IэпэIасэхэм, ансамблэхэм тагъэгушIо
Адыгэ Республикэмрэ къалэу Москварэ зэдэлэжьэныгъэм фэгъэхьыгъэ зэзэгъыныгъэу зэдыряIэм ыпкъ къикIэу фестивалым Адыгеир рагъэблэгъагъ.
Славян искусствэм фэгъэхьыгъэ я X-рэ фестивалэу «Русское поле» зыфиIорэр онлайн шIыкIэм тетэу зэхащагъ. Урыс пачъыхьэу Александр Невскэр къызыхъугъэр илъэс 800 зэрэхъугъэм ехьылIэгъэ фестивалым шъолъырхэр хэлэжьагъэх.
Лъэпкъ музыкальнэ Iэмэ-псымэхэмкIэ адыгэ ансамблэу «Уджым» фестивалым я 3-рэ чIыпIэр къыщыдихыгъ. Шъолъырхэм ябрендхэм уасэ афэшIыгъэнымкIэ фестивалыр гъэшIэгъонэу кIуагъэ. Е. В. Богоявленскэр зипэщэ купым адыгэ къуаер къыщигъэлъэгъуагъ, я 3-рэ чIыпIэр къыхьыгъ.
IэпэIасэхэм язэнэкъокъоу «Самый длинный рушник» зыфиIорэм Адыгеим щыщхэу Абрэдж Гощэфыжьрэ Теуцожь Фатимэрэ яшIэныгъэ къыщагъэлъэгъуагъ. Адыгеим иIэпэIасэхэм ашIыгъэ пкъыгъор метрэ 210-рэ сантиметрэ 35-рэ хъугъэ. Ар дунаимкIэ анахь ин хъугъэу къыхахыгъ, Гиннесс итхылъ дагъэхьащт.
Фестивалым адыгэ къэшъокIо ансамблэу «Синдикэр», зэхэт IофшIапIэу «Ошъадэр», лъэпкъ IэпэIасэхэу Гумэ Ларисэ, ЛIышэ Ахьмэд, ПIатыкъохэу Айдэмыр ыкIи Аскэр хэлэжьагъэх, щытхъу тхылъхэр къафагъэшъошагъэх.
Адыгэ Республикэм культурэмкIэ и Министерствэ зэхэщэн Iофыгъохэр дэгъоу ыгъэцэкIагъэх. ТиIэпэIасэхэм, артистхэм тагъэгушIуагъ. Сахьидэкъо Нурбый.