Хъунэго Саид: «КъызэплъэкIыгъо симыфэзэ…»
НыбжьыкIэхэм ятворчествэ уасэ фишIы зыхъукIэ, критикэм (адыгэ критикэми) «ахэм ащыщ пэпчъ ежь мэкъэ гъэнэфагъэ иI, идунэееплъыкIэ шъхьафы» зэриIорэм зэфагъэ хэлъэу пIон плъэкIыщтэп.
Поэтхэу ыкIи прозаикхэу джы тыкъызытегущыIэхэрэр ныбжьыкIэжьхэп (къагъэшIагъэмкIи, ятворчествэкIи) ыкIи «ежьхэри уахътэри зыфэдэхэр» зэхашIэ зыхъугъэр ащ лъыпытэу арэп, ари псынкIэу къадэхъугъ пIон плъэкIыщтэп. Ахэр непэ яIэ хъугъэх, ау ащ фэшI гъогу къинмыгъуае къакIун фаеу хъугъагъэ.
Автор зэфэшъхьафхэм атхыгъэхэр зэхэугъоягъэхэу зыдэт тхылъымкIэ тхэкIо ныбжьыкIэм «итхэкIэ амал» гъэунэфыгъуае, ау джащ фэдэ идеологий щыIагъэр. «… Уахътэ терэшI! Джыри Iоф дерэшI!..» – джары арапэсыщтыгъэр.
«ИдеякIэхэр иIэхэу ыкIи, зыгорэкIэ, Алахьым ерэмыд, партиемрэ къэралыгъомрэ ягъогу димыштэрэ зекIуакIэм дихьыхырэ тхэкIо ныбжьыкIэ зыгорэкIэ къыкъокIыгъакъомэ…» А къэугупшысыгъэ пэрыохъухэр зэпачынхэр зэкIэми акIуачIэ къыхьыщтыгъэп. Адэ сыдэущтэу ар щыпэкIэкIыгъа Хъунэго Саидэ итворчествэ? КъызэрыкIо фэд, ау ащ дакIоуи Iужъоу зэхэлъ: хэбзэ гъэуцугъэхэм, къэгъагъэхэм ыкIи кIуачIэхэу ахэр зэхэзыулъэгонхэ зылъэкIыхэрэм анахьи, щыIэныгъэр нахь гъэшIэгъонэу гъэпсыгъэ, общественнэ институтхэм анахьи нахь лъэш, гур пэрыохъу горэхэм къызэтыраIэжэн алъэкIыщтэп, ежьыр шъыпкъэм къыдихыгъэ текIоныгъэм ар ыгъэгушIон, ыгъэгушхон ылъэкIыщт, ау лъэш дэдэуи ыгу кIодын ылъэкIыщт. Дунаир гъунэнчъэу дэхэдэд, ау ащ дакIоуи ар гущыкIыгъоу шъончъэ ыкIи гур ыгъэцIыкIоу зэшъозэщизэу гъэпсыгъэ. Ары шъхьаем, ар зыдэхъугъэр хэти ымышIэу бзэхыгъэ, жьым хэткIухьагъ, Iугъо-пщэсы хъугъэ ыкIи джащ пае поэтессэр зыгъэгумэкIырэр дунаеу зигъашIэ зыухырэм, зэхэткIухьэрэм итеплъэ зэмышъогъухэм къаригъэгъэзэжьынэу ары:
Къечъэбзэхзэ нэфшъагъор Чэмыбжъэм eyly. Чэрэзы тIурысэр мысысэу Осэпс ехьыжьагъэм Ехъуапсэ. БлэкIы нэфшъагъор КIэракIэу, КIым-сымым зыримыгъэукIыхьэу Чэщым игъогу ыпхъэнкIыхьэу, Чэу пхэнджым Игъуанэ дэплъыхьэзэ. («Осэпсыц», я 5-рэ н.)
