Адыгеим и ЛIышъхьэу КъумпIыл Мурат республикэм пэIудзыгъэ псэупIэхэм Iоф ащашIэным пае санитарнэ автомобилыкIэхэр муниципалитетхэм зэраратыгъэхэм епхыгъэ Iофтхьабзэм тыгъуасэ хэлэжьагъ.

Урысые Федерацием и Президентэу Владимир Путиным пшъэрылъхэу къафишIыгъэхэм атегъэпсыхьагъэу псауныгъэм икъэухъумэнкIэ «пэублэ звенэ­кIэ» заджэхэрэр гъэкIэжьыгъэн­хэм пае республикэ программэм къыдыхэлъытагъэу машинэ псынкIи 9 къаIэкIэхьагъ. Транспортэу къаратыгъэр Мыекъопэ, Джэджэ, Кощхьэблэ, Шэуджэн ыкIи Теуцожь районхэм ямед­учреждениехэм аIэкIагъэхьагъ.

Мы Iофтхьабзэм хэлэжьагъэх Урысые Федерацием и Къэралыгъо Думэ Адыгеим ыцIэкIэ идепутатэу Хьасанэкъо Мурат, Адыгэ Республикэм псауныгъэм икъэухъумэнкIэ иминистрэу Мэрэтыкъо Рустем, район сы­мэджэщхэм яврач шъхьаIэхэр ыкIи яIофышIэхэр.

Адыгеим и ЛIышъхьэ медицинэм иIофышIэхэм гущыIэгъу зафэхъум ахэм Iофэу ашIэрэм мэхьанэу иIэр къыхигъэщыгъ, медицинэ фэIо-фашIэхэр ренэу нахьышIоу зэхащэнхэ ыкIи нэбгырэ пэпчъ икъоу анаIэ тырагъэтын, IэпыIэгъу афэхъунхэ зэрэфаер къыIуагъ.

Коронавируснэ инфекцием зызыщиушъомбгъурэ лъэхъаным, унэхэм арыс сымаджэхэм япчъа­гъэ нахьыбэ зэрэхъурэм къыхэкIэу, медицинэ IэпыIэгъур игъом ыкIи зэрищыкIагъэм тетэу ятыгъэным КъумпIыл Мурат анаIэ тыраригъэдзагъ.

Адыгэ Республикэм псауныгъэм икъэухъумэнкIэ иминистрэ къызэриIуагъэмкIэ, санитарнэ автопаркыр нахьыбэ зашIыкIэ, къуаджэхэм ащыпсэухэрэм медицинэ IэпыIэгъу игъом аIэ­кIэгъэхьэгъэнымкIэ ишIогъэшхо къэкIощт, джащ фэдэу IэзапIэхэм сымаджэхэр анэгъэсыгъэнхэм иамал щыIэ хъущт.

«Пандемием илъэхъан анахьэу етIани ащ мэхьанэу иIэм зыкъеIэты. Коронавирусым нэмыкIэу цIыфхэм япсауныгъэ епхыгъэ фэшъхьаф Iофыгъохэри мы уахътэм къэуцух. Арышъ, республикэм щыпсэурэ пстэуми IэпыIэгъур аIэкIа­гъэхьан, специалистым иконсультацие епхыгъэ фэIо-фашIэхэр игъом зэшIуахынхэ фае.

Ащ пае пэIудзыгъэ псэупIэхэм ащыпсэухэрэми псауныгъэм икъэухъумэн ылъэныкъокIэ ящыкIагъэр зэкIэ арагъэгъотын, сымаджэ пэпчъ икъоу анаIэ тырагъэтын фае. Тэ мылъку-техникэ лъэныкъомкIэ шъолъырхэм яIофхэм язытет нахь дэгъу зэрэтшIыщтым тыпылъыщт, ащкIэ лъэпкъ проектхэр, федеральнэ ыкIи шъолъыр программэхэр, джащ фэдэу партиеу «Единэ Россием» ипроектхэр къызфэдгъэфедэщтых», — къыхигъэщыгъ Адыгеим и ЛIышъхьэ.

Шъугу къэдгъэкIыжьын: мазэу икIыгъэм къэралыгъо программэу «Къуаджэхэм хэхъоныгъэ ягъэшIыгъэныр» зыфиIорэм къыдыхэлъытагъэу республикэм санитарнэ автомобили 5 къы­IэкIэхьэгъагъ, ахэр псауныгъэм икъэухъумэнкIэ къэралыгъо бюджет учреждениеу «Джэджэ гупчэ район сымэджэщыр» зыфиIорэм ратыгъагъэх. Ащ нэмыкIэу 2020-рэ илъэсым Минпромторгым ипрограммэ диштэу республикэм ирайонхэм автомобили 5 аратыгъагъ.

Лъэпкъ проектэу «Псауны­гъэр къэухъумэгъэныр» зыфи­Iорэм диштэу тхьамафэу икIыгъэм республикэм Iэзэн-профилактикэ Iофтхьабзэхэм афытегъэпсыхьэгъэ мобильнэ транспорти 6 къыIэкIэхьагъ, къуа­джэхэм ащыпсэухэрэм пэублэ медикэ-санитарнэ IэпыIэгъур ятыгъэным фытегъэпсыхьагъэу ахэр щытых.

АР-м и ЛIышъхьэ ипресс-къулыкъу