Астрахань хэкум и Губернатор и Кубок къыдэхыгъэным фэгъэхьыгъэ зэнэкъокъум гандбол бзылъфыгъэ командэхэр щызэIукIагъэх.

— Азербайджан, Адыгеим, Астрахань хэкум яспортсменкэхэм язэIукIэгъухэм тахэлэжьагъ, — къытиIуагъ Мыекъопэ гандбол командэу «АГУ-Адыифым» итренер шъхьаIэу, Урысыем изаслуженнэ тренерэу Александр Реввэ. — 2021 — 2022-рэ илъэс зэнэкъо­къум нахьышIоу зыфэдгъэхьазырыным фэшI Астрахань тызэрэщешIагъэм шIуагъэ къытфихьыгъэу сэлъытэ.

«АГУ-Адыифыр» Азербайджан икомандэ 47:20-у текIуагъ. Урысыем икомандэ цIэрыIоу «Астраханочкэм» «АГУ-Адыифыр» тIогъогогъо IукIагъ. Апэрэ ешIэгъур 36:29-у (15:15) «Астраханочкэм» ыхьыгъ. ЯтIонэрэ зэIукIэгъуми «Астраханочкэм» текIоныгъэр къыщыдихыгъ — 43:30.

ШышъхьэIум и 27 — 28-м «Адыифым» ныбджэгъу ешIэгъуи 2 Мыекъуапэ щыриIэщт. Ставрополь икомандэ IукIэщт. «Кубань» Краснодар дешIэнэу «Адыифым» зегъэхьазыры, уахътэр джыри гъэнэфагъэгоп.

Iоныгъо мазэм и 11-м Урысыем гандболымкIэ изэнэкъокъоу суперлигэм щыкIорэр рагъэ­жьэщт. «Адыифыр» «Луч» Москва Мыекъуапэ щыIукIэщт.