Ар зыфэбгъэдэн плъэкIыщт уахътэр итетыгъо ыухыгъэу чэщыр зыщикIырэр ыкIи мафэр къызыщихьэрэр ары. Аущтэу уегупшысэным къикIырэр поэтессэр къызытегущыIэрэр къыбгурымыIоныр ары: мэхьанэ шъхьаIэр – чэщым игъогууанэ ыухыгъэу текIы (нэфшъагъом блэ бзэгоу цакъэрэм иобраз ары гу зылъытигъатэрэр), уахътэм пэублакIэу фэхъугъэр къызэрэсыгъэр, ауми уахътэри шIушIэным фэбгъадэ зэрэмыхъущтыр ары. «Чэщым игъогухэр нэфшъагъом епхъэнкIых» зыфиIорэ гущыIэхэми, ары пакIошъ, дунэякIэм уфэкIон зэрэплъэкIыщт гъогур къагъэлъагъорэп. ГурыIогъуай: дунаир зэрэгъэпсыгъэм дэгъубэ зэрэхэлъыр, ежь къыдыщыIэ цIыфхэм ямызакъоу, нэфынэм хэхьэгъэным пае зэкIэ къиныгъохэр зыпшъэ дэзылъхьажьыгъэ дунаими ащ «ыпси» акIышъо дагъоу иIэхэри, тыркъоу телъхэри поэтессэм елъэгъух. ЦIыфыр щыIэкIэ дэеу зыхэтыр е фэшIыгъэ щыIакIэр арэп поэтессэр къызытегущыIэрэр – ренэу зэрэхъу хабзэу, цIыфэу модырэмрэ мыдырэмрэ, нэмыкIэу къэпIон зыхъукIэ, шIункIымрэ нэфынэмрэ азыфагу итэу къанэрэр ары нахькIэ.
Ар творчествэмкIэ философие лъэчIэ шъхьаIэу щытыгъ. Ащ гъэхъэгъэ шIукIаехэр къытынхэ фэягъэ. Къытыгъэх ыкIи. Сыда пIомэ, Iэгушъор зэбгъэзэкIымэ, ащ щыIэр усакIом ылъэгъумэ шIоигъу, – «сIэу сщэигъэм макъэр Iэпэзы» (я 7-рэ н.). Сыд ар зышIэн зылъэкIыщтыр? Iэ щэигъэр мэхьанитIоу къызыгурыбгъэIон плъэкIыщт, щыIэныгъэри ары: усакIор тинэрылъэгъу дунаир ары зыщыпсэурэр, ау щыI джащ фэдэу нэмыкI дунаеу ежь усакIом зыфигъэпсыжьыгъэр, ар ащ идунай, ащ итхыгъэхэм яI ямышIыкIэ-гъэпсыкIэ, аужыпкъэм – ащ имэкъамэ: ащыгъум хэти гу лъитэгъагъэп щыIэныгъэм фэгъэхьыгъэ мэхьанэшхо зиIэ гупшысэхэр къызыдэзыхьыгъэ пшъэшъэжъые цIыкIу поэзием къызэрэхэхьагъэм. Мары шъукъядж мы сатырэхэм: «Нэплъэгъур сIэгуитIу ащыуалъэзэ, къэкIорэ мафэм селъэбакъо, гъоткIо зырызэу сIэпэзы, Iэ щэигъэм макъэр къынэсы»; «КIо, нынэ, кIо, сикIал!» «...синан...» ЫкIи акIэлъэныкъуитIукIэ точкабэхэр къызэшIэкIыгъэ гущыIэхэр – «...синан...», «...сыд къяпIолIэна, синанэу си нэнэжъ, зэкIэ мыщ къыщыхъу-щышIагъэхэм?» Мыщ дэжьым нанэу хъун ылъэкIыщт ежьым ие шъыпкъэ нанэри (нэнэжъыри), фэшъхьаф пстэухэу зэкIэри афэзыгъэгъухэу, гъунэнчъэу шIу зылъэгъухэрэ нэнэшхохэри (ныри).
