Адыгеим и ЛIышъхьэу КъумпIыл Мурат Тэхъутэмыкъое районым зэкIом, лъэпкъ проектхэмрэ къэралыгъо программэхэмрэ къадыхэлъытэгъэ социальнэ псэолъэ заулэмэ яшIынрэ ягъэцэкIэжьынрэ зэрэкIорэр ыуплъэкIугъ.

Адыгеим ипащэ игъусагъэх Урысые Федерацием и Президент и Полномочнэ лIыкIоу ЮФО-м щыIэм иаппарат Адыгэ РеспубликэмкIэ ифедеральнэ инспектор шъхьаIэу Сергей Дрокиныр, Адыгэ Республикэм и Премьер-министрэу Геннадий Митрофановыр, Адыгэ Респуб­ликэм гъэсэныгъэмрэ шIэны­гъэм­рэкIэ иминистрэу КIэрэщэ Анзаур, Адыгэ Республикэм культурэмкIэ иминистрэу Аулъэ Юрэ, Адыгэ Республикэм псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэ иапэ­рэ гуадзэу Лафышъ Рэмэзан, Тэхъутэмыкъое районым ипащэу Шъхьэлэхъо Азмэт. Апэу ахэр къызыщыуцугъэхэр культурэмкIэ Унэу поселкэу Прикубанскэм дэтыр ары. Николай Погодиныр япащэу культурэ Iофтхьэбзэ зэфэшъхьафхэр мыщ щызэхащэх, кIэлэцIыкIухэм ятворчествэ зыкъызэIуихынымкIэ амалхэр щызэрахьэх.

БлэкIыгъэ лIэшIэгъум ия 60-рэ илъэсхэм агъэпсыгъэ унэр бэшIагъэ загъэцэкIэжьын фаеу щытыгъэр. Лъэпкъ проектэу «Культура» зыфиIорэм ащ фэдэ амал къаритыгъ. Адыгеим и ЛIышъхьэ гъэцэкIэжьын IофшIэнхэр зэрэкIорэм зыщигъэгъозагъ. КультурэмкIэ Унэм шъхьаныгъуп­чъакIэхэр хагъэуцуагъэх, унашъ­хьэр, электрогъучIычхэр, псырыкIуапIэр зэблахъугъэх. ГъэцэкIэжьын IофшIэнхэм япроцент 85-р зэшIуахыгъах.

Фирмэ-подрядчикэу ООО-у «Юг-Строй-Сервис» зыфиIорэм илIыкIохэм Iоныгъом и 1-м ехъулIэу IофшIэнхэр аухынхэу къагъэгугъагъэх. КъумпIыл Мурат Адыгэ Республикэм культурэмкIэ и Министерствэ пшъэ­рылъ фишIыгъ культурэмкIэ Унэм оборудованиякIэ чIагъэуцоным гъунэ лъифынэу. Джащ фэдэу къоджэ псэупIэмрэ ащ идэхьапIэрэ нахь зэтегъэпсыхьэгъэнхэм фэгъэхьыгъэу Адыгеим и ЛIышъхьэ районым иIэшъ­хьэтетхэми, республикэм псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ и Министерствэ ипащэхэми адэгущыIагъ.

Джащ фэдэу КъумпIыл Мурат культурэмкIэ Унэу къуаджэу Псэйтыку щагъэпсырэми щы­Iагъ. Унэжъыр 2004-рэ илъэсым акъутэжьыгъ. Джащ къыщегъэ­жьагъэу культурэмкIэ Унэр къоджэ гурыт еджапIэу N 8-м чIэт. Мыгъэ лъэпкъ проектэу «Культура» зыфиIорэм къыдыхэ­лъытагъэу культурэмкIэ унакIэм ишIын фежьагъэх. Ащ пае бюджет зэфэшъхьафхэми сомэ мил­лион 40-м ехъу къахагъэкIыгъ. Псэуалъэр зыгъэпсырэр ООО-у «МонолитСталь-Строй» зыфи­Iорэр ары. Унэ лъапсэр агъэ­чъэу, квадрат метрэ 700 фэдиз зэлъызыубытыщт унэм идэпкъхэр аIэтхэу рагъэжьагъ.

Нэбгырэ 250-мэ ателъытэгъэ залрэ сценэрэ ащ хэтыщтых, культурэмкIэ Унэм почтэри къы­дычIэтыщт. Мы илъэсым шэкIогъум и 30-м ехъулIэу псэуалъэр атынэу рахъухьэ. Iоф­шIэнхэр нахь агъэпсынкIэнэу Адыгеим и ЛIышъхьэ пшъэрылъ афишIыгъ.

Джащ фэдэу КъумпIыл Мурат къэлэ гъэпсыкIэ зиIэ поселкэу Яблоновскэм дэт гурыт еджапIэу N 5-м гъэцэкIэжьын Iоф­шIэнхэр зэрэщыкIохэрэм зыщигъэгъозагъ. Мы еджапIэр Урысыем игурыт еджэпIэ анахь дэгъуи 100-мэ язэнэкъокъу щытекIуагъ, 2017-рэ илъэсым къыщегъэжьагъэу пIуныгъэ IофымкIэ республикэ инновационнэ площадкэу щыт. Илъэс къэси кIэлэеджакIохэм япчъагъэ хэхъо. МылъкукIи, техникэкIи ар нахьышIоу зэтегъэпсыхьэгъэ­ным пае бюджетхэм сомэ мил­лион 37-рэ фэдиз къахагъэ­кIыгъ. ТапэкIэ гурыт еджапIэм ишхапIэ агъэцэкIэжьыгъагъ, джырэ шапхъэхэм адиштэрэ техническэ оборудованиер чIагъэуцогъагъ. Джыдэдэм пчъэхэмрэ шъхьаныгъупчъэхэмрэ зэблахъух. Джащ фэдэу псэолъэшIхэм рахъухьэ электрогъучIычхэр, псырыкIуапIэхэр зэблахъунхэу. Мы илъэ­сым Iоныгъом ехъулIэу гъэцэкIэ­жьын IофшIэнхэр аухынэу щыт.

Адыгеим и ЛIышъхьэ IофшIэнхэр ипIалъэм агъэцэкIэнхэу, илъэсыкIэ еджэгъум ехъулIэу ахэр аухынхэу пшъэрылъ афи­шIыгъ. Джащ фэдэу гурыт еджа­пIэм ищыкIэгъэ оборудованиер чIагъэуцонэу, ащ къыпэIулъ чIыпIэр зэтырагъэпсыхьанэу пшъэрылъ афишIыгъ.

«Социальнэ мэхьанэ зиIэ псэуалъэхэм ягъэцэкIэжьынрэ яшIынрэ япхыгъэ Iофыгъохэм лъэныкъо пстэури къыдалъы­тэзэ якIолIэгъэн фае. Проект­хэр зэхагъэуцохэ зыхъукIэ зэкIэри къыдалъытэн, чIыпIэ­рысхэм яшIоигъоныгъэхэм атетэу IофшIэнхэр рагъэкIо­кIынхэ, республикэм хэхъоныгъэ егъэшIыгъэным тегъэ­псыхьагъэу IофшIэнхэр дэ­гъоу зэхащэнхэ, мылъкур шIуагъэ къытэу агъэфедэн фае», — къыхигъэщыгъ КъумпIыл Мурат. АР-м и ЛIышъхьэ ипресс-къулыкъу