ГутIэ Саныет: «СыусэкIоныр нэтIэгум итхагъ»
Адыгэ тхыгъэ литературэ ныбжьыкIэм я 70 — 90-рэ илъэсхэм тхэкIо-усэкIо бзылъфыгъабэу къыхэхьагъэм ащыщ ГутIэ Саныет.
Хэлъыр къыхэкIыжьын фаешъ, матхэ, гупшысэр егъазэ; гущыIэм ыкIочIэшIу зэхишIэу, фэкъулаеу ар егъэфедэ, егъэунэшкIу, цIыфыбэм апашъхьэ къырелъхьэ. Непэ Саныет творческэ лъэбэкъу гъэнэфагъэхэр зиIэ тхакIу, усакIо ыкIи зэдзэкIакIу. ЫгукIэ икIэсэ усэным фэкIонымкIэ шъхьахыгъэп, зыкIэрищэикIыгъэп, гъэсэныгъэ-шIэныгъэ лъапсэхэр, шIыкIэ-гъэпсыкIэхэр ащкIэ къыIэкIэхьагъэх, игугъэ ин емыпцIыжьэу зэрэфакIорэм шъхьэкIэфагъэ фыуегъэшIы. Зыгорэм темыгъэпсыхьэгъэ цIыф къэхъурэп, ау зэкIэри зэфэшъхьафых ядунэелъэгъукIэкIи яIофшIакIэкIи; пхэлъыр умыгъэфедэжьыныр делагъ, ау щыIэх ащ фэдэхэри; гум шIоигъор фапшIэу, уигугъэ уфэкIоныр, укIэхьаныр насыпыгъ ыкIи цIыфыгъ.
ИщыIэныгъэ гъогупэ зыдэгъэзагъэр Саныет пасэу зэхишIагъ, икIэсэ усэм — гущыIэ дэхэ баеу гупшысэр зыфапэрэм, апэблагъэ зызэришIыщтым пылъыгъ, имурад ин къыдэхъугъ. Джы гум илъ шъэфыбэм амакъэ зэхытегъэхы, икIас джарэу иадыгэбзэ-ныдэлъфыбзэ.
«Уиунэ зыщыгъаси, хасэм кIо» — еIо адыгэ гущыIэжъым. Ар шъыпкъэ, цIыфы пэпчъ хэлъ дэгъури дэйри къызыщежьэрэр унэгъо кIоцIыр ары.
ГутIэ Саныет Арамбый ыпхъур Красногвардейскэ районым ит къуаджэу Адэмые бэдзэогъум и 14-м 1961-рэ илъэсым къыщыхъугъ. ЦIыфы зышIыгъэр — икъуадж, Нэу пшъэшъэжъыиплIыр (тыр пасэу фыкъуи дунаим зехыжьым), ыпсэ аIуилъхьэзэ зыпIугъэу, зылэжьыгъэр, икIэлэегъаджэхэр, нэхъой зиIэ цIыфыбэу зыIукIагъэр ыкIи ежь-ежьырэу, тхылъыр икIасэу, зэреджагъэр, гъэсэныгъэ-шIэныгъэ зэригъотыгъэр ары. Гур мышIоу орэд къаIорэп, гур мышIоу, утхэшъущтэп. Саныет пасэу усэм кIэдэIукIэу ригъэжьэгъагъ: школым зычIэхьэм усэхэр езбырэу зэрагъэшIэнхэу къызэратыкIэ, ыгу цIыкIу къигушIукIэу, ар егугъоу псынкIэу зэригъашIэщтыгъ, усэ зэфэшъхьафхэр — адыгабзэкIи урысыбзэкIи бэу ышIэ хъугъагъэ; нэмыкIхэм къызэраIорэми едэIуныр икIэсагъ.
Я 4 — 5-рэ классхэм арысыгъ къэIотэн-гъэцэкIэнхэр ытхыхэу, чIыопсым, псэушъхьэхэм, цIыф IофшIакIохэм яхьылIагъэхэр игуапэу къытхыхьэ зэхъум, аузэ, тетрадэу зыдатхэщтыгъэхэм фэдэр ышти, шIоигъоу гум илъэу къэмынэфэпагъэр ытхэу ригъэжьагъ, ау ахэр усэ пIонэу зэрэщымытыгъэр ежь щхызэ къеIотэжьы, ытхырэм еджэжьэу, ымыгъэрэзагъэу зэIитхъыжьэуи къыхэкIыгъ.