Тхылъеджэм гу лъитагъэп поэзием сурэтышI пшъхьапэ щылажьэу зэрэригъэжьагъэм, ащ иапэрэ тхылъ цIыкIоу усэхэр зыдэтым щэхъу къызэрэдимыгъэкIыгъэзэ: «Сиусэ икъоу къэмыIуми, мэкъэмэ нэпцI идагъоп» («Осэпсыц», я 8-рэ н.); «Усэ заулэу стхыгъэри нынэпIосхэм апIужьыгъ. Ситхьапэ фыжьы, гущыIэм сыдечъажьэ, еомэ-еозэ, зэгуасщхэмэ – зэгокIыжьызэ сипшысэ нэфапIэм фащэжьы» (ар дэдэм). Поэтессэр творчествэм икъиныгъохэм, зылъыхъурэ гущыIэр къыгъотыным пае зэпыригъэзэгъэ «гущыIэ мин пчъагъэхэм» (В. Маяковский) къатегущыIэрэм фэд, ауми, гу лъымытэн плъэкIырэп ащ игупшысэхэр нахь куоу «зэрехыхэрэм» ыкIи нахь чыжьэу зэрэлъыкIуатэхэрэм – ар къызытегущыIэрэр фэшъхьаф дунае зыгъэпсыным, фэшъхьаф орэд «моу шъэбэ-шъабэу, бэмэ рамыщажьэу, бэм кIэмыдэоу орэд» (ар дэдэм) зыусыным зыкIуачIэ езыхьылIэгъэ поэтессэм къинмыгъуае зэрилъэгъурэр ары. НэмыкIэу къэпIон зыхъукIэ, «зэхауцIэпIэгъэ дунаир» щигъэзыеным ыкIи ежьым «идунэякIэ ыгъэпсыным» пае поэтессэр ыкIуачIэ шъхьамысыжьэу мэбанэ. Дунэежъыр щызыгъэзыерэ усакIоу «къызыщетIысэхыщт» дунаир къыхэхыгъэным къинышхо тезылъагъорэр ары нахь нэрылъэгъоу тапашъхьэ къиуцорэр. Ащ фэгъэхьыгъэу псалъэр лъыбгъэкIотэн хъумэ хэгъэунэфыкIыгъэн фае «Самолетым ычIэгъ» зыфиIорэ усэм поэтессэр чIыгужъыр арэп джы зытесыр – ащ тебыбыкIы, ошъогум ибыбэгъах, ау тыдэ къыщытIысыщт а IэрышI планетэ цIыкIоу самолеткIэ заджэхэрэр? «ТачIэгъыкIэ чIыгур гузажъоу чIэсыкIы, тачIэгъыкIэ къефэхырэ бгыкъумэ ныр ачIэлъадэ исабый стыгъэ машIом къыIуитхъыжьынэу...» «ТачIэгъыкIэ ори хэта къыуажэрэр, сэри къысэмыжагъэмэ япчъэу зыми хэсымыпчъагъэм сеIупчъэпчъэщт, сыхерэтхэжь инэфапIэ... ЦIыфым ригъэтынэу пчъэ зигъотыкIэ еухы ипчъэ, имыIэри благъэу къыщэхъу, Iуахыгъэ унэм ипчъэ сылъэхъу» (я 11 – 12-рэ н.).
