Банкым е нэмыкIэу кредит зытырэ организациехэм ахъщэ къаIихыгъэу зымытыжьышъугъэхэм е нэмыкI чIыфэ зытелъхэм ар аIахыжьы зыхъукIэ зэрыпсэунхэ къафэгъэнэгъэным фэгъэхьыгъэ законопроектым кIэщакIо фэхъугъэр УФ-м и Президентэу Владимир Путиныр ары. Илъэсэу тызхэтым игъэтхэпэ мазэ УФ-м и Къэралыгъо Думэрэ Правительствэмрэ ар зэдагъэхьазырынэу пшъэрылъ къафишIыгъагъ.

ЦIыфым чIыфэр игъом ымытыжьышъумэ, иIоф хьыкумыр хэплъэнэу тхылъхэр ратых, ащ рихъухьагъэр нэужым пристав­хэм аIэкIахьэ. Ахэм чIыфэр зытелъым исчет къихьэрэ ахъщэм хахызэ къызIихыгъэм раты­жьы. Ащ фэдэу зыIахыжьхэрэм зэрыпсэун зыпари къызфэмы­нэжьэу къахэкIырэр бэ. Ащ те­тэу цIыфхэм хэкIыпIэ ямыIэ­жьэу къамыгъэнэнхэр, узэрыпсэун плъэкIыщт ахъщэ анахь макIэм фэдизыр къа­фэухъумэгъэныр ары къэралыгъом ипащэ зигугъу къышIыгъа­гъэр.

Хэбзэгъэуцухэми мы Iофыр нахьыпэкIэ къаIэтыгъагъ. Урысые политическэ партиеу «Единая Россия» зыфиIорэр ащ фэдэ законопроектым кIэщакIо фэхъугъагъ. Ащ ыпэкIэ социальнэ ахъщэ тынхэр аубытынхэ фимытхэу къызщиIорэ хэбзэгъэуцугъэу аштагъэм блэкIыгъэ 2020-рэ илъэсым игъэмафэ кIуачIэ иIэ хъугъэ.

Джы ащ фэдэ ахъщэ тынхэм тамыгъэ гъэнэфагъэ яIэу щыт, приставхэм ахэр аштэнхэ алъэ­кIыщтэп. Унагъор зыIыгъыгъэр дунаим зэрехыжьыгъэм пае къатырэ ахъщэр, ошIэ-дэмышIэ Iофхэм зэрар зэрахыгъэхэм къафэкIорэ ахъщэ тынхэр, нэмыкI пособиехэр ащ къыхеубытэх.

Хэбзэгъэуцугъэу мыгъэ Президентыр кIэщакIо зыфэхъугъэ­ри аштагъ. УФ-м и Гражданскэ кодекс ыкIи «Исполнительнэ производствэм фэгъэхьыгъ» зыфиIорэ федеральнэ хэбзэгъэу­цугъэм зэхъокIыныгъэу фашIыгъэхэм яшIуагъэкIэ хьыкум при­ставхэм чIыфэ зытелъым ар къызыIахыжькIэ цIыфыр зэры­псэун ылъэкIыщт ахъщэ анахь макIэм къыщымыкIэу мазэм къыфагъэнэн фаеу хъугъэ.