Адыгеим щызэхащэщт
Шъолъырхэр зэзыпхырэ фестивалэу «На земле Нартов» зыфиIорэр 2021-рэ илъэсым Iоныгъом и 17 — 19-м Адыгеим щыкIощт. Ащ республикэм зыщыфагъэхьазыры.
Лъэпкъ проектэу «Культурэм» къыдыхэлъытэгъэ федеральнэ программэу «Творческэ цIыфхэр» зыфиIорэм ишIуагъэкIэ «Урысые культурэм ифонд» къыIэкIэхьэгъэ грантымкIэ проектыр агъэцакIэ.
Фестивалым хэлэжьэщтых Чэчэным, Дагъыстан, Къалмыкъым, Къэрэщэе-Щэрджэсым, Темыр Осетием, Краснодар краим, Волгоград ыкIи Ростов хэкухэм, Адыгэ Республикэм ятворческэ купхэр.
Лъэпкъ зэфэшъхьафхэм яорэдхэр, къашъохэр, якультурэ зыфэдэр зышIогъэшIэгъонхэр Iофтхьабзэм къырагъэблагъэх. Джащ фэдэу фестивалым къыдыхэлъытагъэу IэкIэ ашIыгъэ пкъыгъо дахэхэр, шъуашэхэр, дышъэидэхэр, шъом хэшIыкIыгъэхэр, нэмыкIхэри цIыфхэм ащэфынхэ амал яIэщт.
Iофтхьабзэм епхыгъэу Iэнэ хъураехэр, творческэ зэIукIэгъухэр зэхащэщтых. Гала-концертымкIэ ыкIи Iофтхьабзэу «Удж-хъурай — хоровод мира и благополучия» зыфиIорэмкIэ фестивалыр зэфашIыжьыщт.