Джаущтэу поэтессэм ежьырырэ фэшъхьаф цIыфхэу ыгукIэ пэблагъэхэмрэ апае щымыIэ унэ ыгъэпсыгъ, илъэс пчъэгъабэм ащ гъогу къинэу ыкIугъэхэм ар ащ фащагъэп: «Къыддэмыхъугъэм ияжьэ жьым IорышIаеу къелъэсы, лъэс- лъэбыIоу ткIун фэегъэ гъогур дгъэпцIагъэ, нэмыкI лъагъоу етщэжьагъэр хымагъэ... МэшIо джэгум ыгупчэ кIэпсэрышъоу тыкъыщышъуагъ, зичэзыур мыпцIымамэу хэпкIагъ» (я 14-рэ н.). Зэрэшъулъэгъоу, ар зыфэдэр непэрэ общественнэ гъэпсыкIэр ары, ауми къыфэдгъэзэжьын усэм ипэублэ, авторым ащ шъхьэу фишIыгъэр «бжыхьэ машIу», нэмыкIэу къэпIон зыхъукIэ, аужырэу, зыухырэу, зэкIэри зыIузылъэшъон зылъэкIыщтыр ары. Фэшъхьаф усэм тыкъеджэ: «Инэп чIыгур, ау мэшIошхоу щэсты тигухэлъхэр, тыкъэмыхъузэ зэханэшъ, тымылъэгъузэ мэкIосэжьы (ар дэдэм, я 14-рэ н.). Ауми, гумэкIышхом хэфэгъэ поэтессэм игузэхэшIэшхоу ыбгъэгу къыщибыжъутыкIырэм, ащ изэхэшIыкIэу зэбгырышъэшъырэм яджэрпэджэжь мэкъэшхоу чыжьэкIэ къиIукIырэр ащызэхэтхырэп. ГузэхэшIэшхор ежь авторым ыгулъачIэ къыхэнэжьы, изэхэшIыкI икъогъупэ шъэфхэм къаблэмыкIыгъэу къахэнэжьы. Ар зыфэбгъэдэн плъэкIыщтыр кIосэжьырэ пхъэ шIомыкIэу, ау щыIэныгъэм бэу щызыушэтыгъэм игуузхэмрэ игукъаохэмрэ зыщыстынхэ амылъэкIырэр ары: ар цIыфхэм афызэIухыгъ, ау хэти ащ гупсэфыпIэ щигъотын ылъэкIырэп, ар шъхьафит, ау зиIэтынышъ, зыгъэбыбын кIуачIэ зэригъотылIэжьын ылъэкIырэп, ар хэти къыухъумэрэп, ащ пае шхончыщэ пчъагъэ щымыохъухэу ащ тефэ ыкIи ахэр ыпкъышъол къыхэнэх егъэшIэрэу: «Непэ симафэ гъожьы, бжыхьэр сфызэкIэкIожьрэп, сисэп сшIошIы, остыгъэ пчыхьэм хэзгъэнэжьырэп, сыфэчэфыжьэп, ошIа, пшахъор ашIуабэу уахътэр рапщыгъ, щыбзэм итэкъуи аIэпычъыгъ, джы дунаир зэлъештэ...» (я 25-рэ н.).
Иакъыли ыпси IэкIыб кIуачIэхэмрэ зыщымыгъуазэхэ дунаехэмрэ зэгъэшIэгъэнхэмкIэ цIыфым иамалхэр гъунэнчъэхэу зэрэщымытхэм ыкIи зэрэзэкIэIулIагъэхэм ямотивхэр хэпшIыкIэу, нахь Iужъоу зэхэлъхэу хъугъэх, ау цIыф гузэхэшIэ лъэшхэмрэ цIыфым игушхуагъэрэ (идухрэ) щыкIэгъэнчъэхэу (е мыщыкIэгъэнчъэхэу) щытхэмэ яхьылIэгъэ фэзэщныгъэ идеехэр философием ылъэныкъокIэ нахь къэлэнлагъэх – ар къыщылъэгъуагъ Хъунэго Саидэ иятIонэрэ тхылъэу «Пшъэхъухэр» зыфиIорэм. Ащ фэгъэхьыгъэу къатегущыIэгъэн фаеу къытщэхъу а