Урысыем ТхэквондомкIэ изэнэкъокъу бэдзэогъум и 24-м Ханты-Мансийскэ щырагъэжьэщт.

Адыгэ Республикэм испорт еджапIэу N 2-м зыщызыгъэсэрэ ныбжьыкIи 5 хэгъэгум икIэух зэнэкъокъу хэлэжьэнэу щыт.

Кристина Левичевам, Артем Жерновковым, Кириакос Заимидис, Владислав Власовым, Дзэгъэщтэ Аринэ аужырэ уплъэкIунхэр Адыгэ Республикэм щакIух. Тренерхэу Олег Тыщенкэр, Василий Есиныр, нэмыкIхэри япащэхэу спортсменхэм кIуачIэр апсыхьэ, якъулайныгъэ хагъахъо.

ЕджапIэм ипащэу, Урысыем, Адыгеим язаслуженнэ тренерэу Хъот Юныс изэфэхьысыжьхэм къащыхигъэщыгъ хэгъэгум иныбжьыкIэхэм язэнэкъокъу мэхьэнэ ин иIэу зэрэщытыр.

Зэнэкъокъум апэрэ чIыпIитIур къыщыдэзыхыхэрэр Европэм ыкIи дунаим язэIукIэгъухэм ахэлэжьэщтых.

Тренерэу Александр Охрименкэр тиныбжьыкIэхэм япащэу Ханты-Мансийскэ кIощтых. ТибэнакIохэм хагъэунэфыкIырэ чIыпIэхэр къыдахынхэ алъэкIыщтэу тагъэгугъэ.