Илъэпкъ фэлажьэ
Адыгэ сурэтышIэу, ушэтакIоу Зак Кахадо иIофшIагъэхэм якъэгъэлъэгъонэу «Существование — сосуществование» зыфиIорэр КъокIыпIэм щыпсэухэрэ лъэпкъхэм яискусствэ и Къэралыгъо музей икъутамэу Мыекъуапэ дэтым къыщызэIуахыгъ.
Непэрэ искусствэм ипроизведение 18 экспозицием къыщыгъэлъэгъуагъ.
Мы проектыр сурэтышIым ыпэкIэ иIэгъэ IофшIагъэхэм афэдэп. Культурэ, цIыф, лIэуж зэфэшъхьафхэм ар афэгъэхьыгъ. Къэгъэлъэгъоным къызэтынэкIыгъэ уахътэмрэ непэрэ зэрепхых. СурэтышIым иискусствэ «Черкесская эстетика» зыфиIорэ къэIуакIэм чIыпIэшхо щеубыты.
— Сэ сысурэтышI, Америкэм къихъухьэгъэ черкес. Адыгэ эстетикэм Iоф дэзышIэрэ сыхудожник. СитворчествэкIэ силъэпкъ къэсэгъэлъагъо, сыдэгущыIэ, — еIо Зак Кахадо.