зым – лъэмыджхэм яхьылIэгъэ уситIу. «Осэпсыцэм» къыдэхьагъэм ыцIэр «Ари лъэмыджыгъ», «Пшъэхъухэр» зыфиIорэм дэтыр – «Лъэмыдж». Апэрэм герой бзылъфыгъэмрэ ар зытет дунаим щыщхэмрэ щызэгурэIох, гъусэ щызэфэхъух – «Нэф къэмышъзэ сигупшысэ зыкъылъфыжьи, жьым хэхьагъ, псыхъом ыпшъэ зырищэкIи зыкIигъэгъуи дечъэжьагъ», ау ахэм ауж итхэу «нэпкъыхэми IаплI зэращэкIыгъэ». Герой бзылъфыгъэм изакъу – зиплъыхьэмэ, елъэгъу яеплъыкIэхэмкIэ гъусэ зэрэзэфэхъугъэхэр. Гупшысэм зызэриушъомбгъурэр хьаламэт шъыпкъ ыкIи умыгъэшIэгъон плъэкIырэп: апэрэмкIэ, поэтессэм тшIошъ ыгъэхъурэр, сыдэу орэхъу фаеми, лъэмыджхэр зэрэщыIэхэр ыкIи ахэр цIыфхэм зэрящыкIагъэхэр ары: армырмэ, «нэпкъ лъэгитIур псым хэхьажьи, IаплIы чъэр зэращэкIыгъ ыкIи ахэр зэкIэ зэгъусэхэу псыорхэм ахэкIодэжьыщтых», псыхъом къыхахъоу, ехьыжьагъэу чъэ зыхъукIэ, ыдырыпэни ылъэкIыщт. Лъэмыджым къыщымыуцоу герой бзылъфыгъэр ежь къэзыухъумэщтыгъэ жъогъо цIыкIухэу нахьыжъхэм ауж къинагъэхэри зыдихьыщтых. Шъыпкъэ, ащ ахэр псым хигъаохи, чIыгум ыкIуачIэ ахилъхьи ытIупщыжьыгъэх. НэмыкIэу къэпIон хъумэ, тхылъеджэм инэрылъэгъоу хъугъэ-шIэгъэ хьаламэтхэу зыгорэ къэзыгъэнэжьыгъэхэр щызэпэкIэкIых, къагъэнэжьыгъэхэр псыхъор арынкIи мэхъу, жъуагъохэр арынкIи мэхъу, ау анахь тэрэзкIэ енэгуягъор — ежь бзылъфыгъэ героир арын фае, сыда пIомэ хъугъэ-шIэгъэ гъэшIэгъонхэм яшIуагъэкIэ ар природэм, дунэе гъэпсыгъэм яIофшIэн шъэф хэлэжьэн ылъэкIыгь.
ЯтIонэрэ стихотворениер зэрэгъэпсыгъэр апэрэм фэдэп: тинэрылъэгъоу щыIэныгъэм щыхъу-щышIэхэрэм нахь яхьыщыр – «лъэмыдж горэм сытехьагъ» (апэрэм къызэрэщиIощтыгъэр «лъэмыдж сысрэм сытетыгъ», «нэф къэмышъзэ сигупшысэ зыкъылъфыжьи жьым хэхьагъ, псыхъом ыпшъэ зырищэкIи зыкIигъэгъуи дечъэжьагъ»). Псэмрэ дунаимрэ зэрэгъотынхэу хъугъэп, щагъэзыегъэ гупшысэм (псэм) къыгъэзэжьынкIэ фэягъэп, жъогъо цIыкIухэри джащ фэдэу дунаим пэIапчъэхэу къэнагъэх, ащ ыбгъукIэ готхэу, апэрэм къызэрэщиIуатэрэм фэдэу, «жъогъожъыехэр къечъыехых, яжь къэщакIи зэхэсэхы». Арышъ, зэкIэ дунаим фыщытыкIэу дыряIагъэр укъуагъэ хъугъэ, хьау, укъуагъэп ар – а зэпхыныгъэр щыIэгъахэп, зэгорэм щыIэ хъущтыми хэти щыгъуазэп.
ЩэшIэ Щамсэт. Филологие шIэныгъэхэмкIэ доктор.