Адыгеим и ЛIышъхьэу КъумпIыл Мурат Уры­сые Федерацием республикэм ыцIэкIэ исе­наторэу Олег Селезневым тыгъуасэ Адыгэ Республикэм и Правительствэ и Унэ зэIукIэгъу щыдыриIагъ.

Урысые Федерацием и Президентэу Владимир Путиным Федеральнэ ЗэIукIэм факIоу къышIыгъэ Джэпсалъэм къыщыхигъэщыгъэ пшъэрылъхэм ягъэ­цэкIэнкIэ федеральнэ гупчэм дыряIэ зэдэлэжьэныгъэм иIофыгъохэм ахэр атегущыIагъэх.

Адыгэ Республикэм и ЛIы­шъхьэу КъумпIыл Мурат рес­публикэр шIуагъэ хэлъэу ФедерациемкIэ Советым зэрэдэла­жьэрэм мэхьанэшхо зэриIэр къыхигъэщыгъ. Проектышхохэр, республикэмкIэ анахь мэхьанэ зиIэхэр пхырыщыгъэнхэмкIэ Адыгеим ыцIэкIэ сенаторхэм яшIогъэшхо къэкIо. Ахэм зыкIэ ащыщ Тэхъутэмыкъое районым щагъэпсырэ индустриальнэ пар­кыр. Республикэм иэкономикэ хэхъоныгъэ ышIынымкIэ ыкIи промышленностым шIуагъэ къы­тэу джыри нахь зиушъомбгъунымкIэ ащ мэхьанэшхо иIэщт.

Хабзэ зэрэхъугъэу, Адыгеим иагропромышленнэ комплекс республикэм иэкономикэ ихэ­хъоныгъэ иIахьышхо хешIыхьэ. Ащ епхыгъэу мэкъу-мэщым, чIыгулэжьхэм IэпыIэгъу ятыгъэ­нымкIэ къэралыгъо программэхэр пхырыщыгъэнхэм, лэжьыгъэм иIухыжьын зэрэкIорэм япхыгъэ Iофыгъохэм зэIукIэгъум илъэхъан атегущыIагъэх.

Анахьэу анаIэ зытырагъэтыгъэр мэкъэтыныр зыщыкIощт мэфэ зыкIым изыфэгъэхьазырын ары: Урысые Федерацием и Къэралыгъо Думэрэ Адыгэ Республикэм и Къэралыгъо Совет — Хасэмрэ ядепутатхэм яхэдзынхэр зэрэкIощтхэр. Адыге­им и ЛIышъхьэ къызэ­рэхигъэщыгъэмкIэ, хэгъэгум и Президент анахьэу ынаIэ зытыригъэтырэр цIыфхэм ящыIакIэ хэпшIыкIэу нахьышIу шIыгъэныр ары, ащкIэ хабзэм икъутэмэ пстэуми язэдэлэжьэныгъэ мэхьанэшхо иIэу щыт. АР-м и ЛIышъхьэ ипресс-къулыкъу