Урысыем иныбжьыкIэхэм яя V-рэ Гъэмэфэ спартакиадэ хахьэхэрэ кIэух зэIукIэгъухэр шышъхьэIум и 7-8-м Ермэлхьаблэ щыкIуагъэх.

Адыгэ Республикэм дзюдомкIэ ихэшыпыкIыгъэ командэ хэтхэу бэнэкIуи 3 зэIукIэгъухэм ахэлэжьагъ.

— Хэгъэгум ишъолъыр 35-мэ яныбжьыкIэхэр медальхэм якъы­дэхын щызэнэкъокъугъэх, — къы­тиIуагъ Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, республикэм изаслуженнэ тренерэу Бастэ Сэлымэ. — Адыгеим икомандэ я 11-рэ чIыпIэр къы­хьыгъ, бэнэкIуи 2-мэ медальхэр къафагъэшъошагъэх.

Татьяна Шаталовам, кг 52-рэ, тыжьыныр къыдихыгъ. Адыгэ Республикэм изаслуженнэ тренерэу Нэпсэу Бислъанрэ тренерэу Валентина Козловамрэ Т. Шаталовар дзюдом фагъасэ.

Бэгъ Аслъан, кг 100, джэрзыр къыхьыгъ. Адыгэ Республикэм изаслуженнэ тренерэу Беданыкъо Рэмэзанрэ тренерэу Роман Оробцовымрэ нарт шъаоу Бэгъ Аслъан ипащэх.

Мыгу Меланэ, кг 78-рэ, я 5-рэ чIыпIэр спартакиадэм къыщыдихыгъ. Урысыем изаслуженнэ тренерэу Беданыкъо Байзэтрэ тренерэу Мерэм Саидэрэ М. Мыгур спорт бэнакIэм фа­гъасэ.