Тхылъ къэгъэлъэгъонхэр
ТхэкIо-орэдыIу — IэпэIас
ШэнышIу зэрафэхъугъэу, АР-м и Лъэпкъ тхылъеджапIэ краеведениемкIэ ыкIи лъэпкъ литературэмкIэ иотдел мэфэкI къэгъэлъэгъонхэр нэм къыкIидзэу, игъом къыщагъэхьазырых. Ахэр Адыгеим ищыIакIэ лъэныкъо гъэнэфагъэкIэ хэлэжьэрэ цIыфхэм яхьылIагъэх.
ЗэлъашIэрэ тхакIоу, адыгэ тхакIохэм япроизведениехэр урысыбзэм езыгъэкIухэу Гарий Немченкэм ыныбжь илъэс 85-рэ зэрэхъугъэм фэгъэхьыгъ «Талантливый певец братства народов» зыфиIорэ къэгъэлъэгъоныр. Ар тхакIом ищыIэныгъэ ыкIи итворчествэ къызэIузыхырэ тхыгъэхэмкIэ, произведениехэмкIэ баи.
ТхылъеджапIэм ибиблиотекарь шъхьаIэу ГъукIэлI Асыет зэрэхигъэунэфыкIыгъэмкIэ, къэгъэлъэгъоныр фондым хэлъ тхылъ зэфэшъхьафыбэр зэлъягъэшIэгъэным ыкIи Г. Л. Немченкэм итворчествэ нахь фэгъэнэIосэгъэнхэм атегъэпсыхьагъ. Къэгъэлъэгъоным тхакIом ытхыгъэхэу – томи 5 хъурэ зэхэугъоегъэ тхыгъэхэр — «Короли цепей», «Вольный горец», «Газыри», «Счастливая черкеска», Цуекъо Юныс ироманэу «ГъучI Тыгъужъым итаурыхъ» зыфиIоу Немченкэм урысыбзэм рилъхьагъэу «Сказание о железном волке», «Смерть за черной речкой», «Вернись, Титу, вернись»…, Кощбэе Пщымафэ ирассказхэу «Былымгъотхэм яатэкъэжъ», «Дождь на сухую землю» зыфиIохэрэр, нэмыкIхэри хэлъых.
Илъэс 85-рэ къэзыгъэшIэгъэ тхакIор ищыIэныгъэкIэ ыкIи итворчествэкIэ цIыф лъэпкъхэм язэкъошныгъэ ыгъэпытэу, шIур ылэжьэу, зэдеIэжьныгъэр кIигъэтхъэу къызэрэрыкIуагъэм шъхьэкIафэ фыуегъэшIы.
Немченкэм ипроизведениехэр ыкIи изэдзэкIыгъэ IофшIагъэхэр анахьэу зыгъэфедэнхэ зылъэкIыщтхэр тхакIохэр, усакIохэр, литературоведхэр, шIэныгъэлэжь-кIэлэегъаджэхэр ыкIи гурыт, апшъэрэ еджапIэхэм ащеджэхэрэр ары.
(Тикорр.).