Урысыем ишъолъырхэм дзюдомкIэ яхэшыпыкIыгъэ командэхэм яегъэджэн-зыгъэсэн зэIукIэгъухэр Къэбэртэе-Бэлъкъарым щыкIощтых.

Бэдзэогъум и 14-м къыще­гъэжьагъэу и 31-м нэс дзю­домкIэ бэнакIохэр Къэбэртэе-Бэлъкъарым испорт псэуалъэхэм ащызэIукIэщтых.

Санкт-Петербург, Москва, Татарстан, Къэбэртэе-Бэлъкъарым, Адыгэ Республикэм, нэмыкIхэм ябэнакIохэм кIуачIэр апсыхьащт, якъулай хагъэ­хъощт.

Къош республикэр къыхахыгъ

Къэбэртэе-Бэлъкъарыр еджэпIэ-зыгъэсапIэу къыхахыным ыпэкIэ зэхэщэн Iофхэр зыгъэцэкIагъэхэм щыIэныгъэм илъэныкъуабэ къыдалъытагъ.

Спорт псэуалъэхэр зэтегъэ­псыхьагъэх. Ащ дакIоу къушъхьэ­хэм, зыгъэпсэфыпIэхэм язытет, жьым икъэбзагъэ, нэмыкIхэм ямэхьанэ цIыкIоп.

Урысыем дзюдомкIэ и Федерацие зэхэщэн IофхэмкIэ Iэпы­Iэгъу къафэхъуи, егъэджэным лъэпсэшIу ышIыгъ.

ЗэIукIэгъур зыфэгъэхьыгъэр

— 2021-рэ илъэсым Iоныгъо мазэм и 23 — 28-м Урысыем дзюдомкIэ изэнэкъокъу Мыекъуа­пэ щыкIощт. Адыгэ Республикэр спортышхом игупчэ Урысыем зэ­рэщыхъугъэр ащ къеушыхьаты, — къытиIуагъ Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгеим изаслуженнэ тренерэу Бастэ Сэлымэ. — Къэбэртэе-Бэлъ­къарыр къызэрэхахыгъэм тегъэгушхо. Егъэджэн-зэIукIэгъу­хэр щызэхащэнхэм фэшI респуб­ликэм опытышхо иIэу тэлъытэ.

ТибэнакIохэм япащэх

Адыгэ Республикэм изаслуженнэ тренерэу Хьакурынэ Дамиррэ Бастэ Сэлымрэ Адыгеим ихэшыпыкIыгъэ командэ ипащэх.

БэнакIо пэпчъ хэушъхьафы­кIыгъэу Iоф зыдишIэжьыщт, купым хэтэу иIэпэIэсэныгъэ хи­гъэхъощт. Бастэ Сэлым зэрилъы­тэрэмкIэ, егъэджэныр шэпхъэ лъагэм диштэу зэхащэщт.

Датхъужъ Алый къеджагъэх

Мыекъопэ бэнэпIэ еджапIэм дзюдомкIэ зыщызыгъэсэрэ Датхъужъ Алый Урысыем ихэшы­пыкIыгъэ командэ рагъэблэгъагъ. Европэм, дунаим ащыкIощт зэ­IукIэгъухэм ахэлэжьэнэу нарт шъаом зегъэхьазыры.

Олимпиадэм хэлэжьэщт

Урысыем спортымкIэ изаслуженнэ мастерэу Михаил Игольниковыр Олимпиадэ джэгунхэу Токио щыкIощтхэм ахэлэжьэщт.

БэнакIом ТIуапсэ зыщегъасэ. Урысыем изаслуженнэ тренерэу Нэгъуцу Джамболэт ипащэу зэ­нэкъокъум зыфегъэхьазыры. Килограмм 90-м нэс къэзыщэ­чырэмэ янэкъокъущт.

Янэ адыгэмэ ащыщ

Михаил Игольниковым янэ Ала­лэмэ япхъу. Михаил ныбджэгъухэр, нэIуасэхэр Адыгеим щы­риIэх. Мыекъопэ бэнэпIэ еджапIэм къакIозэ егъэджэн зэхахьэ­хэм ахэлажьэ, испорт ухьазы­рыныгъэ хегъахъо.

— Адыгеим щыщ кIалэхэр ТIуапсэ къыригъэблагъэхи, дзюдомкIэ Iоф зыдашIэжьыгъ, — къе­Iуатэ тренер IэпэIасэу Нэгъуцу Джамболэт. — Дзюдом пылъ ныбжьыкIэхэм япчъагъэ хэгъэхъо­гъэным пылъ. Спортым пIуныгъэ мэхьэнэ ин иIэу Михаил елъытэ.

Батырым адыгэ шэн-хабзэхэр ешIэх, егъэцакIэх. Ансамблэ цIэ­рыIоу «Налмэсым» икъашъохэр лъэшэу ыгу рехьых. Адыгэ шъуа­шэм идэхагъэ къыIотэныр шэнышIу фэхъугъ. Адыгэ Респуб­ли­кэм испортсменхэм зэнэкъо­къу­хэм медальхэр къащахьы­­гъэ­хэу адыгэ быракъыр агъэбыбатэ зы­хъукIэ, Михаил Игольниковыр ащ рэгушхо.

Тренер шъхьаIэр

Урысыем дзюдомкIэ ихэшы­пыкIыгъэ командэ итренер шъхьа­Iэу Тао Хьасанбый Къэбэртэе­-Бэлъкъарым къыщыхъугъ. Адыгэ къэралыгъо университетым физ­культурэмрэ дзюдомрэкIэ и Ин­ститут къыухыгъ.

— Адыгэ Республикэр сэ сиреспублик, — еIо Урысыем, Адыгеим язаслуженнэ тренерэу Тао Хьасанбый. — Кобл Якъубэ лъапсэ зыфишIыгъэ Мыекъопэ бэнэпIэ еджапIэр дунаим шIукIэ щашIэ, гъэхъагъэу щыIэхэм ахэдгъэхъон тимурад.

ЛIышъхьэр фэгушIуагъ

Адыгэ Республикэм и ЛIы­шъхьэу КъумпIыл Мурат Михаил Игольниковыр Олимпиадэ джэгунхэм зэрахэлэжьэщтым фэшI фэгушIуагъ. Спортышхом гъэхъа­гъэ щишIынэу фиIуагъ.

Бэдзэогъум и 23-м Олимпиадэ джэгунхэр Токио щырагъэ­жьэщтых. Аужырэ уплъэкIунхэр тренерхэм, спортсменхэм зэхащэх. Анахь лъэшхэр зэнэкъокъум щытекIонхэу, ягъэхъагъэхэмкIэ тагъэгушIонэу афэтэIо.

ЕмтIылъ Нурбый. Сурэтым итхэр: зэлъашIэрэ тренерэу Нэгъуцу Джамболэтрэ дзюдомкIэ бэнэкIо цIэрыIоу Михаил Игольниковымрэ.