Нарт батырхэм ящысэшIу
Хэгъэгум иныбжьыкIэхэм я Гъэмэфэ спартакиадэ хэхьэрэ кIэух зэнэкъокъухэр гъэшIэгъонэу макIох.
Адыгэ Республикэм атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм зыщызыгъэсэрэ нарт батырхэм тагъэгушIуагъ.
Я V-рэ Гъэмэфэ спартакиадэм икIэух зэнэкъокъоу Анэпэ районым щыкIуагъэм Урысыем ишъолъырхэм къарыкIыгъэхэм яIэпэIэсэныгъэ къыщагъэлъэгъуагъ.
Кощхьаблэ щапIугъэ Дзэсэжъ Аслъан килограмм 67-м нэс къэзыщэчыхэрэм янэкъокъугъ. Нарт шъаом тIоштэгъукIэ кг 276-рэ (123+153) къыIэти, апэрэ чIыпIэр спартакиадэм къыщыдихыгъ.
Щылычым ебэни дышъэр къызыфагъэшъошэгъэ кощхьэблэ батырыр Адыгэ къэралыгъо университетым физкультурэмрэ дзюдомрэкIэ и Институт щеджэ.
— Дзэсэжъ Аслъан сэнаущыгъэ ин зыхэлъ спортсмен, хэгъэгум изэнэкъокъухэм хагъэунэфыкIырэ чIыпIэхэр пчъагъэрэ къащыдихыгъ, — къытиIуагъ Институтым ипащэу Бгъуашэ Айдэмыр. — Аслъан атлетикэ онтэгъумкIэ зэIукIэгъухэм медальхэр къызэращихьыхэрэм дакIоу, дэгъоу еджэ, общественнэ пшъэрылъхэр егъэцакIэх. НыбжьыкIэхэм ар щысэшIу афэхъу.
Анэпэ районым щыкIогъэ спартакиадэм Хъыщт Хьазрэтбый, кг 61-рэ, ящэнэрэ чIыпIэр къыщихьыгъ. ТIоштэгъукIэ кг 215-рэ (100+115) къыIэтыгъ.
А. Дзэсэжъымрэ Хь. Хъыщтымрэ ятренерэу, спортымкIэ дунэе класс зиIэ мастерэу Сихъу Аслъан зэрилъытэрэмкIэ, къуаджэм щезыгъэжьэгъэ кIалэхэу спортым яшъыпкъэу пылъхэм яIэпэIэсэныгъэ хэпшIыкIэу хагъахъо. Дзэсэжъ Аслъан гуетыныгъэу хэлъыр зэнэкъокъухэм къащегъэлъагъо.
— Физкультурникым и Мафэ тыпэгъокIызэ, гъэхъагъэу тиIэр зэфэтэхьысыжьы, — къеIуатэ Адыгэ Республикэм атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм ипащэу, спортымкIэ дунэе класс зиIэ мастерэу Сихъу Рэмэзан. – Дзэсэжъ Аслъан, Хъыщт Хьазрэтбый спартакиадэм чанэу хэлэжьагъэх. 2021-рэ илъэсым хэгъэгум изэнэкъокъу Артем Горловым дышъэр къыщихьыгъ. Елизавета Толмачевам хагъэунэфыкIырэ чIыпIэхэр зэIукIэгъухэм къащыдихыгъ.
Республикэм ирайонхэм, Мыекъуапэ ащыкIощт зэнэкъокъухэм спортсменхэм зафагъэхьазыры. Физкультурникым и Мафэ ыуж Адыгэ Республикэр илъэс 30 зэрэхъурэм, къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм афэгъэхьыгъэ зэIукIэгъухэм ахэлэжьэщтых, хэгъэгум изэIукIэгъухэу щыIэщтхэм зафагъэхьазыры.