А I-рэ Дунэе театральнэ фестивалэу «Чеховым иурам» зыфиIорэм икIэуххэр Таганрог щызэфахьысыжьыгъэх.

Мыекъуапэ дэт Урыс театрэу А. С. Пушкиным ыцIэ зыхьырэр апэрэу Таганрог щыIагъ, Адыгэ Республикэм искусствэхэмкIэ изаслуженнэ IофышIэшхоу Николай Иванченкэм ыгъэуцугъэ спектаклэу «Предложение» зыфиIорэмкIэ фестивалыр къызэIуахыгъ. Еплъыгъэхэми, экспертхэми спектаклэр агу ри­хьыгъ, осэшхо къыфашIыгъ.

Адыгэ Республикэм культурэмкIэ и Министерствэ къызэритыгъэмкIэ, А. С. Пушкиным ыцIэ зыхьырэ Урыс театрэр лъэны­къоу «Актер куп анахь дэгъу» зыфиIорэмкIэ фестивалым илауреат хъугъэ. Чеховым исэмэркъэу дахэ актерхэм IэпэIэсэныгъэ ахэлъэу спектаклэм къыщаты­гъэу, водевилыр къадэхъугъэу экспертхэм алъытагъ.

Спектаклэм актерищ хэлэжьагъэр – Адыгэ Республикэм изаслуженнэ артистэу Владимир Ивановыр, Адыгэ Республикэм изаслуженнэ артисткэу Татьяна Виноградовар, артистэу Тимофей Кириченкэр.

Фестивалым иаужырэ мафэ театральнэ критик цIэрыIоу, фестивалэу «Золотая маска» иэкспертэу Вера Сердечнэр зипэщэ жюрим А. С. Пушкиным ыцIэ зыхьырэ Урыс театрэм наградэр къыритыжьыгъ.