Урысыем испортсмен 335-рэ хэлажьэ

Токио щыкIорэ гъэмэфэ Олимпиадэм Урысыем испортсмен 335-рэ хэлажьэ. ИлъэситфыкIэ узэкIэIэбэжьмэ, Рио-де-Жаней­ро щызэхащагъэм елъытыгъэмэ, мы пчъагъэр хэпшIыкIэу на­хьыб.

Урысыем и Олимпийскэ Комитет пшъэрылъэу зыфигъэуцужьырэр медалэу къахьыгъэхэм япчъагъэкIэ къэралыгъо анахь дэгъуи­щым ясатырэ хэтынхэр ары.

Зэнэкъокъухэр мэфэ заулэ хъугъэу ма­кIох, Урысыем испортсменхэм дышъэ, ты­жьын ыкIи джэрз медальхэр къахьыгъэх. Спортыр зыгу рихьырэ цIыфхэр агъэгу­шIуагъэх.

Тащэгугъы

Урысыем дзюдомкIэ ихэшыпыкIыгъэ ­командэ хэт ТIопсэ районым щыщ Михаил Игольниковыр. Ар зыгъасэрэр Нэ­гъуцу Джанболэт. Янэу Фатимэ Алалэмэ ащыщ, къуаджэу Псыбэ къыщыхъугъ, икIалэ игъэхъа­гъэ­хэм арэгушхо.

Михаил килограмм 90-м нэс къэзыщэ­чыхэрэм якуп щэбанэ. 2011-рэ, 2012-рэ, 2014-рэ илъэс­хэм УрысыемкIэ ныбжьыкIэхэм язэнэкъокъухэм текIоны­гъэр къащыдихыгъ, 2010-рэ, 2013-рэ илъэсхэм ящэнэрэ хъугъэ. Европэм изэнэкъокъу­хэм гъо­гогъуищэ ячемпион хъугъэ. Дунаим изэнэ­къокъухэм 2011-рэ илъэсым дышъэр къащыдихыгъ, ящэнэрэ чIыпIэри къыхьыгъ. 2011-рэ илъэсым къыщыублагъэу 2014-рэ илъэсым нэс Европэм и Кубок гъогогъуи 8 къыдихыгъ.

2021-рэ илъэсым дзюдомкIэ Европэм ичемпионатэу къалэу Лиссабон щыкIуагъэм Михаил дэгъоу зыкъыщигъэлъэгъуагъ, ящэнэрэ чIыпIэр къыдихыгъ.

Токио щыкIорэ Олимпиадэм Михаил Игольниковым текIоныгъэр къыщыдихын ылъэкIыщтэу специалистхэм алъытэ. Мы мафэхэм ар бэнэщт, дзюдор зыгу рихьыхэрэр ыгъэгушIонхэу, къэралыгъом медаль къыфи­хьынэу тыщэгугъы.

Батутым дэпкIэенымкIэ Урысыем иолимпийскэ командэ хэт адыгэ пшъашъэу Къо­кIасэкъо Сусанэ. Мэкъуогъум и 27-м дунаим и Кубок икъыдэхынкIэ зэнэкъокъоу Португалием щызэхащагъэм Сусанэ апэрэ чIы­пIэр щиубытыгъ.

Мы спорт лъэпкъымкIэ хъулъ­фыгъэхэм ыкIи бзылъфыгъэхэм язэнэкъокъухэр бэ­дзэогъум и 30 — 31-м кIощтых. Сусанэ гъэхъэгъэшIухэр ышIынхэу, медаль къыдихынэу фэтэIо.

Тхьаркъохъо Адам.