгу нэсыщтыгъэх, ежь усакIоми Тхьэм къыхилъхьагъэр лъэпкъым филэжьын фэягъэ. Совет хабзэм илъэхъан Цыгъо италант ин къэтIэмыгъ, игупшысэ зиIэтыгъ, ымэкъэ лъэш чыжьэу Iугъэ.
Поэмэу «Пщы-оркъ зау» зыфиIоу 1937 — 1938-рэ илъэсхэм зэхилъхьагъэр адыгэ литературэмкIэ апэрэ тарихъ произведениеу щыт. Ащ пае Теуцожь Цыгъо къэралыгъо наградэ лъапIэу орденэу ЛэжьэкIо Быракъ Плъыжьым иорден къыфагъэшъошэгъагъ. Мы илъэсым щегъэжьагъэу ар СССР-м итхакIохэм я Союз хэтыгъ. 1935-рэ илъэсым адыгэ тхакIохэм, 1936-рэ илъэсым (ашугхэм краимкIэ яконференцие), яа 1-рэ Зэфэс Цыгъо ахэлэжьагъ. УсэкIошхор Адыгеим имызакъоу, краим, Москва, Темыр Кавказым ащызэлъашIагъ. 1939-рэ илъэсым лэжьакIохэм яхэку Совет идепутатэу ар хадзыгъагъ. Итворчествэ зеубгъу, поэмэхэу «Мафэкъо Урысбый», «Родинэр», усэхэу «Пушкин», «Москва», «Кремль», «Насып», нэмыкIхэри зэхелъхьэх. Цыгъо Москва зэрэщыIагъэм, ащ Хэгъэгу пащэхэм шъхьэкIафэу къыщыфашIыгъэм лъэшэу ыгу зыкъырагъэIэтыгъ. Унэ дахи къыфашIи, ыIотэжьыгъ, ипоэзие тами лъагэу зиIэтыгъ.
Теуцожь Цыгъо щылэ мазэм и 26-м, 1940-рэ илъэсым къуаджэу Пэнэжьыкъуае щылIагъ, и 29-м ащ щагъэтIылъыжьыгъ. Адыгэ лъэпкъым иорэдыIо ин шIокIодыгъ, ау ыусыгъэхэр зэкIэ мыкIодыжьыщт орэдхэу къэнагъэх.
Теуцожь Цыгъо литературнэ Унэ-музей икъуаджэу Гъобэкъуае 1980-рэ илъэсым, чъэпыогъум къыщыфызэIуахыгъ. Мыгъэ Теуцожь Цыгъо къызыхъугъэр илъэси 166-рэ мэхъу, ишIушIагъэ гъунэнчъ.
Мамырыкъо Нуриет.