Саныет иапэрэ усэ бгъэм къызыдэзыгъэр я 10-рэ классыр къызиухыгъэ чIэтIупщыгъо мэфэкI мафэр ары. Иапэрэ кIэлэегъэджагъэу ХьапэкIэ Щэйдэт Индрыс ыпхъур игъонэмыс зэрэхъугъэр агу раубытагъэу ригъэджагъэхэм ащыгъупшэщтыгъэп; Саныет ащ усэ «ПIэгу чылапхъэу сыкъычIэзыгъ» ыIоу фызэхилъхьагъ ыкIи чылэгум щафашIыгъэ мэфэкIым къыщеджагъ, ар егъэжьэпIэ гъэнэфагъэ хъугъэ.
ЕджапIэр къызеухым, якъоджэ колхозэу «Родина» зыфиIорэм ишъоф бригадэ Iоф щишIагъ. 1980-рэ илъэсым Адыгэ къэралыгъо кIэлэегъэджэ институтым филологиемкIэ ифакультет чIэхьагъ, дэгъу дэдэу къыухыгъ. Институтым илиткружок хэтэу усакIэм зыфегъасэ, ежьми етхых, ау ахэр зыми ригъэлъэгъухэрэп. ИкIэсэ адыгэ усакIохэу Бэрэтэрэ Хьамидэ, Жэнэ Къырымызэ атхыхэрэм зяджэкIэ, ежь иусэхэр игъо кIэмыхьагъэу ылъытэщтыгъ. Ауми, институтым ия 3-рэ курс щеджэзэ, Адыгэ хэку радиом творческэ къэтынхэу зэхищэхэрэм ахэлажьэ, иапэрэ усэ зытIу ащ щытыретхэ, иусэ макъэ егъоты, усэу «Нал» зыфиIорэр, мы пкъыгъор насыпым икъэкIуапIэу зэраIорэр къыхэщэу тхыгъагъэ, игъо кIэхьэпагъэу щымытыгъэми, ары апэрэу журналэу «Зэкъошныгъэм» къыщыхиутыгъэр.
Институтыр къызеухым, Хьатикъое гурыт еджапIэм адыгабзэмрэ адыгэ литературэмрэкIэ ыкIи урысыбзэмрэ урыс литературэмрэкIэ 1985 — 1986-рэ илъэсхэм Iоф щишIагъ. 1986-рэ илъэсым Адыгэ хэкум ирадио Комитет Iухьагъ, выпускающэу ригъажьи, къэбархэмкIэ программэхэм яредакторэу, тематикэм иредакцие ипрограммэ изэхэщакIоу, ипащэу, илъэс 30-м ехъум АР-м и Гостелерадиокомпание Iоф щишIагъ.
1983-рэ илъэсым къыщыублагъэу ытхыхэрэр къыхеутых.
Иусэ апэрэ тхылъэу «Къеблагъ» — 1992, къыдигъэкIыным анахь фэзгъэчэфыгъэу щытыр зэлъашIэрэ икъоджэгъу тхакIоу Кощбэе Пщымаф ары. Ащ къыкIэлъыкIуагъ усэ тхылъэу «Уаипчъ», повестхэр зыдэт тхылъэу «ШIэныгъэ шъэф» — нарт эпосым ифэмэ-бжьымэ кIэтэу (къытехьэу) тхыгъэ, произведение цIыкIур тфэу зэхэт, нартыгу зиIэ аужырэ героим игъэпсыкIэ-шIыкIэ, илIыгъэ хабзэ, сыд къин ылъэгъугъэми зэрэфэукIочIырэр, ятэу сымаджэм пае, Iэзэгъур къызэригъотыгъэр, «нарт зэрэмысыжь хэгъэгум, нартмэ ямыжъобгъуи ерэмылъыжь», ыIуи, ар ошъогум зэрэдидзыежьыгъэр аужырэ нартым уигъэдаIоу къыщыIотагъ. «ОшъогуитIум азыфагу» зыцIэ произведениер къэбар-къэбарэу зэхэт, тхакIом ар роман-эссеу елъытэ. Гъуни-нэзи зимыIэ Дунаишхор ыкIи гъашIэр, ЦIыфыр зэрэзэхъулIэхэрэр, щыIэныгъэр зыфэдэр, зэрэкIорэр, щыIэныгъэм хэлъ хабзэр, унашъор къыщыIотагъэх. ЦIыфыр къэхъу, — мэлIэжьы. МитIум азыфагу къифэрэ уахътэр сыд фэда хэткIи сыдкIи? зыфэпIощт упчIэ-гупшысэр пхырэкIы. ТхакIом итворческэ жьыкъащэ нахь лъэш зэрэхъугъэм ар ищыс. «ГущыIэр макIэу» зыфиIорэ усэ тхылъыр 2017-м къыдэкIыгъ. УсакIоу ГутIэ Саныет ежь ымэкъэ шъыпкъэ зэригъотыгъэр тхылъеджэм зэхишIагъ.
