УрысыбзэкIэ къыдэкIырэ кIэлэцIыкIу журналэу «Родничок Адыгеи» зыфиIорэр 2001-рэ илъэсым къыщыублагъэу, илъэсым 4 къыты­ра­дзэ хъугъэ.

Ар Адыгэ тхакIохэм я Союзрэ АР-м лъэпкъ IофхэмкIэ, Iэ­кIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Ко­митетрэ яшIушIэгъэ ин. ЗэкIэ журналиплIымэ яредактор шъхьа­Iэр тхакIоу МэщбэшIэ Исхьакъ.

Илъэс 20-р зэмкIэ ныбжьы­шхоп, ау къэхъугъэкIэ кушъэхэлъ сабыир илъэс 18 — 20 зыхъукIэ, цIыф хъугъахэу алъы­тэ. Арышъ, «Родничок Адыгеи» зыкъигъэшъыпкъэжьэу зэрэхэ­хъощтым, иамал кIуачIэ зэрэпытэщтым тицыхьэ телъ.

ПсынэкIэчъжъыем фэдэ журналыр зым нахьи адрэр нахь кIэракIэу, нахь гъэшIэгъонэу, ини, цIыкIуи, нахьыжъ Iушхэ- ри, кIэлэпIухэри, егъэджакIохэри ыкIи журналым иредакторэу Бэгъушъэ Мариети алъэкI къэмынэу игъом агъэхьазыры, къыдэкIы. ПчъагъэмкIэ ар мини 5,5-м кIахьэ, ащ нахьыбэуи къыратхыкIэуи къыхэкIыгъ.

Журналым изэхэтыкIэ-гъэ­псыкIэ, анахьэу къыIуатэрэр, мурадэу зыфэлажьэрэр зэдгъа­шIэмэ тшIоигъоу ащ иредактор зыфэдгъэзагъ.

— «Родничок Адыгеим» апэ­рэ лъэбэкъухэр езыгъэшIыгъэр апэдэдэ иредакторыгъэу Иванюк Светланэ Витальевнар ары, ар журналист IэпэIасэу «Советская Адыгея» гъэзе­тым илъэсыбэрэ Iоф щи­шIагъэу щытыгъ, ипшъэрылъи дэгъоу ыгъэцакIэщтыгъ. Ар ежь ишIоигъоныгъэкIэ (пенсием зэкIом) тIысыжьыгъэ. Сэ пшъэдэкIыжь зыхьырэ секретарэу сыщытыгъ, 2006-м щегъэжьагъэу журналым сыриредактор, сиIофшIэн сыгу рехьы, кIэлэцIыкIухэм ар ашIогъэшIэгъонэу, агукIэ ыгъа­тхъэ­хэу зэрэзгъэпсыщтым ренэу сына- Iэ тет, — къытиIуагъ Мариет.

— Апэрэ егъэжьэгъур къи­ныгъэба?

— Сыдрэ Iофи егъэжьэпIэ-­ублапIэм нахь уфэсакъын фае, угукIэ Iофым зытебгъэпсыхьагъэу уфежьэмэ, зэкIэ къыбдэ­хъущт. Адыгэмэ зэраIоу, «Iоф мыублэ блэ хэс», ау зэ зежьэкIэ, ори узIэпищэмэ, пшIэрэм укIэгушIузэ улъэкIуатэ.

— Непэрэ мафэм сабыйхэм, кIэлэцIыкIухэм бэ джэгуалъэу яIэр, пла­ншетхэр аIэкIэлъых, мультик зэфэшъхьафыбэм яплъых, еджакIохэри «телефон-компьютер» зыфэпIощтхэм япхыгъапэх, ахэр къыз­фэпщэнхэр псынкIэп, ау къафэшъогъэхьазыры журналыр, апашъхьэ къе­шъолъхьэ. Сыдэущтэу ар къыжъудэ­хъура?

— КIэлэцIыкIухэм япсихо­логие пшIэу, еджакIохэм нахь ящыкIагъэхэ шIэныгъэхэр, якIэ­сэ IэшIагъэхэр, ежьхэмкIэ гъэшIэгъоны хъурэ пстэур кIэд­гъэтхъызэ, журналым итеплъэ щегъэжьагъэу, зэкIэ нэкIубгъо пэпчъ имэхьанэ дгъэунэфызэ, пIуныгъэ-гъэсэныгъэмкIэ шIуа- гъэ къытэу тэгъэхьазыры.

— Зы номерыр адрэм сыда зэрэтекIырэр?

— КъыосIон: илъэсым плIэ «Родничокыр» къыдэкIы, ащ елъытыгъэу, илъэсым иохъти 4-мэ — кIымаф, гъатхэ, гъэмаф, бжыхьэ — ар атешIы­кIыгъ. Джащ фэдэу щыIэныгъэм имэфэпчъ къыщытыгъэ мэфэкI зэфэшъхьафыбэми ты­наIэ атет, гущыIэм пае: ИлъэсыкIэр, апэрэ осыр, апэрэ гу­шIуагъор; мы уахътэм еджа­кIохэр нахь чIыпIэрысых, джащ паекIэ, апэрэ илъэсыкIэ къыдэкIыгъом усэхэр (езбырэу зэрагъэшIэнхэм тегъэпсыхьа­гъэхэу), пшысэхэр, таурыхъхэр, унэкIоцIым уимыкIэу уезымыгъэзэщыщтхэ джэгукIэхэу акъы­лым, гулъытэм ахэзыгъахъо­хэрэр къыдэтэгъахьэх. КIыма­фэм дэгъоу зыпфэпэн, ушхэн ыкIи спортым упылъын зэрэ­фаер, узыгъохэм — гриппым, ОРВ-м зызэращыуухъумэщтхэ шIыкIэхэр кIэкIэу къафэтэIуатэх; ежь сабыйхэр ыкIи еджакIохэр тижурнал иIофшIэн къыхэтэ­гъэлажьэх: ясурэтшIыгъэхэр, пластилин джэгуалъэхэр, IэрышI нысхъапэхэр е IэрышI машинэр къыдэтэгъахьэх. Тхылъеджэныр зикIасэхэр ежь-ежьырэу къэ­нафэх: къытфэтхэх, ясурэтхэу атырахыгъэхэр къытфарагъэ­хьых, бэ, бэ джащ фэдэу къыдэтлъытэрэр.

