ГъэхъэгъэшIухэр яIэх
Кушъхьэфэчъэ спортымкIэ пшъашъэхэм азыфагу къэралыгъом ичемпионат, урысые зэнэкъокъухэр къалэу Хабаровскэ щыкIуагъэх.
Илъэс 17 — 18 зыныбжьыхэм азыфагу щыкIогъэ зэнэкъокъум ятIонэрэ чIыпIэр къыщыдихыгъ кушъхьэфэчъэ спортымкIэ республикэ спорт еджапIэм зыщызыгъэсэрэ Кристина Новиковам.
Мыщ ыпэкIэ бзылъфыгъэхэм азыфагу щызэхащэгъэ зэнэкъокъум республикэм щыщ Гюнель Мехтиевам апэрэ чIыпIэр къыщыдихыгъ, ятIонэрэ хъугъэ Елизавета Арчибасовар.
НыбжьыкIэхэм якуп хахьэхэрэм язэнэкъокъу дышъэ къыщыдихыгъ Санкт-Петербург щыщ Дарья Ворошиловам, Адыгеим испортсменкэу Анастасия Могилевскаям ятIонэрэ чIыпIэр къыхьыгъ.
Зэнэкъокъухэм яедзыгъо зэфэшъхьафхэм очко пчъагъэу ащырагъэкъугъэм елъытыгъэу анахь дэгъоу зыкъэзгъэлъэгъогъэ спортсменкэхэр къэнэфагъэх. БзылъфыгъэхэмкIэ апэрэ чIыпIэр къыдэзыхыгъэр Санкт-Петербург щыщ Галина Чернышевар ары, тыжьыныр къыфагъэшъошагъ Адыгеим испортсменкэу Гюнель Мехтиевам.
НэкIубгъор зыгъэхьазырыгъэр Тхьаркъохъо Адам.