«Псэ зыпыт кIэнхэр» зыфиIорэ ятIонэрэ фести­валэу Урысыем щыкIуагъэм Адыгэ Республикэр хэлэжьагъ.

Онлайн шIыкIэм тетэу Москва щызэхащэгъэ Iофтхьабзэр Урысые Федерацием и Общественнэ палатэ къыхихыгъэ чIыпIэм щыкIуагъ.

Урысыем икультурнэ брендхэм афэгъэхьыгъэ зэхахьэм хэлэ- жьагъ Урысые Федерацием и Общественнэ палатэ икомиссие ипащэу Андрей Максимовыр.

Адыгэ къэралыгъо университетым адыгэ филологиемрэ куль­турэмрэкIэ ифакультет идоцентэу, тарихъ шIэныгъэхэмкIэ кандидатэу Цэй Заремэрэ тхакIоу, сценаристэу, адыгэ лъэпкъ творчествэм фэгъэхьыгъэ статьяхэр зытхыгъэу Теуцожь Фатимэрэ Адыгэ Республикэм ыцIэкIэ фес­тивалым хэлэжьагъэх.

Цэй Заремэ «Iэнэ хъураем» къыщыгущыIагъ. Культурэм икIэнхэр псэ апытэу зэрэпшIыщтым Заремэ иеплъыкIэхэр къыриIо­лIагъэх. Ащ изэфэхьысыжьхэм къащыхигъэщыгъ КъохьэпIэ Кавказым къыщагъотыжьыгъэ исп унэхэм якъэухъумэн зэрэдэла­жьэ­хэрэр. Федеральнэ хэбзэ шап­хъэхэр гъэуцугъэхэу Iофыр лъыгъэкIотэгъэн, цIыфхэр ащ щыгъэгъозэгъэнхэ фаеу З. Цэим елъытэ. Тарихъым, культурэм ясаугъэтхэр къэухъумэгъэнхэр Iофыгъо шъхьаIэхэм ахелъытэ.

Волонтерхэм япроектэу «Лъа­псэр къэгъэнэжь» зыфиIорэм игъэ­кIотыгъэу къыгъэлъэгъуагъ Адыгэ Республикэм чIыопсым, тарихъым, культурэм якIэнхэр къэухъумэгъэнхэмкIэ IофшIэгъэ гъэнэфагъэхэр зэрэщыIэхэр. Исп унэхэр къызэрагъэнэжьыгъэхэм имэхьани З. Цэир къытегущыIагъ.

Теуцожь Фатимэ «Iэнэ хъураем» къыщиIэтыгъэ Iофыгъохэр гум къегущыIыкIых. Адыгэ Рес- публикэм художественнэ IэшIагъэхэмкIэ иIэпэIасэхэм язэхэт IофшIапIэ изэIукIэгъухэм, Мые- къуапэ идэхьапIэу Нэгыежъ итхы- цIэ ылъапсэ щызэхащэрэ Iоф- тхьа­бзэхэм къапкъырыкIызэ, лъэпкъ IэпэIасэхэм яшIушIагъэ къы­хигъэщыгъ.

ЗекIохэм афытегъэпсыхьагъ

Адыгеим зекIо Iофым зыщиу­шъомбгъуным фэшI IэпэIасэхэм якъэгъэлъэгъонхэр къушъхьэм ылъапэ зэрэщызэхащэхэрэм мэ­хьэнэ ин иI. ЧIыпIэр дахэ, хъо­псагъо. Къушъхьэпсэу речъэкIырэм ымакъэ уедэIузэ, ащ зы­щыогъэпсэфы. Жьыр щыкъабз, чъыгхэм яжьау чъыIэтагъэ гур зыфещэ.

Мыжъо гъогур къыпэгъунэ- гъушъ, автомашинэу блэкIы-хэрэм, Сырыфыбг, Лэгъо-Накъэ, нэмыкI зыгъэпсэфыпIэ кIохэрэр къэгъэлъэгъоным къыщэуцух. IэпэIасэхэм яIофшIагъэ еплъых, шIухьафтын ашIын алъэкIыщт пкъыгъохэр къыхахых.

«Псэ зыпыт кIэн» зыфиIорэм лъэпкъ IэпэIасэхэр ягуапэу щызэIокIэх, яIофшIагъэ къызэфаIуатэ, упчIэжьэгъу щызэфэхъух.

Фестивалым лъэпкъ культурэм ихэхъоныгъэхэм щытегущы­Iагъэх, IэпэIасэм иеджапIэ щызэхащагъ, концертым орэдыбэ къыщаIуагъ.

Къахэщыгъэх

Урысыем культурэмкIэ, зекIонымкIэ ибрендхэр фестивалым къыщыхахыгъэх. «ТОП-1000» зыфиIорэм текIоныгъэр къыщыдэзыхыгъэмэ Адыгэ Республи- кэр ащыщ. Фестивалым исертификатхэр зыфагъэшъошагъэхэм тигуапэу шъуащытэгъэгъуазэ.

«Адыгеим иисп унэхэр», «Лэгъо-Накъ», «Хьалыжъу», «Адыгэ къашъохэр», «Адыгэ гъукIэхэр», «Адыгэ дышъэ идэнхэр», «Адыгэ шъуашэр», «ШыкIэпщы­нэхэр» фестивалым къыщыха­хыгъэх. ХагъэунэфыкIырэ чIыпIэ­хэр къыдэзыхыгъэ­хэм дип­ломхэр аратыжьыгъэх.

Цэй Заремэ зэнэкъокъоу «Билет в мечту» зыфиIорэм щате­кIуагъ. «Топ-1000» зыфи­Iорэ зэ­нэкъокъум щытхъуцIэр къыщихьыгъ.

Теуцожь Нуриет зэрилъытэ­рэм­кIэ, Адыгэ Республикэм икультурнэ, зекIо Iофхэр Уры­сыем нахьышIоу щашIэнымкIэ фестивалым егъэжьэпIэшIухэр ышIыгъэх. Урысыем культурэмкIэ и Министерствэ, нэмыкIхэри зыхэ­лэжьэрэ Iофтхьабзэм зи­у­шъомбгъущт, Адыгеир дунэе куль­турэм, зекIоным нахь ащы­зэлъа­шIэщт.