Гупшысэр къыфэIорышI
Илъэс 30-м къехъугъэу адыгэ литературэм исатыр хэт Саныет ыкIи дахэу гупшысэр къыфэIорышIэ. Ащ ишыхьат бэмышIэу къыдигъэкIыгъэ поэтическэ сборникэу «Гупшысэр жьыкорен» зыфиIорэр. Тхылъыр Iахьищэу зэтеутыгъ: апэрэр —«Гупшысэр жьыкорен», ятIонэрэр — «ШIулъэгъум итамыгъэхэр» ыкIи «Хьэгъо-шIагъохэр» зыфиIохэрэр. УсэкIэ тхыгъэ.
«Гупшысэр зыщыбэм гущыIэр щымакI — КъытэмэкIэкIырэм хэзыгъэхъошъурэр —
Фэлажьэ нахьышIум», — еIо УсакIом, етIанэ лъэкIуатэшъ, гупшысэм ухэтыныр, ащ акъылIушыгъэ къыхэпхыныр зэрэмыпсынкIэр кIегъэтхъы — «Гушъхьэлэжьыгъэр зэрылъ коным Ышъхьэ техыгъошIоп, пытэу телъ. Сэ къисхын слъэкIыгъэр зы Iэбжыб» (у. «Сегугъугъэп»). УсакIор игъогу зэрэдэмыхыщтым, игугъэ зэремыпцIыжьыщтым, усэн-тхэн амал дэгъу, гупшысэкIэ гъэнэфагъэ ыгу, ышъо адиштэу зэригъотыгъэм, гушъхьэлэжьыгъэ дахэ зэриIэм, тапэкIи ащ егугъоу зэрэхигъэхъощтым уехъырэхъышэрэп:
«КъэкIо гупшысэр мыупчIэжьэу, Ешыпы акъылым цэрыцэу». (н. 95-рэ)
ИкIэсэ усэм зэрэфэкIуагъэр, ар хъуаоу, фабэу, зафэу бгъэм къызэрэдэкIы хъугъэм ежь тхакIори егъэрэзэжьы, теубытагъэ хэлъэу къеIо:
«… КъысэбэкIрэр — гушъхьэлэжьыгъ: Гупшысэр бэу сылэжьыгъ, КъэсэгъэкIы хьарыфыр, гущыIэр — Чылапхъэ хъугъэ сщэIагъэр». У. «ЛэжьэкIупIэр щызэжъу»
ГутIэ Саныет ищыIэныгъэ гупшысэкIэ зэрэгъэшъокIыгъэр, ащ сыдигъуи фэшIу зишIызэ, щыIакIэм инэфыпси, щыIакIэм ишIункIи ащимыухьэу зэрэтхэрэр мы тхылъыкIэу «Гупшысэр жьыкорен» зыфиIорэмкIэ къыушыхьатыгъ. Усэныр ынэтIэгу итхагъэу къызэрэхъугъэм гу лъымытэн плъэкIырэп. УсакIом мыщ фэдизэу къин зыфызэригъэлъэгъурэр иадыгэ лъэпкъ, иадыгабзэ, Ным ишIушIэгъэ ялые цIыфыбэм алъигъэIэсымэ шIоигъошъ ары. «НэпIэхъыр щэзекIо Ны щагум» зыфиIорэ усэ закъоми, тиадыгэ поэзиекIэ, тишэн-хабзэкIэ, тицIыфыныгъэ тыухъумэнымкIэ мэхьанэшхо иI. Саныет иусэ тхылъыкIэ зэ уеджэу зебгъажьэкIэ узIэпещэ: уегъэгушхо, уеуIушы, узфегъэсакъыжьы. Арба поэзие дэгъум инэшанэр.
Бзылъфыгъэ усакIор Хэгъэгушхоми, ичIыгуи, Адыгееу икIасэми, цIыфхэми афэшъыпкъ, афэзаф, афэхьалэл. Непэ, бэдзэогъум и 14-р, къызыхъугъэ мафэшъ, тыгу къыддеIэу творческэ гъэхъагъэхэмкIэ, псауныгъэкIэ, тынчыныгъэкIэ, гупсэфыныгъэкIэ тыфэлъаIо, иилъэсхэр нэфынэнхэу сыдигъуи фэтэIо.
Мамырыкъо Нуриет. Сурэтхэм арытхэр: усакIоу ГутIэ Саныет; итхылъыкIэу «Гупшысэр жьыкорен».