— Журналым икъыдэ­гъэкIын ны-тыхэр, кIэлэ­егъаджэхэр, нэмыкIэу хэта къыхэлажьэ­хэрэр?

— Илъэс къэс «Родничок Адыгеим» IофшIэкIэ амалэу IэкIэлъхэм нахь заубгъу, лъэныкъорыгъазэу щымытэу, щыIэныгъэм, гъэсэныгъэм, шIэны­гъэм, тарихъым, цIыфыгъэм, спортым уакIигъэгушIоу инэкIубгъо пэпчъ темэ хэхыгъэр къызэIуихэу щыт.

— А темэхэм ацIэхэр къытфэпчъыба.

— Илъэсым охътэ дэй иIэп: бжыхьи, кIымафи, гъатхи, гъэмафи дэхэ закI, сурэтшIыгъэ закIэх, ащкIэ къетэгъажьэ. Уахътэм диштэрэ усэр, ар усакIохэм яехэм ащыщын е кIэлэеджэкIо сэнаущхэм атхыгъэн ылъэкIыщт. Адыгеим ичIыопс зэрядгъэшIэщтым ты­наIэ тет: икъушъхьэхэр, ипсы­хъохэр, имэзхэр, ибзыухэр ятэгъашIэх. Мэхьанэ зиIэ мэ­фэкI инхэр тэри зыкIи тщы­гъупшэхэрэп — джащ фэдагъ

ТекIоныгъэшхор къызыда­хыгъэр илъэс 75-рэ зэрэхъу­гъэр, мы мафэр илъэс къэси кIэ­тэгъэтхъы — ТекIоныгъэшхом ти­шъхьафитныгъи, тимамыр­ныгъи, тиунагъохэм, тикIэлэ­цIыкIухэм, тэ, цIыфхэм зэкIэми, тинасып зэрепхыгъэр кIэтэгъэтхъы.

МэфэкI зэнэкъокъухэу районхэм ыкIи республикэм ащызэхащэхэрэм къащыхэщыгъэ сэ­наущхэр — музыкантхэр, сурэтышI цIыкIухэр, спортсменхэр, «Умницы и умники» зыфиIоу Урысыем игупчэ теле­видение щызэхащэрэ къэтыным кIон амал зиIэу Адыгеим иеджакIохэм къахэщыгъэхэм ацIэхэри къетэIох.

— ЗэрэхъурэмкIэ, кIэлэцIыкIу журналыр зэкIэ сабыйхэм, еджакIохэм ядунай къызэлъиубытэу гъэпсыгъэ, арыба?

— Арыдэд. ЦIыкIу дэдэхэм ягулъытэ хэзыгъэхъохэрэ джэгукIэхэр «Нескучайка» («Зы­мыгъэзэщ») ыIоу нэкIубгъуитIоу къыдэтэгъахьэ. Чъыгым икъутамэхэм атесхэ бзыухэм зэ­фэ­дэхэу ахэтхэр, зэфэмыдэхэр къыхагъэщынхэ алъэкIэу, ягу­лъытэ агъэчанынэу, сурэт зэхэтхэмкIи джащ фэдэу етэгъасэх. КIэлэцIыкIухэм зэкIэ сыдигъуи ашIогъэшIэгъон, ащ тегъэпсы­хьагъ рубрикэу «Музеим тэ тэкIо» зыфиIорэр. Музеим ехьылIэгъэ тхыгъэм ащ чIэт пкъыгъохэр зэрагъэфедэщты­гъэхэр, ахэм цIыфымкIэ ямэхьанэ сыдигъуи кIэтэгъэтхъы. Игъорыгъоу гъэпсыкIэ-шIыкIэ дэгъухэми тикъэбар тхыгъэ цIы­кIухэмкIэ афэтэгъасэх. «Тэ лъытакIэ зэтэгъашIэ» зыфи­Iорэри зыгу рихьыхэрэр макIэп. Тэри, кIэлэцIыкIухэри зэщыгъо тифэрэп.

— ИкIэухым естыгъэ упчIэм иджэуапэу къысиIуагъ: «Родничок Адыгеим» ныбджэгъуныгъэ-гъусэныгъэ къыдыряI кIэлэегъаджэхэм, ны-тыхэм, журналистхэм, тхэкIо-усакIохэм. Адыгеим ищыIакIэ ашIэу, ащ лъэныкъуабэкIэ хэщэгъэнхэ пшъэрылъыр журналым зэшIуе­хэу сэгугъэ. Тэри тыгу къыдде­Iэу, зиилъэс 20 бэмышIэу хэзгъэунэфыкIыгъэ журналэу «Родничок Адыгеим», ащ Iоф дэзы­шIэрэ пстэумэ, еджэхэрэм ыкIи чанэу хэлажьэхэрэм зэ­кIэ­ми «Гъогумаф! Шъуимурадхэр Тхьэм къыжъудегъэхъу!» ятэIо.

Мамырыкъо Нуриет. Сурэтхэм арытхэр: журналэу «Родничок Адыгеи» ишъотеплъэхэр, ащ иредакторэу Бэ­гъушъэ Мариет.